ސޫރިޔާގެ ދެވަނައަށް އެންމެ ބޮޑު ރަށް ކަމުގައިވާ ޙަލަބުގައި ހުރި ޢާންމުން ދިރިއުޅޭ ޢިމާރާތެއް ވެއްޓި 16 މީހުން މަރުވެއްޖެއެވެ. ވެއްޓިފައި ވަނީ، ސޫރިޔާގެ ދާޚިލީ ހަނގުރާމައިގައި ވަރަށް ބޮޑަށް ގެއްލުންވެފައިވާ ފަސް ބުރީގެ ޢިމާރާތެކެވެ. މި ހާދިސާގައި ގިނަ ޢަދަދެއްގެ ބަޔަކު ވަނީ ޒަޚަމުވެފައެވެ.
މީގެ 12 އަހަރު ކުރިން ފެށި ދާޚިލީ ހަނގުރާމައިގައި ޙަލަބަށް ވަނީ ބޮޑެތި ގެއްލުންތަކެއް ލިބިފައެވެ. ގިނަ ޢިމާރާތްތަކެއް ވަނީ ބޭނުންނުރެވޭ ވަރަށް ހަލާކުވެފައެވެ. ވެއްޓުނު ޢިމާރާތުގެ ދަށުގެ މަރުވި މީހުންގެ ތެރޭގައި ކުޑަކުދިން ވެސް ހިމެނެއެވެ. މީގެ ތެރޭގައި ފަސް ކުޑަކުދިން ހިމެނޭ ކަމަށާއި، އެއް ކުއްޖަކީ ތުއްތުކުއްޖެއް ކަމުގައި ވެސް ރިޕޯޓުތައް ބުނެއެވެ.
ޢިމާރާތުގެ ދަށުވެފައިވާ ކަމަށް ބެލެވޭ އިތުރު މީހުން ހޯދައި، ސަލާމަތްކުރުމަށް އޮފިޝަލުން ދަނީ މަސައްކަތް ކުރަމުންނެވެ. މިހާތަނަށް ހަތަރު މީހަކު ވަނީ ސަލާމަތް ކުރެވިފައެވެ. މި މަސައްކަތުގައި، އެކްސްކެވޭޓަރ ފަދަ އާލާތްތައް ވެސް ދަނީ ބޭނުން ކުރަމުންނެވެ.
މި ހާދިސާގައި މަރުވި މީހުންގެ ޢަދަދު 16 އަށް އަރާފައިވާ ކަން އެ ޤައުމުގެ ރަސްމީ ޚަބަރު ފަތުރާ ވަސީލަތް ކަމުގައިވާ ސަނާއިން ވަނީ ކަށަވަރުކޮށްދީފައެވެ. ވެއްޓުނު ޢިމާރާތަކީ، ހަނގުރާމައިގައި ގެދޮރު ގެއްލި ރެފިޔުޖީންނަށްވެފައިވާ ގިނަ ޢަދަދެއްގެ ބަޔަކު ދިރިއުޅެމުންދިޔަ ޢިމާރާތެއް ކަމަށް ޚަލަބުގެ އޮފިޝަލުން ބުނެއެވެ.
ވެއްޓުނު ޢިމާރާތް ހުންނަނީ ޝައިޚް މަކްސޫދް އަވަށުގައެވެ. އެއީ، ކުރުދީ ދަރިކޮޅުގެ މީހުން ދިރިއުޅޭ ސަރަޙައްދެކެވެ. ޢިމާރާތް ވެއްޓެން މެދުވެރިވީ، އެ ތަނުގެ ފައުންޑޭޝަންއަށް ފެން ލީކުވުމުގެ ސަބަބުން ކަމަށް ބެލެވޭ ކަމުގައި ޚަލަބުގެ ފުލުހުން ލަފާކުރެއެވެ.
ސޫރިޔާގެ ޢާންމު ރައްޔިތުންގެ އިންސާނީ ހައްޤުތަކާ ބެހޭ ކަންކަން ދިރާސާކުރާ ޖަމުޢިއްޔާއެއް ކަމުގައިވާ ސީރިޔަން އޮބްޒަވޭޓަރީ ފޯރ ހިޔުމަން ރައިޓްސްއިން ބުނީ، ވެއްޓުނު ޢިމާރާތުގައި ދިރިއުޅެމުން ގޮސްފައި ވަނީ، ޚަލަބުގެ އުތުރުން އޮންނަ އަފްރީންގެ ރެފިޔުޖީންތަކެއް ކަމުގައެވެ. އެ ރަށުގެ ރައްޔިތުން ޙަލަބަށް ހިޖުރަކޮށްފައި ވަނީ 2018 ވަނަ އަހަރު އަފްރީންއަށް ތުރުކީވިލާތުން ދިން ވަރުގަދަ ހަމަލާތަކާ ގުޅިގެން ކަމަށް އެ ޖަމުޢިއްޔާއިން ބުނެއެވެ.
ސޫރިޔާގައި ދާޚިލީ ހަނގުރާމަ ފެށުނީ 2011 ވަނަ އަހަރުއެވެ. އެ ހަނގުރާމައިގައި އެ ޤައުމުގެ އާބާދީގެ ދެބައިކުޅަ އެއްބައި ރައްޔިތުން ވަނީ ހާލުގައި ޖެހި، ރެފިޔުޖީންނަށް ވެފައެވެ. މި ހަނގުރާމައިގައި މަރުވި މީހުންގެ ޢަދަދު ބައި މިލިޔަނަށްވުރެ މައްޗަށް އަރައެވެ.
ސޫރިޔާގައި ހާލުގައި ޖެހިފައިވާ ގިނަ ޢާއިލާތަކުން ދިރިއުޅެނީ، ޙަލަބުގައި ވެއްޓުނު ޢިމާރާތް ފަދަ، ހާލު ދެރަ ޢިމާރާތްތަކުގައެވެ. 2022 ވަނަ އަހަރުގެ ސެޕްޓެންބަރު މަހު ވެސް ޙަލަބުގެ ޢިމާރާތެއް ވަނީ ވެއްޓިފައެވެ. އަދި، 10 މީހުން މަރުވެފައެވެ. ފިރުދައުސް އަވަށުގައި ހުންނަ އެ ޢިމާރާތް ވެއްޓުނު ހާދިސާގައި މަރުވި މީހުންގެ ތެރޭގައި ވެސް ތިން ކުޑަކުދިން ހިމެނެއެވެ.
2019 ވަނަ އަހަރުގެ ފެބުރުވަރީ މަހު ވެސް ހަނގުރާމައިގައި ގެއްލުންލިބިފައިވާ ޢިމާރާތެއް ވެއްޓުނެވެ. އަދި، 11 މީހުން މަރުވިއެވެ. އެ ހާދިސާގައި ވެސް ހަތަރު ކުޑަކުދިން މަރުވިއެވެ.