ދިވެހިރާއްޖޭގައި ޗާރޓަރޑް ޕްރޮފެޝަނަލް އެކައުންޓެންޓުން ތަމްރީން ކުރުމަށް 200 ސްކޮލަރޝިޕް ފުރުޞަތު ހުޅުވާލައިފިއެވެ. މިނިސްޓްރީ އޮފް ހަޔަރ އެޑިޔުކޭޝަނުން ހުޅުވާލި މި 200 ސްކޮލަރޝިޕަކީވެސް ސަރުކާރުން ޚަރަދުކުރާ ގޮތަށް ދެވޭ ސްކޮލަރޝިޕްތަކެކެވެ.
ޗާރޓަރޑް ޕްރޮފެޝަނަލް އެކައުންޓެންޓުން ތަމްރީން ކުރުމަށް ސްކޮލަރޝިޕް ސްކީމް ހުޅުވާލާފައިވަނީ ދެ ކެޓެގަރީއަކުންނެވެ. އެއީ ޕަބްލިކް ސެކްޓަރއަށް ހުޅުވާލާ 50 ޖާގައަށާއި، އޯޕަން ކެޓެގަރީއަށް ހުޅުވާލާ 150 ޖާގައަށެވެ. މި ސްކޮލަރޝިޕް ސްކީމް ޚާއްސަކޮށްފައިވަނީ އެސޯސިއޭޝަން އޮފް ޗާރޓަރޑް ސެޓިފައިޑް އެކައުންޓެންޓްސް (ACCA) އަދި ޗާރޓަރޑް އިންސްޓިޓިއުޓް އޮފް މެނޭޖްމަންޓް އެކައުންޓެންޓްސް (CIMA) މި ދެ ދާއިރާއަށެވެ.
އެގޮތުން ACCA ގެ ސްކިލްސް ލެވެލް އަދި ޕްރޮފެޝަނަލް ލެވެލްގެ ކޯސްތަކަށާއި، CIMA ގެ މެނޭޖްމަންޓް ލެވެލް އަދި ސްޓްރެޓީޖިކް ލެވެލްގެ ކޯސްތައް ކިޔެވުމުގެ ފުރުޞަތު ޝަރުތު ހަމަވާ ފަރާތްތަކަށް ލިބިގެންދާނެއެވެ.
މި ސްކީމާގުޅޭގޮތުން ހަޔަރ އެޑިޔުކޭޝަން މިނިސްޓަރ ޑރ. އިބްރާހީމް ޙަސަން ވިދާޅުވީ، ވީހާވެސް ގިނަ ޒުވާނުން މި ފުރުޞަތުގެ ބޭނުން ހިއްޕަވާނެކަމަށް އުއްމީދުކުރައްވާކަމަށެވެ. އަދި މިއީ ފަންނީ ހުނަރުވެރި ދިވެހި ޒުވާނުން ބިނާކުރުމަށް ސަރުކާރުން ކުރަމުންދާ މަސައްކަތުގައި ހިމެނޭ މުހިއްމު ބައެއްކަން މިނިސްޓަރ ފާހަގަކުރެއްވިއެވެ.
"ވަކިން ޚާއްސަކޮށް މި ދާއިރާގައި ވަޒީފާ އަދާކޮށް މަސައްކަތްކުރަމުންދާ ޒުވާނުންނާއި، މި ދާއިރާއިން ތަޢުލީމު ޙާޞިލުކުރުމަށް ބޭނުންވެފައިތިބި ޒުވާނުން މިކަމަށް ކުރިމަތިލައްވާނެކަމަށް އަޅުގަނޑު އުއްމީދުކުރަން" މިނިސްޓަރ ވިދާޅުވިއެވެ.
އެކައުންޓިންގެ ދާއިރާގައި ފަންނީ މަސައްކަތް ކުރުމުގެ ފުރުޞަތު ދިވެހީންނަށް ހޯދައިދިނުމުގެ ގޮތުން ސަރުކާރުގެ ޚަރަދުގައި ޗާރޓަރޑް ޕްރޮފެޝަނަލް އެކައުންޓަންޓުން ތަމްރީނުކުރުމުގެ ސްކޮލަރޝިޕް މިނިސްޓްރީ އޮފް ހަޔަރ އެޑިޔުކޭޝަނުން މިއަދު އިއުލާންކޮށްފި.https://t.co/id7iWMg216 pic.twitter.com/Y03QE3tgS0
— Ministry of Higher Education (@MoHEmv) February 2, 2023
ސްކޮލަރޝިޕްގެ ތެރެއިން ސަރުކާރުން ކަވަރކޮށްދޭނެ ޚަރަދުތައް:
- ރަޖިސްޓްރީކުރުމުގެ ފީ / ރީ-ރަޖިސްޓްރޭޝަން ފީ
- އެނުއަލް ސަބްސްކްރިޕްޝަން ފީ
- އެގްޒެމްޝަން ލިބޭ ފަރާތްތަކަށް އެގްޒެމްޝަން ފީ
- އެގްޒާމް ފީ
- އެޕްލިކޭޝަން ފީ
- މެމްބަރޝިޕް ފީ (2 އަހަރު ދުވަހުގެ ތެރޭގައި ދަރިވަރު ނިމޭކަމުގައިވާނަމަ)
- ބުކް އެލަވަންސް
- ރާއްޖޭގައި ރަޖިސްޓްރީކޮށްގެން ހިންގާ ކޮލެޖް ނުވަތަ ޔުނިވަރސިޓީތަކުން ކިޔަވާނަމަ ޓިއުޝަން ފީ
- އަމިއްލައަށް ކިޔަވާ ފަރާތްތަކަށް ޓިއުޝަން ފީ ނުހިމަނައި މަތީގައި ބަޔާންކޮށްފައިވާ ހުރިހާ ޚަރަދު
ހަޔަރ އެޑިޔުކޭޝަން މިނިސްޓްރީން ވިދާޅުވީ، މި ސްކޮލަރޝިޕަށް ކެންޑިޑޭޓުން ހޮވުމުގައި ގިނަ މޮޑިއުލްތައް ނިންމާފައިވާ ފަރާތްތައް ނުވަތަ ކުރިން ފަރުމާކޮށްފައިވާ ކޯހެއްގެ ސަބަބުން ގިނަ މޮޑިއުލްތަކަށް އެގްޒެމްޝަން ލިބޭ ފަރާތްތަކަށް އިސްކަންދެވޭނެކަމަށެވެ. އަދި އެއް ކެންޑިޑޭޓަކަށްވުރެ ގިނަ ކެންޑިޑޭޓުން ޕޮއިންޓުގެ ގޮތުން އެއްވަރުވާނަމަ އެއްވަރުވި ފަރާތްތަކުގެ ތެރެއިން ކެންޑިޑޭޓަކު ހޮވާނީ މެރިޓް އުޞޫލުންކަމަށްވެސް މިނިސްޓްރީން ވިދާޅުވެއެވެ.
މި ސްކޮލަރޝިޕަށް ސިލެކްޓްކުރެވޭ ފަރާތްތައް ބައިވެރިވާ ޕްރޮގްރާމް ފުރިހަމަކުރުމަށް ދެވޭނީ ގިނަ ވެގެން 2 އަހަރު ދުވަހެވެ. އަދި ޕަބްލިކް ކެޓެގަރީއަށް ކަނޑައެޅިފައިވާ ޖާގައަށްވުރެ އިތުރުަށް ޝަރުތުހަމަވާ ފަރާތްތަކުން އެ ކެޓެގަރީއަށް ކުރިމަތިލާފައިވާނަމަ އެ ފަރާތްތަކުގެ އެޕްލިކޭޝަން އޯޕެން ކެޓެގަރީގައި ހިމެނޭނެއެވެ.
ސްޓޫޑެންޓް ލޯނު ސްކީމަކަށް ހޮވިފައިވާ ކެންޑިޑޭޓުން ލޯނު އެގްރީމެންޓުގައި ސޮއިނުކުރާނަމަ މި ސްކޮލަރޝިޕް ފުރުޞަތަށް އެޕްލިކޭޝަން ހުށަހެޅޭނެކަމަށާއި، ސްކޮލަރޝިޕަށް ނޮމިނޭޓްވެއްޖެނަމަ ލޯނުގެ ފުރުޞަތު ދޫކޮށްލަންޖެހޭނެކަމަށް ހަޔަރ އެޑިޔުކޭޝަން މިނިސްޓްރީން ވިދާޅުވެއެވެ.
އެކައުންޓިންގ ދާއިރާއިން ކުރިއަށްދާން ބޭނުންވާ ޒުވާނުންނަށް ޚާއްސަކޮށްގެން ހުޅުވާލި މި ސްކޮލަރޝިޕް ސްކީމަށް ޝަޢުގުވެރިވާ ފަރާތްތަކުން މިމަހުގެ 26 ވާ އާދިއްތަ ދުވަހުގެ ނިޔަލަށް އެޕްލިކޭޝަން ހުށަހެޅުމަށް މިހާރު ވަނީ ފުރުޞަތު ހުޅުވާލާފައެވެ. އެޕްލިކޭޝަން ހުށަހަޅަންޖެހޭނީ އެކަމަށްޓަކާ މިނިސްޓްރީން ޤާއިމުކޮށްފައިވާ https://myedu.egov.mv/ މެދުވެރިކޮށެވެ.