ލޯކަލް ކައުންސިލްތަކުގެ އިދާރީ އެންމެ އިސްވެރިޔަކަށް އައްޔަންކުރެއްވުމަށް އިތުރު 41 ސެކްރެޓަރީ ޖެނެރަލުން ހޯދުމަށް ސިވިލް ސާރވިސް ކޮމިޝަން، ސީ.އެސް.ސީއިން އިޢުލާންކޮށްފިއެވެ.
ލޯކަލް ކައުންސިލުތައް އިދާރީ ހިންގުމުގެ އެންމެ އިސްވެރިޔާ، ސެކްރެޓަރީ ޖެނެރަލްގެ މަޤާމަށް މީހުން ހޯދުމަށްޓަކައި ސިވިލް ސާރވިސް ކޮމިޝަނުން ދަނީ ގިނަ މަސައްކަތްތަކެއް ކުރަމުންނެވެ. އެ ކޮމިޝަނުން އެންމެ ފުރަތަމަ އެސްޖީންގެ މަޤާމަށް ހުޅުވާލީ 2021 ވަނަ އަހަރުގެ ޖޫން މަހުގެ ތެރޭގައެވެ. އޭރު އެކޮމިޝަނުން 200 ކައުންސިލްގެ އިދާރާއަށް ސެކްރެޓަރީ ޖެނެރަލުންގެ މަޤާމަށް ހުޅުވާލިއެވެ.
ނަމަވެސް މިދިޔަ އަހަރުގެ ސެޕްޓެމްބަރާއި ހަމައަށް އައްޔަނު ކުރެވިފައިވަނީ 127 ސެކްރެޓަރީ ޖެނެރަލުންނެވެ. މީގެތެރެއިން ބައެއް އެސްޖީން އިސްތިޢުފާދީފައިވާކަމަށްވެސް ސިވިލް ސަރވިސް ކޮމިޝަނުން ވިދާޅުވެއެވެ.
އެސްޖީން ހޯދުމަށް މިފަހަރު ހުޅުވާލި ކައުންސިލްތަކުގެ ތެރޭގައި ހިމެނެނީ 5 އަތޮޅު ކައުންސިލަކާއި، 36 ރަށު ކައުންސިލެކެވެ. މީގެ ތެރެއިން ރަށު ކައުންސިލުގެ އެސްޖީންގެ ގޮތުގައި 2 ރޭންކަކުން ކުރިމަތިލެވޭގޮތަށް ވަނީ ހުޅުވާލާފައެވެ. ފުރަތަމަ ރޭންކްގެ މުސާރަ އަކީ 16،100 ރުފިޔާއެވެ. ދެވަނަ ރޭންކްގެ މުސާރައަކީ 12،285 ރުފިޔާއެވެ. އަތޮޅު ކައުންސިލްތަކުގެ އެސްޖީންގެ މުސާރައިގެ ގޮތުގައި ކަނޑައަޅާފައިވަނީ 21،000 ރުފިޔާއެވެ. މިއީ ހުސް 5 އަހަރު ދުވަހުގެ މުއްދަކަށް އައްޔަނުކުރާ މަޤާމެކެވެ.
ސެކްރެޓަރީ ޖެނެރަލުން ހޯދުމަށް ދަތިވެފައިވާތީ، ސިވިލް ސާރވިސް ކޮމިޝަނުން ވަނީ އެމަޤާމުގެ ޝަރުތުގެ ތެރޭގައި ޑިގްރީ އޮތް މީހަކަށް ވާންޖެހޭކަމަށް ބަޔާންކޮށްފައި އޮތް އޮތުން ދަށްކޮށް، ޑިޕްލޮމާގެ ފެންވަރު މީހުންނަށްވެސް ކުރިމަތިލެވޭގޮތަށް ބަދަލުކޮށްފައެވެ. މި މަޤާމަށް ކުރިމަތިލުމަށް ޝަޢުގުވެރިވާ ފަރާތްތަކުން އަންނަމަހުގެ 2 ގެ ނިޔަލަށް ކުރިމަތިލުމަށް އެ ކޮމިޝަނުން ވަނީ ފުރުޞަތު ހުޅުވާލާފައެވެ.
ސެކްރެޓަރީ ޖެނެރަލުންގެ މައިގަނޑު މަސްޢޫލިއްޔަތުގެ ތެރޭގައި ކައުންސިލްގެ އެންމެ އިސް އިދާރީ މުވައްޒަފެއްގެ ހައިސިއްޔަތުން ކައުންސިލްގެ ހިންގުމަށް ބޭނުންވާ އެންމެހައި އިންތިޒާމުތައް ހަމަޖައްސައި އިދާރާގެ މަސައްކަތްތައް ހިންގައި ބެލެހެއްޓުން ހިމެނެއެވެ. އަދި ކައުންސިލް އިދާރާގެ މަސައްކަތްތަކާ ގުޅޭގޮތުން ކައުންސިލްގެ ރައީސް ނުވަތަ މޭޔަރަށް ރިޕޯޓްކުރުމާއި ޖަވާބުދާރީވުމާއި، ކައުންސިލުން ނިންމާ ނިންމުންތަކާއި ކަނޑައަޅާ އުޞޫލުތައް ތަންފީޛުކުރުމަކީވެސް ސެކްރެޓަރީ ޖެނެރަލުންގެ މަސްޢޫލިއްޔަތެވެ.
ކައުންސިލުން ފޯރުކޮށްދޭ މުނިސިޕަލް ޚިދުމަތްތައް ކައުންސިލްގެ އިދާރާގެ މުވައްޒަފުން މެދުވެރިކޮށް ފޯރުކޮށްދެވޭނެ އިންތިޒާމު ހަމަޖައްސައި، ކައުންސިލުން ކަނޑައަޅާފައިވާ އުޞޫލުތަކާ އެއްގޮތަށް އެ ޚިދުމަތްތައް ފޯރުކޮށްދިނުމަކީވެސް އެސްޖީންގެ މަސްޢޫލިއްޔަތެވެ.