ޕެރޫގެ ހުޅަނގުއުތުރުގައިވާ ރަށެއްގައި ދަތުރުކުރަމުންދިޔަ ބަހެއް އެކްސިޑެންޓުވެ، އޭގައި ދަތުރުކުރި 24 މީހުން މަރުވެއްޖެއެވެ. މި ހާދިސާ ހިނގާފައި ވަނީ ޕިޔުރާ ޕުރޮވިންސުގެ ރަށެއް ކަމުގައިވާ އޮރްގަނޯސް ކައިރިންނެވެ. ބަސް އެކްސިޑެންޓުވެފައި ވަނީ، ފަރުބަދަމަތީ ހިސާބެއްގައިވާ މަގަކުން ދަތުރުކުރަނިކޮށް، ކޮންޓްރޯލް ނުކުރެވި، މަގުން ބޭރަށް ވެއްޓިގެންނެވެ.
މި ހާދިސާ ހިނގި ވަގުތު ބަހުގައި 60 ފަސިންޖަރުން ތިބި ކަމުގައި ޕެރޫގެ އޮފިޝަލުން ވިދާޅުވެއެވެ. އަދި، މަރުވި މީހުންގެ ތެރޭގައި ހެއިޓީގެ ރައްޔިތުންތަކެއް ވެސް ހިމެނޭ ކަމުގައި ފުލުހުން ބުންޏެވެ. ނަމަވެސް، އެއީ ކިތައް މީހުން ކަން އަދި ސާފުކޮށްދީފައެއް ނުވެއެވެ.
ބަސް އެކްސިޑެންޓުވެފައި ވަނީ ވެރިރަށް ލީމާއިން ފުރައިގެން އެކުއެޑޯގެ ސަރަޙައްދީ ރޮނގު ކައިރީގައި އޮންނަ ޓުމްބޭސް ކިޔާ ރަށަކަށް ދަތުރުކުރި މަގުމަތީގައެވެ. މި ހާދިސާ ހިނގާފައި ވަނީ، މި ފަދަ އެކްސިޑެންޓުތައް ޢާންމު، އަދި ދުއްވަން ދަތި ހިސާބެއް ކަމުގައިވާ "ޑެވިލްސް ކަރވް" ކިޔާ ހިސާބެއްގައި ކަމުގައި ފުލުހުން ބުންޏެވެ. ނަމަވެސް، އެކްސިޑެންޓު ހިނގަން މެދުވެރިވި ސަބަބު އަދި ސާފުކޮށްދީފައެއް ނުވެއެވެ.
މި ހާދިސާގައި ބަހުގައި ދަތުރުކުރި ގިނަ ޢަދަދެއްގެ ބަޔަކަށް އަނިޔާވެ، އެ ސަރަޙައްދުގައިވާ އެލް އާލްޓޯއާއި މަންކޯރާގެ ހޮސްޕިޓަލުތަކަށް ގެންގޮސް ފަރުވާދޭން ފަށާފައިވެއެވެ. ނަމަވެސް، އަނިޔާވި މީހުންގެ ޢަދަދު ފުލުހުން އަދި ހާމަކޮށްފައެއް ނުވެއެވެ. ޕެރޫގައި ހެއިޓީއިން ހިޖުރަކޮށްފައިވާ ގިނަ ޢަދަދެއްގެ ބަޔަކު ދިރިއުޅެއެވެ.