ތައިލެންޑުގެ ފުލުހުން ހިންގި ޚާއްޞަ އޮޕަރޭޝަނެއްގައި 1.1 ޓަނުގެ ކްރިސްޓަލް މެތެމްފެޓަމައިން ހޯދައި، ހިފަހައްޓައިފިއެވެ. ކްރިސްޓަލް މެތެމްފެޓަމައިން ނުވަތަ ކްރިސްޓަލް މެތަކީ މަސްތުވާތަކެތީގެ ތެރޭގައި ހިމެނޭ ނުރައްކާތެރި ބާވަތެކެވެ. މި ތަކެތި ހޯދާފައި ވަނީ އެ ޤައުމުގެ އެކި ސަރަޙައްދުތަކުގައި ފުލުހުން ހިންގި އޮޕަރޭޝަންތަކެއްގައެވެ.
ތައިލެންޑަށް މަސްތުވާތަކެތި އެތެރެކުރުން ހުއްޓުވުމަށް އެ ޤައުމުގެ އިދާރާތަކުން ދަނީ ޚާއްޞަ މަސައްކަތްތަކެއް ކުރަމުންނެވެ. އުތުރުގެ ސަރަޙައްދުތަކުގައި ފުލުހުން ހިންގި ރޭޑުތަކުގައި، މަސްތުވާތަކެތީގެ ވަގުވިޔަފާރި ކުރާ ފަރާތްތަކާއި ފުލުހުންނާ ދެމެދު ނުރައްކާތެރި ކުރިމަތިލުންތަކެއް ވެސް ހިނގިއެވެ. އަދި، އެ ވިޔަފާރީގައި އުޅޭ 10 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ހައްޔަރުކޮށްފައި ވަނީ ތައިލެންޑުގެ ރައްޔިތުންނެވެ.
ތައިލެންޑުގެ އުތުރުގެ ސަރަޙައްދުތަކަކީ، މަސްތުވާތަކެތީގެ ވިޔަފާރިކުރާ ފަރާތްތަތަކުން، އެ ތަކެތި އެ ޤައުމަށް އެތެރެކުރަން ބޭނުންކުރާ ސަރަޙައްދުތަކެއް ކަމުގައި ތައިލެންޑުގެ އިދާރާތަކުން ބުނެއެވެ. އަދި، އެއަށްފަހު އެ ޤައުމުގެ ދެކުނުގެ ސަރަޙައްދުތަކާއި، އެހެން ޤައުމުތަކަށް ވެސް އެ ތަކެތި ފޮނުވާ ކަމަށް އިދާރާތަކުން ގަބޫލުކުރެއެވެ.
ތައިލެންޑުގެ ނޭޝަނަލް ޕޮލިސް ޗީފްގެ ނައިބު ޕޮލިސް ޖެނެރަލް ޗިންނަޕަތް ސަރަސިން ވިދާޅުވީ، ކޮވިޑް-19އާ ގުޅިގެން ކުރި ފުރަބަންދުތަކުގެ ސަބަބުން މަސްތުވާތަކެތި އެތެރެކުރުމުގެ އޮޕަރޭޝަންތައް ކޮންމެ ވެސް ވަރަކަށް މަޑުޖެހުނު ކަމުގައެވެ. ނަމަވެސް، ފުރަބަންދުތައް އުވައިލުމާ އެކު، މަސްތުވާތަކެތީގެ ވިޔަފާރިކުރާ ފަރާތްތަކުން، އެ މީހުންގެ އޮޕަރޭޝަންތައް އިތުރުކޮށްފައިވާ ކަމުގައި އޭނާ ވިދާޅުވިއެވެ.
ފުލުހުން ބުނީ، ދެކުނުގައިވާ ޕަޓްތަލުންގް އަދި ސޫރަތް ތާނީ ޕުރޮވިންސުން 731 ކިލޯގެ މަސްތުވާތަކެތި އަތުލައިގަނެފައިވާ ކަމުގައެވެ. އަދި، އުތުރުގެ ސަރަޙައްދަކުން 688 ކިލޯގެ ކްރިސްޓަލް މެތު ފެނިފައިވާ ކަމަށާއި، އުތުރުގައިވާ ޗެންގް ރާއީއިން 300 ކިލޯގެ މަސްތުވާތަކެތި އަތުލައިގަނެފައިވާ ކަމުގައެވެ. މީގެ އިތުރުން، މެދުތެރޭގައިވާ ނަކްހޮން ސަވަންއާއި ޕަތުމް ތާނީ ޕުރޮވިންސުން ވެސް 114 ކިލޯގެ މެތު ފެނިފައިވާ ކަމުގައި ފުލުހުން ބުނެއެވެ.
ދެކުނުއިރުމަތީ އޭޝިޔާގެ ޤައުމުތަކުގައި ކްރިސްޓަލް މެތު ބޭނުންކުރާ މީހުން ޢަދަދު އިތުރުވެފައިވާ ކަމަށް އ.ދ.ގެ ރިޕޯޓަކުން ވަނީ ހާމަވެފައެވެ. އަދި، 2021 ވަނަ އަހަރު، ރެކޯޑު ޢަދަދަކަށް ކްރިސްޓަލް މެތު އެ ސަރަޙައްދުގެ ޤައުމުތަކުގެ ފުލުހުން ވަނީ ހޯދައި، ހިފަހައްޓާފައެވެ.