ސިނަމާލޭ ބްރިޖު ހައިވޭގައި އިއްޔެ ހިނގި ނުރައްކާތެރި އެކްސިޑެންޓްގައި ޒަޙަމްވި މީހާއަށް ފަރުވާދެމުންދަނީ ވެންޓިލޭޓަރުގައިކަމަށް އައި.ޖީ.އެމް.އެޗްއިން ވިދާޅުވެއްޖެއެވެ.
އިއްޔެ ހަވިރު ސިނާމާލެ ބްރިޖުގެ ހައިވޭގައި ހިނގި އެކްސިޑެންޓެއްގައި ޒަޙަމްވެފައިވަނީ ފިރިހެނަކަށެވެ. އަދި އެކްސިޑެންޓް ހިނގިތަނާހެން ފަރުވާދިނުމަށް އެމީހާ ވަނީ އައި.ޖީ.އެމް.އެޗްއަށް ގެންގޮސްފައެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން އައި.ޖީ.އެމް.އެޗްއިން ވިދާޅުވީ، އަނިޔާ ލިބުނު މީހާގެ ހާލު ސީރިއަސް ކަމަށާއި އެމީހާ މިވަގުތު އޮތީ އައި.ސީ.ޔޫގައި ވެންޓިލޭޓަރުގައިކަމަށެވެ.
މި ޙާދިސާއާއި ގުޅިގެން އެކްސިޑެންޓުވި ކާރާއި ސައިކަލަށްވެސް ބޮޑެތި ގެއްލުންތަކެއް ލިބިފައިވެއެވެ.
ސިނާމާލެ ބްރިޖްއާއި ހައިވޭގައިވެސް މީގެ ކުރިން ވަނީ އެކި ވަރުގެ އެކްސިޑެންޓްތައް ހިނގާފައެވެ. އެގޮތުން މިދިޔަ ޑިސެމްބަރުމަހުގެ ތެރޭގައި ބްރިޖްގައި ހިނގި ނުރައްކާތެރި އެކްސިޑެންޓެއްގައި ދިވެއްސަކު ވަނީ ނިޔާވެފައެވެ.