ރާއްޖޭގެ އިޤްތިޞާދުގެ މައި ދެ ތަނބު ކަމުގައިވާ މަސްވެރިކަމާއި ފަތުރުވެރިކަމުގެ ދާއިރާ ކުރިއަރާ ދިއުމުގައި ބޭންކް އޮފް މޯލްޑިވްސްގެ ދައުރު ބޮޑުކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ބޭންކް އޮފް މޯލްޑިވްސްއަށް، 40 އަހަރު ފުރުމުގެ މުނާޞަބަތުގައި މިރޭ ކްރޮސްރޯޑްސް މޯލްޑިވްސްގައި ބޭއްވި ޚާއްޞަ ޙަފްލާގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވީ ފަތުރުވެރިކަމާއި މަސްވެރިކަމަކީ އިޤްތިޞާދުގެ މައި ތެ ތަނބުކަމަށާއި، ދިވެހިންގެ އަމިއްލަ ބޭންކެއް އުފެދި މާލީ އެހީތެރިކަން ލިބޭނެ ގޮތް މަގުފަހިކުރުމުން އެ ދެ ސިނާއަތް ކުރިއަރައި ދިޔަކަމަށެވެ. އެގޮތުން ބޭންކުން ފޯރުކޮށްދިން އެހީތެރިކަމާއެކު ލަކުޑި ދޯނީގައި ކުރަމުން އައި މަސްވެރިކަން ޒަމާނީވެ ފައިބަރު ދޯނިފަދަ ޒަމާނީ އުޅަނދުތަކަށް ބަދަލުވެގެން ދިޔަކަން އެމަނިކުފާނު ފާހަގަކުރެއްވިއެވެ.
އެބޭންކުން ރާއްޖޭގެ ތަރައްޤީއަށް ވަރަށް ގިނަ ގޮތްގޮތުން ވަރަށް ބޮޑެތި ބަދަލުތަކެއް ގެނެސްދީފައިވާކަން ފާހަގަކުރައްވާ ރައީސް ވިދާޅުވީ، ބީއެމްއެލްގެ ޚިދުމަތް ފެށިއިރު ރާއްޖޭގެ ފަތުރުވެރިކަމަށްވީ އެންމެ 10 އަހަރުކަމަށެވެ. މިއަދު ބޭންކުގެ ޚިދުމަތަށް 40 އަހަރުވީ ދިގު ތާރީޚުގައި އެކި ސަރަޙައްދުތަކުގައި އެތައް ރިސޯޓްތަކެއް ހުޅިވި ފަތުރުވެރިކަމުގެ ސިނާއަތް ކުރިއަރައިގެން ގޮސްފައިވާކަމަށް ރައީސް ވިދާޅުވިއެވެ.
"އުމްރާނީ ތަރައްޤީވެސް ކުރިއަށްރައިގެން ދިޔައީ ބޭންކެގެ އެހީތެރިކަމާއެކު. މި ބޭންކުގެ ޚިދުމަތް ފުޅާވެ އުމުރާނީ ތަރައްޤީގެ މަޝްރޫއުތައް ކުރިއަށްގެންދިޔުމަށް ލޯންތައް ތަޢާރަފްވުމުން ބޮޑު ބަދަލެއް އަންނަނަށްފެށި. ޢިމާރާތްތަކާއެކު ވިޔަފާރީގެ ފުރުޞަތުތައް އިތުރުވެގެން ދިޔަ." ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.
ރައީސް ވިދާޅުވީ ކުރިއަށް އޮތް އަހަރުތަކުގައިވެސް ބޭންކުގެ ޚިދުމަތް ކުރިއަރައިގެން ދާނެކަމަށް ޔަޤީންކުރައްވާކަމަށެވެ. އަދި ބީއެމްއެލްއަކީ ދިވެހިންގެ އަމިއްލަ ބޭންކުކަން ފާހަގަކުރައްވާ ރައީސް ވަނި ރައްޔިތުންގެ އިތުބާރާއި ޔަޤީންކަން ހޯދުމަށާއި، އަމާނާތްތެރިކަމާއެކު ވިޔަފާރިވެރިންނާއި އާއްމު ރައްޔިތުންގެ ފައިސާ ރައްކާކުރުމަށް އެދިވަޑައިގެންފައެވެ. އަދި ބޭންކް ޚިދުމަތް ހޯދާ ވިޔަފާރިވެރިންނަށް މިހާރަށްވުރެ ލުއިގޮތްތަކެއް ހަމަޖައްސަވައިދެއްވުމަށާއި، ބޭރުގައި ކިޔަވަންތިބޭ ދަރިވަރުންނަށް ފައިސާފޮނުވުމުގައި މިހާރު ހުރި ދަތިތައް ހައްލުކުރުމަށްވެސް ރައީސް އެދިވަޑައިގެންނެވިއެވެ.
ރައީސް ވަނީ އިޤްތިޞާދީ ހަރާކާތްތަކުގެ އިތުރަށް ސަރުކާރުން ރައްޔިތުންނަށް ފަހިކޮށްދޭ މާލީ އެކިއެކި ފުރުޞަތުތަކުގައި ވެސް ބޭންކުން އަދާކުރާ ދައުރާއި އަދި އިޖުތިމާޢީ ޒިންމާގެ ދަށުން، ބޭންކުން ކޮށްފައިވާ މަސައްކަތްތަކުގެ މައްޗަށްވެސް އަލިއަޅުއްވާލައްވާފައެވެ. އެމަނިކުފާނުގެ ވާހަކަފުޅު ކުރިޔަށް ގެންދަވަމުން، ސަރުކާރުގެ ހިލޭ އެހީގެ ސްކީމްތަކާއި ލޯނު ސްކީމްތައް ހިންގައި ބަލަހައްޓައިދެނީ ބޭންކް އޮފް މޯލްޑިވްސްއިންކަން އެމަނިކުފާނު ފާހަގަކުރެއްވިއެވެ.
ރައިސުލްޖުމްހޫރިއްޔާގެ ވާހަކަފުޅުގައި ވަނީ، ބޭންކް އޮފް މޯލްޑިވްސް އުފެދިގެން އައި ގޮތާއި އެދުވަސްވަރު ރާއްޖޭގެ ބޭންކިން ނިޒާމް ހިނގަމުން އައިގޮތުގެ މައްޗަށްވެސް އަލިއަޅުއްވާލައްވައި ވާހަކަފުޅު ދައްކަވާފައެވެ. މިގޮތުން، ބޭންކު އޮފް މޯލްޑިވްސް އުފެއްދީ ބަނގްލަދޭޝް ސަރުކާރުގެ ވަރަށް ބޮޑު އެހީތެރިކަމަކާއި އެއްބާރުލުމަކާއެކުގައިކަން ފާހަގަ ކުރައްވައި، ބަނގްލަދޭޝްގެ އިންޓަރނޭޝަނަލް ފިނޭންސް އެންޑް އިންވެސްޓްމަންޓް ކޮމްޕެނީއަށާއި ބަނގުލަދޭޝްގެ ސަރުކާރަށް އެމަނިކުފާނު ޝުކުރުއަދާކުރެއްވިއެވެ.
މިޙަފްލާގައި ރައީސުލްޖުމްހޫރިއްޔާގެ އަރިހުގައި އެމަނިކުފާނުގެ އަނބިކަނބަލުން ފަޒްނާ އަޙްމަދާއި، ރައީސުލްޖުމްހޫރިއްޔާގެ ނައިބު ފައިޞަލް ނަސީމް ބައިވެރިވެވަޑައިގެންނެވިއެވެ.
ބޭންކް އޮފް މޯލްޑިވްސް ހުޅުވުނީ، 1982ވަނަ އަހަރުގެ ނޮވެމްބަރު މަހުގެ 11 ވަނަ ދުވަހުއެވެ.