ސްޕެއިންގެ މެޑްރިޑުގައި ކުރިއަށްދާ ފިތޫރު ފެއަރގައި ރާއްޖެއިން ބައިވެރިވެއްޖެއެވެ.
މިމަމަހުގެ 18 އިން 22 އަށް ކުރިއަށްދާ ފިތޫރު ފެއަރއަކީ މިއަހަރު ރާއްޖެއިން ބައިވެރިވާ އެންމެ ފުރަތަމަ ބޮޑު ޓްރެވަލް ޓްރޭޑް ފެއަރއެވެ. މި ފެއަރގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީއާއެކު ރާއްޖޭގެ ފަތުރުވެރިކަމުގައި ހަރަކާތްތެރިވާ 23 ކުންފުންޏަކުން 41 ފަރާތެއްވަނީ ބައިވެރިވެފައެވެ.
ފިތޫރްއަކީ ޓްރެވަލް އެޖެންސީތަކާއި، ހޯލްސޭލަރުންނާއި، ހޮޓަލްތަކާއި އެކޮމޮޑޭޝަންތަކާއި، އެއަރލައިންތަކާއި، ފަތުރުވެރިކަމުގެ ލެޝާރ އަދި ކަލްޗަރަލް އެކްސްޕީރިއަންސްތައް ފޯރުކޮށްދޭ ފަރާތްތަކާއި، މަންޒިލްތަކާއި، މި ދާއިރާގެ އިންފްރާސްޓްރަކްޗަރ ތަރައްޤީކުރާ ފަރާތްތަކާއި، ސްޕެއިންގެ ރަސްމީ ޖަމިއްޔާތަކާއި، ޓްރެވަލް މީޑިއާތައް ބައިވެރިވާ ފެއަރއެކެވެ. މިއީ ވިޔަފާރީގެ ރަނގަޅު ފުރުސަތުތަކެއް ފަހިކޮށްދޭ ފެއަރއަކަށްވާއިރު، މި ފެއަރއަށް ފަތުރުވެރިކަމުގެ ހިދުމަތްތައް ގަންނަން ބޭނުން ފަރާތްތަކާއި، އިންފްލުއެންސަރުންނާއި މާކެޓް ޕްރޮފެޝަނަލުން ޒިޔާރަތްކުރެއެވެ.
އެމްއެމްޕީއާރުސީއިން މި ފެއަރ މެދުވެރިކޮށް ސަނީ ސައިޑް އޮފް ލައިފްއިން ލިބޭ ތަފާތު ތަޖުރިބާތައް ޕްރޮމޯޓުކޮށް، ރާއްޖޭގެ ފަތުރުވެރިކަމުގެ އެކި ސެގްމަންޓުތައް ދަނީ ޕްރޮމޯޓުކުރަމުންނެވެ. ފިތޫރުގައި އެމްއެމްޕީއާރުސީއިން ބައިވެރިވުމުގެ މަޤްޞަދުގެ ތެރޭގައި ސްޕެއިންގެ ފަތުރުވެރިންގެ މެދުގައި ރާއްޖޭގެ އުފެއްދުންތަކާއި މަންޒިލުން ލިބޭ ތަޖުރިބާތަކާ ބެހޭގޮތުން ހޭލުންތެރިކަން އުފެއްދުމާއި، ސްޕެއިންގެ އިންޑަސްޓްރީގެ ޕްރޮފެޝަނަލުންނާ ގުޅުން ބަދަހިކުރުން ހިމެނެއެވެ.
ފިތުރު 2023 ގެ ތެރޭގައި ރާއްޖޭގެ ސްޓޭންޑުގައި އެމްއެމްޕީއާރުސީގެ ފަރާތުން ހިންގުމަށް ހަމަޖެހިފައިވާ މުހިންމު ހަރަކާތްތަކުގެ ތެރޭގައި ނަސީބުވެރި ހަތަރު ފަރާތަކަށް ރާއްޖޭގައި ހިލޭ ޗުއްޓީ ހޭދަކުުރުމުގެ ފުރުސަތު ލިބޭ ހާއްސަ ގުރުއަތެއް ނެގުމަށް ވަނީ ހަމަޖެހިފައެވެ. މި ގުރުއަތުގައި ރާއްޖޭގެ ސްޓޭންޑަށް ޒިޔާރަތްކުރާ ކޮންސިއުމަރުންނާއި ޓްރެވަލް ޓްރޭޑް ޕްރޮފެޝަނަލުންނަށް ބައިވެރިވެވޭނެއެވެ. މި ހަރަކާތް ކުރިއަށް ގެންދާނީ ފެއަރގެ އެއްވަނަ، ތިންވަނަ، ހަތަރުވަނަ އަދި ފަސްވަނަ ދުވަހުއެވެ. އަދި މިއިން ކޮންމެ ދުވަހަކު ހޮވާނީ އެއް ނަސީބުވެރިއެކެވެ. ކުއެސްޝަނިއާއެއް މެދުވެރިކޮށް ބައިވެރިވެވޭ މި ގުރުއަތުން ދެވޭ ހިލޭ ޗުއްޓީތައް ސްޕޮންސާކޮށްފައި ވަނީ އަދާރަން ސެލެކްޓް ހުދުރަންފުށި، ސަން ސިޔާމް ރިސޯޓްސް، ބްރެނިއާ މޯލްޑިވްސް، އަދި އަންގްސާނާ ވެލަވަރު ރިސޯޓުންނެވެ.
ސްޕެއިން އަކީ މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި 10 މާކެޓުގެ ތެރޭގައި ހިމެނޭ އެއް މާކެޓެވެ. މިދިޔަ އަހަރުގެ ތެރޭގައި ސްޕެއިންއިން ވަނީ ރާއްޖެއަށް 42،148 ފަތުރުވެރިން ޒިޔާރަތްކޮށްފައެވެ. މި މާކެޓުގައި ރާއްޖޭގެ މަޤުބޫލުކަން ދެމެހެއްޓުމަށް އެމްއެމްޕީއާރުސީއިން ދަނީ ގިނަ ހަރަކާތްތަކެއް ހިންގަމުންނެވެ. މިގޮތުން މި މާކެޓަށް އަމާޒުކޮށް މި އަހަރު ވެސް ފިޒިކަލް ފެއަރތަކުގައި ބައިވެރިވުމުގެ އިތުރުން، އައުޓްޑޯ އެޑްވަޓައިޒިން ކެމްޕެއިންތަކާއި މި މާކެޓްގެ ޓޮޕް ޓުއަރ އޮޕަރޭޓަރުންނާއި އޮންލައިން ޓްރެވަލް އެޖެންސީތަކާ އެކު ކެމްޕޭންތައް ހިންގުމަށް ވަނީ ރާވާފައެވެ. އަދި ނޫސްވެރިންނަށް ރާއްޖެ އަމިއްލައަށް ތަޖުރިބާ ކުރުމުގެ ފުރުސަތު ދިނުމުގެ ގޮތުން މި މާކެޓަށް އަމާޒުކޮށްގެން މީޑިއާ ފެމިލިއަރައިޒޭޝަން ދަތުރުތައްވެސް މިއަހަރު ތެރޭގައި ހިންގުމަށް ވަނީ ނިންމާފައެވެ.