މިދިޔަ އަހަރުގެ ފަހު ކުއާޓަރުގައި އެމްޓީސީސީން 8 މަޝްރޫޢެއް ނިންމައި، 15 މަޝްރޫޢެއް ފަށާފައިވާކަމަށް އެ ކުންފުނިން ހާމަކޮށްފިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީން އާއްމުކޮށްފައިވާ އެކުންފުނީގެ މިދިޔަ އަހަރުގެ ފަހު ކުއާޓަރގެ މާލީ ރިޕޯޓު ދައްކާގޮތުން ނިމުނު 4 ވަނަ ކުއާޓަރުގައި އެމް.ޓީ.ސީ.ސީން ވަނީ 125 މަޝްރޫޢެއްގެ މަސައްކަތް ކުރިއަށް ގެންގޮސްފައެވެ.
ފަހު ކުއާޓަރުގައި ކުރިއަށްގެންދިޔަ މަޝްރޫޢުތައް:
■ ބަނދަރު ހެދުން : 46 މަޝްރޫޢު
■ ބިން ހިއްކުން : 14 މަޝްރޫޢު
■ ގޮނޑުދޮށް ޙިމާޔަތްކުރުން : 29 މަޝްރޫޢު
■ އެއަރޕޯޓް ތަރައްޤީކުރުން : 5 މަޝްރޫޢު
އެމްޓީސީސީން ވަނީ 8 މަޝްރޫޢެއްގެ މަސައްކަތް މިދިޔަ އަހަރުގެ 4 ވަނަ ކުއާޓަރގެ ތެރޭގައި ކާމިޔާބުކަމާއެކު ނިންމާލާފައެވެ.
މި މަޝްރޫޢުތަކުގެ ތެރޭގައި ހއ. ހޯރަފުށީ އަދި ހދ. ނެއްލައިދޫ ގޮނޑުދޮށް ޙިމާޔަތްކުރުމުގެ މަޝްރޫޢާއި، ނަކައްޗާ ހުރާ ފަޅު ހިއްކުމުގެ މަސައްކަތާއި، ގއ. ދާންދޫ ބިން ހިއްކުމާއި، ގޮނޑުދޮށް ޙިމާޔަތްކުރުމުގެ މަސައްކަތް ހިމެނެއެވެ.
އެމް.ޓީ.ސީ.ސީގެ މާލީ ހިސާބުތައް ދައްކާގޮތުން، ނިމުނު ކުއާޓަރުގައި އެމް.ޓީ.ސީ.ސީއަށް ލިބުނު އާމްދަނީ އޭގެކުރީ ކުއާޓަރާއި އަޅާބަލާއިރުވަނީ %24 އިތުރުވެފައެވެ. 4 ވަނަ ކުއާޓަރުގައި، އެމް.ޓީ.ސީ.ސީއަށް 741 މިލިއަން ރުފިޔާގެ އާމްދަނީއެއް ލިބިފައިވެއެވެ.
މިއީ މިދިޔަ އަހަރުގެ 3 ވަނަ ކުއާޓަރުގައި އެކުންފުންޏަށް އާމްދަނީގެ ގޮތުގައި ލިބުނު 593 މިލިއަން ރުފިޔާއާއި އަޅާބަލާއިރު %24 އިތުރު އަދަދެކެވެ.
މިދިޔަ އަހަރުގެ 4 ވަނަ ކުއާޓަރުގައި އެމް.ޓީ.ސީ.ސީއަށް ލިބުނު އާމްދަނީ އިތުރުވެފައިވީނަމަވެސް، ޓެކްސްއަށް ކެނޑުމުގެ ފަހުން ސާފު ފައިދާގެ ގޮތުގައި އެކުންފުންޏަށް ލިބުނު އާމްދަނީ ވަނީ މިދިޔަ އަހަރުގެ 3 ވަނަ ކުއާޓަރަށްވުރެ ދަށްވެފައެވެ. އެގޮތުން، މިދިޔަ އަހަރުގެ 4 ވަނަ ކުއާޓަރުގައި ސާފު ފައިދާގެ ގޮތުގައި، 30.2 މިލިއަން ރުފިޔާ އެމް.ޓީ.ސީ.ސީއަށް ލިބިފައިވެއެވެ. މިދިޔަ އަހަރުގެ 3 ވަނަ ކުއާޓަރުގައި އެކުންފުންޏަށް ސާފު ފައިދާގެ ގޮތުގައި ލިބިފައިވަނީ 40.5 މިލިއަން ރުފިޔާއެވެ.