މިދިޔަ އަހަރުގެ ފަހު ކުއާޓަރުގައި ދިރާގަށް 698 މިލިއަން ރުފިޔާގެ އާމްދަނީއެއް ލިބިއްޖެއެވެ. މިއީ މިއަހަރުގެ ތިންވަނަ ކުއާޓަރުގައި ދިރާގަށް އާމްދަނީގެ ގޮތުގައި ލިބުނު 627 މިލިއަން ރުފިޔާއާ އަޅާ ބަލާއިރު، 11 އިންސައްތަ އިތުރު ޢަދަދެކެވެ.
ދިރާގުން އާމްދަނީ ހޯދަނީ މައިގަނޑު 2 ދާއިރާއަކުންނެވެ. އެއީ މޯބައިލް ޚިދުމަތްތަކާއި ފިކްސްޑް ލައިން، ބްރޯޑް ބޭންޑް އިންޓަނެޓާއި އެންޓަޕްރައިޒް ވިޔަފާރިތައް މެދުވެރިކޮށެވެ. ދިރާގުން ޢާއްމުކޮށްފައިވާ މިދިޔަ އަހރުގެ 4ވަނަ ކުއާޓަރުގެ މާލީ ރިޕޯޓުގައިވާގޮތުން މޯބައިލް ޚިދުމަތްތަކުންވަނީ 350 މިލިއަން ރުފިޔާގެ ޢާމްދަނީއެއް ލިބިފައެވެ. މިދިޔަ އަހަރުގެ ތިންވަނަ ކުއާޓަރުގައި މޯބައިލް ޚިދުމަތްތަކުން ލިބިފައިވަނީ 316 މިލިއަން ރުފިޔާއެވެ.
ފިކްސް ބްރޯޑްބޭންޑު ޚިދުމަތުން ލިބުނު އާމްދަނީއަށްވެސް 4 ވަނަ ކުއާޓަރގައިވަނީ ކުރިއެރުން ލިބިފައެވެ. ތަފާސްހިސާބުތައް ދައްކާގޮތުން 4 ވަނަ ކުއާޓަރުގައި ފިކްސްޑު ބްރޯޑްބޭންޑު ޚިދުމަތްތަކުން 330 މިލިއަން ރުފިޔާ ލިބިފައިވެއެވެ. ތިންވަނަ ކުއާޓަރުގައި ފިކްސް ބްރޯޑްބޭންޑް އާމްދަނީގެ ގޮތުގައި ދިރާގަށް ލިބިފައިވަނީ 291 މިލިއަން ރުފިޔާއެވެ.
4ވަނަ ކުއާޓަރުގައި ކުންފުނީގެ ހިންގުމުގެ ޚަރަދު ހުރީ 298 މިލިއަން ރުފިޔާގައެވެ. އަދި ޓެކުހަށް ކެނޑުމަށްފަހު ފައިދާގެ ގޮތުގައި ދިރާގަށްވަނީ 244 މިލިއަން ރުފިޔާ ލިބިފައެވެ. މި ޢަދަދަކީ މިދިޔަ އަހަރުގެ 3 ވަނަ ކުއާޓަރުގައި ފައިދާގެ ގޮތުގައި ލިބުނު 202 މިލިއަން ރުފިޔާއާއި އަޅާ ބަލާއިރު 21 އިންސައްތަ އިތުރު ޢަދަދެކެވެ.
ފައިދާ އިތުރުވެފައިވަނީ 4ވަނަ ކުއާޓަރުގައި ދިރާގަށް ލިބުނު އާމްދަނީ އިތުރުވުމާއި ގުޅިގެންކަމަށް މާލީ ރިޕޯޓުގައި ފާހަގަކޮށްފައިވެއެވެ.