ބާރުގަދަ ތޫފާން ޗެނީސޯ މަޑަގަސްކަރައިގެ ސަރަޙައްދުތަކަށް އެރުމުގެ ސަބަބުން ކުރިމަތިވި އެކި ހާދިސާތަކުގައި 25 އަށްވުރެ ގިނަ މީހުން މަރުވެއްޖެއެވެ. މި ތޫފާން މަޑަގަސްކަރައިގެ އިރުއުތުރު އައްސޭރިފަށުގެ ސަރަޙައްދުތަކަށް އަރާފައި ވަނީ މީގެ 10 ވަރަކަށް ދުވަސް ކުރިންނެވެ. މި ތޫފާނާ އެކު ކުރިމަތިވި އެކި ހާދިސާތަކުގައި އެތަކެއް ހާސް ބަޔަކު ވަނީ ގެދޮރު ނެތިފައެވެ.
މި ތޫފާނާ އެކު މަޑަގަސްކަރައިގެ ހުޅަނގު އައްސޭރިފަށުގެ ސަރަޙައްދުތަކަށް ގިނަ ދުވަސްތަކެއް ވަންދެން ހުއްޓުމެއް ނެތި ވާރޭވެހުނެވެ. އަދި، ގިނަ ސަރަޙައްދުތަކެއްގައި ވަނީ ފެންބޮޑުވެފައެވެ. މި ތޫފާނާ އެކު ޖެހުނު ބާރު ވައިގައި ވެސް ގިނަ ޢަދަދެއްގެ ގެދޮރަށް ގެއްލުން ލިބުނެވެ.
ހުސްވި ހަފުތާ ބަންދުގެ ތެރޭގައި ތޫފާން ޗެނީސޯ ވަނީ އެ ޤައުމުގެ އިރުދެކުނުގެ ސަރަޙައްދުތަކަށް ދަތުރުކޮށް، ބޮޑެތި ގެއްލުންތަކެއް ދީފައެވެ. ގެދޮރުގެ އިތުރުން ސްކޫލްތަކަށް ވެސް ވަނީ ގެއްލުންވެފައެވެ. އަދި، ގިނަ ޢަދަދެއްގެ މަގުތައް ހަލާކުވުމުގެ ސަބަބުން ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތްތަކަށް ވަނީ ހުރަސްއެޅިފައެވެ.
މި ތުފާނާ ގުޅިގެން ގެއްލިފައިވާ ކަމަށް ބެލެވޭ 21 މީހަކު ހޯދުމަށް މަސައްކަތް ކުރަމުންދާއިރު، މި ތޫފާނުގެ ސަބަބުން ގެއްލުން ލިބުނު މީހުންގެ އަދަދު 83,000 އަށްވުރެ މައްޗަށް އަރައެވެ. އަދި، 38,000 އަށްވުރެ ގިނަ މީހުންގެ ގެދޮރަށް ގެއްލުންވެ، އެ މީހުން ވަނީ ހާލުގައި ޖެހިފައެވެ.
ތޫފާން ޗެނީސޯއާ އެކު ގަޑިއަކު 166 ކިލޯމީޓަރުގެ ބާރުމިނުގައި ވައިޖެހެމުންދާ ކަމުގައި ހުޅަނގުދެކުނު އިންޑިޔާ ކަނޑުގެ މޫސުމާ ބެހޭ އިދާރާއިން ބުނެއެވެ. މިއީ، މި އަހަރުގެ ތެރޭގައި ދެކުނު އެފްރިކާގެ ސަރަޙައްދުގައި އުފެދިފައިވާ ފުރަތަމަ ތޫފާނެވެ. ނޮވެންބަރު މަހާއި އޭޕްރިލް މަހާ ދެމެދު މަޑަގަސްކަރައަށް ގިނަ ޢަދަދެއްގެ ތޫފާންތަކަކާ ކުރިމަތިލާން ޖެހެއެވެ.