މާލެ ސަރަޙައްދުގެ ރައްޔިތުން ދަތުރު ދިޔުމަށް ތަރައްޤީކުރާ ކުޑަގިރި ޕިކްނިކް އައިލެންޑްގެ މަޢުލޫމާތު އެނގޭނެ މޯބައިލް އެޕްލިކޭޝަނެއް ތަޢާރްފްކޮށްފިއެވެ. އެޕް ސްޓޯރުންނާއި، ޕްލޭ ސްޓޯރުން މި އެޕްލިކޭޝަން މިހާރު ޑައުންލޯޑްކުރެވޭނެއެވެ.
މާލެ ސަރަޙައްދުގެ ރައްޔިތުން ދަތުރު ދިޔުމަށް ތަރައްޤީކުރި ކުޑަގިރި މިމަހުގެ 11 ވަނަ ދުވަހު ރަސްމީކޮށް ހުޅުވަން ސަރުކާރުން ވަނީ ނިންމާފައެވެ.
ކުޑަގިރި ޕިކްނިކް އައިލަންޑް ހުޅުވުމުގެ އެންމެ ފަހުގެ ތައްޔާރީތައް ކުރަމުންއަންނަ އިރު އެޗްޑީސީން މިވަނީ ކުޑަގިރިއަށް ޚާއްސަ އެޕްލިކޭޝަނެއް ތަޢާރަފްކޮށްފައެވެ. އެޗްޑީސީން ވިދާޅުވީ ކުޑަގިރި އެޕްލިކޭޝަން ޑައުންލޯޑް ކޮށްގެން، އެ ރަށާ ގުޅޭ އެންމެ ފަހުގެ މައުލޫމާތާއި ޚިދުމަތްތައް ބަލާލެވޭނެކަމަށެވެ.
މި އެޕްލިކޭޝަނަކީ ކުޑަގިރީގެ ޚިދުމަތްތައް ވީހާ ވެސް ލުއިފަސޭހަ ގޮތަކަށް ޢާންމުނަށް ދިނުމަށް ތައްޔާރުކޮށްފައިވާ އެޕްލިކޭޝަނެއް ކަމަށްވެސް އެ ކުންފުނިން ވިދާޅުވިއެވެ. މި އެޕްލިކޭޝަން މެދުވެރިކޮށް ބުކިންއަށް އަދި ހުޅުވާލާފައި ނުވިޔަސް، އެޕްލިކޭޝަންގައި ރަޖިސްޓާކުރުމުން ކުޑަގިރިއާ ބެހޭ ވަރަށް ގިނަ މައުލޫމާތު ލިބޭނެ ކަމަށް އެޗްޑީސީން ވިދާޅުވެއެވެ. މިގޮތުން އެތަނުން ލިބޭނެ ޚިދުމަތްތަކާއި ބުކް ކުރެވޭނެ އަގުތަކާއި ޤަވައިދުތަކާއި އުޞޫލްތައް ފެންނަން ހުންނާނެއެވެ. އެޗްޑީސީން ވިދާޅުވީ އެޕްލިކޭޝަނުގެ ޒަރިއްޔާއިން ބުކިންނަށް ހުޅުވާލުމުން ނޮޓިފިކޭޝަން އަންނާނެކަމަށާއި، ވަރައަވަހަށް ބުކިން ހެއްދުމަށްވެސް ހުޅުވާލާނެކަމަށެވެ.
Download, register and get ready!
— Kudagiri Picnic Island (@KudagiriMv) February 3, 2023
Install our new Kudagiri Picnic Island App on your phones and stay tuned for the latest updates. We can’t wait to welcome you. #Aadhey #Kudagiri #Urbangetaway pic.twitter.com/FXlBzuNZIm
މާލޭގެ ރައްޔިތުން ދަތުރުދިއުމަށް އޭރު ބޭނުންކުރި ކުޑަ ބަނޑޮހަށްވުރެ ފުރިހަމަ، އަދި ރަނގަޅު ޚިދުމަތް ލިބޭނެ ޕިކްނިކް އައިލެންޑެއް ތަރައްޤީކޮށްދިނުމަކީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ ވަޢުދުފުޅެކެވެ. މިވަޢުދު ފުރިހަމަ ކުރުމަށް މާލެ ކައިރީ ކުޑަގިރި ފަޅު ހިއްކާ، މާލޭގެ ރައްޔިތުން ދަތުރުދިއުމަށް ރަށެއް ހެދުމުގެ މަސައްކަތް ފެށީ 2021ވަނަ އަހަރު ނޮވެމްބަރު މަހުއެވެ. ޕްރޮޖެކްޓަށް އަހަރެއްވެ ދިޔައިރު ހިއްކި ބިން، ހިތްގައިމު ރަށަކަށް ބަދަލުކޮށްލައިފިއެވެ.
8 ހެކްޓަރުގެ ބިން ހިއްކައިގެން ތަރައްޤީކުރި ކުޑަގިރިއަކީ، ދަތުރުގޮސް އުޅޭއިރު ބޭނުންވާނެ ހުރިހާ ޚިދުމަތެއް ޤާއިމުކޮށް ހުޅުވާ ފުރަތަމަ އާޓިފިޝަލް ޕިކްނިކް އައިލެންޑެވެ. ގުދުރަތީގޮތުން ރާއްޖޭގެ ބައެއް ސަރަޙައްދުތަކުގައި އޮންނަ ފަދަ ފިނޮޅެއް މިރަށުގައިވަނީ ތަރައްޤީކޮށްފައެވެ. އެގޮތުން 1.5 ހެކްޓަރުގެ ފިނޮޅެއްވަނީ ތަރައްޤީކޮށް ދަތުރުދާ މީހުން މޫދަށް އެރިލާނެ ފަދަ ހިތްގައިމު ސަރަޙައްދުތަކެއްވެސްވަނީ ތަރައްޤީކޮށްފައެވެ.
ރާއްޖޭގެ ރަށްތައް ފަދައިން ޖަޒީރާ ވަންތަން ކޮންސެޕްޓަކަށް ތަރައްޤީކޮށްފައިވާ މިރަށުގައި ދަތުރުދާ ހުރިހާ ޢުމުރުގެ މީހުންނަށް ބޭނުންވާނެ ޚިދުމަތްތައް ލިބޭނެ އިންތިޒާމު ކުޑަގިރީގައިވަނީ ޤާއިމުކޮށްފައެވެ. އެގޮތުން ރަށް ބަލަހައްޓާ އޮފީހަކާއި، މިސްކިތާއި، ފާޚާނާ ބަރި، ކެފޭ، ފިހާރަ، ހަޓުތަކާއި އަދި ކުޅިވަރު ކުޅެވޭނެ ގިނަ ވަސީލަތްތަކުގެ އިތުރުން ކައްކައި ކެވޭނެ ސަރަޙައްދުވެސްވަނީ ހަދާފައެވެ.