ގަތަރާއި މެދުއިރުމަތީގައި ރާއްޖެ އިޝްތިހާރު ކުރުމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ކޮޒްމޯ ޓްރެވަލްއާއެކު ހައިބްރިޑް މާކެޓިންގ ކެމްޕޭނެއް ފަށައިފިއެވެ.
އަންނަ މާޗްމަހުގެ ނިޔަލަށް އެމްއެމްޕީއާރުސީން ކޮޒްމޯ ޓްރެވަލްއާއެކު ކުރިއަށް ގެންދާ މި ކެމްޕޭންގެ ހަރަކާތްތައް އޮންލައިންކޮށް އަދި އޮފްލައިންކޮށް ކުރިއަށް ގެންދާނެއެވެ. މި ކެމްޕެއިން އަމާޒުކޮށްފައިވަނީ ގަތަރާއި މެދުއިރުމަތީގައި ސަނީ ސައިޑް އޮފް ލައިފް އިތުރަށް ޕްރޮމޯޓް ކުރުމަށެވެ.
ކޮޒްމޯ ޓްރެވަލްއަކީ މިނިވަން އަދި ކޯޕަރޭޓް ދަތުރުވެރިންނަށް ރެޑީ-މޭޑް އަދި ކަސްޓަމައިޒްޑް ޓްރެވަލް ޕެކެޖުތައް ވިއްކާ ޓްރެވަލް މެނޭޖްމަންޓް ކުންފުންޏެކެވެ. މި ކުންފުނިންދޭ ޚިދުމަތްތަކުގެ ތެރޭގައި ޓިކެޓް ވިއްކުމާއި، އިންބައުންޑް އަދި އައުޓްބައުންޑް ހޮޓަލް ބުކިން ހަދައިދިނުމާއި، ވިސާ ޕްރޮސެސް ކުރުމާއި، މަންޒިލްތަކުގައި އެކްޓިވިޓީ ޕްރޮގްރާމްތައް އިންތިޒާމް ކުރުން ހިމެނެއެވެ. ކޮޒްމޯ ޓްރެވަލްގެ 73 އަށް ވުރެ ގިނަ ގޮފި މުޅި މެދުއިރުމައްޗާއި އިންޑިއާގައި ހުރެއެވެ.
އެމްއެމްޕީއާރުސީ ބުނީ މި ކެމްޕެއިން މެދުވެރިކޮށް ރާއްޖޭގެ ރަށްތައް ގުދުރަތީ ގޮތުން އުފެދިފައިވާ ގޮތަށް އަލިއަޅުވާލާ، ރާއްޖޭގެ ތަފާތު ޕްރޮޑަކްޓްތަކާއި ޚިދުމަތްތަކާއި ތަޖުރިބާތައް މާކެޓްކުރާނެ ކަމަށެވެ. އެގޮތުން މި ކެމްޕެއިންގެ ދަށުން ރާއްޖެއާ ގުޅުން ހުރި އިޝްތިހާރާއި ޕޯސްޓްތައް ކޮޒްމޯ ޓްރެވަލްސްގެ ވެބްސައިޓާއި ގޫގުލް ޑިސްޕްލޭ ނެޓްވޯކް އަދި ޔޫޓިއުބް މެދުވެރިކޮށް ގަތަރާއި މެދުއިރުމަތީގެ މާކެޓުގައި ދައުރުކުރާނެއެވެ. އަދި ކޮޒްމޯ ޓްރެވަލްގެ ޑާޓާބޭސްގައި ހިމެނޭ ފަރާތްތަކަށް އެސްއެމްއެސް އާއި އީމެއިލް މެދުވެރިކޮށް ރާއްޖޭގެ މައުލޫމާތު ފޯރުކޮށްދީ، ގަތަރާއި މެދުއިރުމަތީގެ އެހެން ގައުމުތަކުގައި ހުންނަ އެ ކުންފުނީގެ ރީޓެއިލް އައުޓްލެޓްތަކުގައި ވެސް ރާއްޖޭގެ އިޝްތިހާރުތައް ބަހައްޓާނެއެވެ. މި ކެމްޕޭންގެ ދަށުން ފޯރުކޮށްދޭ މަޢުލޫމާތު 1.1 މިލިއަން މީހުންނަށް ފޯރާނެ ކަމަށް އެމްއެމްޕީއާރުސީން ލަފާކުރެއެވެ.
މިދިޔަ އަހަރުތެރޭ މެދުއިރުމަތީގެ ޤައުމުތަކުން ރާއްޖެއަށް 100،494 ފަތުރުވެރިން އައިސްފައިވާއިރު، މި މުއްދަތުގައި ގަތަރުން ރާއްޖެއަށް 6،060 ފަތުރުވެރިން އައިސްފައިވެއެވެ. މި މާކެޓުގައި ރާއްޖޭގެ މަޤުބޫލުކަން ދެމެހެއްޓުމަށް އެމްއެމްޕީއާރުސީން ދަނީ ގިނަ ހަރަކާތްތަކެއް ކުރިއަށް ގެންދަމުންނެވެ. މިގޮތުން މިއަހަރުވެސް މެދުއިރުމައްޗާއި ގަތަރުގެ މާކެޓަށް އަމާޒުކޮށް ގިނަ ހަރަކާތްތަކުގައި ބައިވެރިވެ، ކެމްޕެއިންތައް ހިންގުމަށް ވަނީ ހަމަޖެހިފައެވެ.
2022 ވަނަ އަހަރު އެމްއެމްޕީއާރުސީން ޖުމްލަ 176 ހަރަކާތް ހިންގާފައިވެއެވެ. އެގޮތުން 90 މާކެޓިންގ ކެމްޕޭން، 42 ފެއަރގައި ބައިވެރިވުން، 06 ރޯޑްޝޯ ހޯސްޓުކުރުން، 10 ވާޗުއަލް އިވެންޓް، 18 ފެމިލިއަރައިޒޭޝަން ދަތުރު، އަދި 10 އެހެނިހެން އިވެންޓްތައް ދުނިޔޭގެ އެކި ކަންކޮޅުތަކުގައި ވަނީ ހިންގާފައެވެ.