ބައިނަލްއަޤްވާމީ 35 އެއަރލައިނަކުން މިހާރު ރާއްޖެއަށް ދަތުރުކުރާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
މީގެތެރޭގައި ރާއްޖެއަށް ޝެޑިއުލް ދަތުރުތައް ކުރާ އެއަރލައިންތަކާއި، ޗާޓަރު ދަތުރުތައް ކުރާ އެއަރލައިންތައް ހިމެނެއެވެ. މި ދުވަސްވަރަކީ ރާއްޖެއަށް ފަތުރުވެރިކަމުގެ ޕީކް ސީސަނަށްވުމުން ރާއްޖެއަށް ގިނަ އެއަރލައިންތަކަކުން ދަނީ ދަތުރުތައް ފަށަމުންނެވެ.
ރާއްޖެއަށް މިހާރު ބައިނަލްއަޤްވާމީ 35 އެއަރލައިންއަކުން ދަތުރުތައް ބާއްވަމުންދާއިރު، މި ދަތުރުތަކާއެކު ރާއްޖެވަނީ ދުނިޔޭގެ އެކި ހިސާބުތަކާއި ގުޅާލާފައެވެ.
މީގެއިތުރުން ޗައިނާގެ ބޯޑަރުތައް ހުޅުވާލުމުން ރާއްޖެއަށް އެ ޤައުމުންދަނީ ދަތުރުތައް ފަށަމުންނެވެ. އެގޮތުން މިމަހުގެ 18ވަނަ ދުވަހުވަނީ ބެއިޖިންގ ކެޕިޓަލް އެއަރލައިންގެ ދަތުރުތައް ރާއްޖެއަށް ފަށާފައެވެ. އަދި ޗައިނާގެ އިތުރު 2 އެއަރލައިނަކުން ރާއްޖެއަށް ދަތުރުކުރުމަށްވަނީ ހަމަޖެހިފައެވެ. އެއީ ޗައިނާ އީސްޓަން އެއަރލައިން އާއި ހޮންގްކޮންގ އެއަރލައިނެވެ.
ޗައިނާ އީސްޓަން އެއަރލައިނުން ދަތުރުތައް ކުރާނީ މިޖެނުއަރީ މަހުގެ 28 އިން މާރޗް މަހުގެ 25 ވަނަ ދުވަހުގެ ނިޔަލަށެވެ. މި ދަތުރުތައް ކުރާނީ ޝަންހާއީ ޕުޑޮންގ އިންޓަރނޭޝަނަލް އެއަރޕޯޓުން ވެލާނާ އިންޓަރނޭޝަނަލް އެއަރޕޯޓަށެވެ. މި ދަތުރުތަކުގައި އެ އެއެއަރލައިނުން ބޭނުންކުރާނީ 232 މީހުންގެ ޖާގައިގެ ބޯޓުތަކެކެވެ. މި އެއަރލައިނުން ހަފްތާއަކު 1 ދަތުރުކުރާނެއެވެ.
ބައިނަލްއަޤްވާމީ ގިނަ އެެއަރލައިންތަކަކުން ރާއްޖެއަށް ދަތުރުތައް ބާއްވަމުންދާއިރު، ރާއްޖެއަށް އަންނަ ފަތުރުވެރިންގެ އަދަދުތަށްވެސް ދަނީ އިތުރުވަމުންނެވެ. ޓޫރިޒަމް މިނިސްޓްރީގެ އެންމެ ފަހުގެ ހިސާބުތައް ދައްކާގޮތުން މިމަހުގެ 25 ވަނަ ދުވަހުގެ ނިޔަލަށް ރާއްޖެއަށް 138،593 ފަތުރުވެރިން ޒިޔާރަތްކޮށްފައެވެ.
މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި 106،826 ފަތުރުވެރިންނާއި އަޅާ ބަލާއިރު، 29.7 އިންސައްތަ އިތުރު އަދަދެކެވެ. ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 5544 ފަތުރުވެރިން އާދެއެވެ. އަދި ރާއްޖެއަށް އަންނަ ފަތުރުވެރިން ރާއްޖޭގައި އެވްރެޖްކޮށް 8 ދުވަހުގެ ޗުއްޓީއެއް ހޭދަކުރެއެވެ.
ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ ޤައުމުތަކުގެ ލިސްޓަށްވެސް މިއަހަރު މިވަނީ ބޮޑެތި ބަދަލުތައް އައިސްފައެވެ. މިދިޔަ އަހަރު ނިމުނުއިރު ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ ޤައުމެއްގެ ގޮތުގައި އޮތީ އިންޑިއާއެވެ. ނަމަވެސް ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިހާރު ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަނީ ރަޝިއާއިންނެެވެ. އަދި ދެވަނައަށް އެންމެ ގިނަ އަދަދަކަށް ފަތުރުވެރިން އަންނަ ޤައުމަކަށް އިންޑިއާވެފައިވާއިރު، ރާއްޖެއަށް މިހާރު ތިންވަނަ އަށް އެންމެ ގިނަ އަދަދަކަށް ފަތުރުވެރިން އަންނަނީ އިޓަލީއިންނެވެ.