ފަޤީރުންނާއި މިސްކީނުންގެ ދަފްތަރަށް ޝަކުވާ ހުށަހެޅުމުގެ ފުރުޞަތު އިސްލާމިކް މިނިސްޓްރީން ހުޅުވާލައިފިއެވެ.
އިސްލާމިކް މިނިސްޓްރީން ވިދާޅުވީ ފަޤީރުންނާއި މިސްކީނުންގެ ދަފްތަރުގައި ރަޖިސްޓްރީވުމަށް އެދި މާލެއާއި ހުޅުމާލެއާއި ވިލިމާލޭގައި ދިރިއުޅޭ ފަރާތްތަކަށް މިދިޔަ ޑިސެމްބަރު މަހުގެ 19ގެ ނިޔަލަށް ހުށައަޅާފައިވާ ފޯމްތަކުގެ ޖަވާބު ދީފައިވާކަމަށެވެ. އެހެންކަމުން ދަފްތަރުގައި ހިމެނިފައިނުވާ ފަރާތްތަކުން ޝަކުވާ ހުށަހަޅަން އެދޭނަމަ މިނިސްޓްރީއަށް ގޮސް ނުވަތަ އީމެއިލް މެދުވެރިކޮށް ޝަކުވާ ހުށަހެެޅުމަށް ވަނީ ހުޅުވާލާފައެވެ.
ޝަކުވާ ހުށައެޅުމުގެ އެންމެ ފަހު ދުވަހަކީ މިމަހުގެ 16 ވަނަ ދުވަސް ކަމަށާއި، އެއަށްފަހު ހުށަހަޅާ ޝަކުވާއެއް ބަލައި ނުގަންނާނެކަމަށްވެސް މިނިސްޓްރީން ވިދާޅުވެއެވެ.
އިސްލާމިކް މިނިސްޓްރީން އަންނަނީ ކޮންމެ އަހަރެއްގެވެސް ފަޤީރުންނާއި މިސްކީނުންގެ ދަފްތަރުގައި ރަޖިސްޓްރީވުމުގެ ފުރުޞަތު ހުޅުވާލާ، އެކަމަށް ޝަކުވާ ހުށައެޅުމުގެ ފުރުޞަތުވެސް ހުޅުވާލަމުނެވެ. މި ލިސްޓަކީ ޒަކާތުގެ ގޮތުގައި ލިބޭ ފައިސާ އޭގެ ޙައްޤުވެރިންނަށް ފަސޭހައިން ފޯރުކޮށްދިނުމާ އެކިގޮތްގޮތުން އެހީތެރިކަން ފޯރުކޮށްދިނުމަށް އެކުލަވާލާ ލިސްޓެކެވެ.
2023 ވަނަ އަހަރުގެ ފަގީރުންގެ ދަފްތަރުގައި ރަޖިސްޓްރީވުމަށް 2012 ފަރާތަކުން ފޯމް ހުށަހަޅާފައިވެއެވެ. އެހެންނަމަވެސް ފަގީރުންނާއި މިސްކީނުންގެ ފައިނަލް ލިސްޓް ކަށަވަރުވާނީ ޝަކުވާ ހުށަޙަޅަން ދެވިފައިވާ މުއްދަތުގައި ހުށަހަޅާ ޝަކުވާތަކަށް ބެލުމަށްފަހުއެވެ.
1442 އަހަރުގެ މާލެ ސިޓީގެ ފަޤީރުންނާއި މިސްކީނުންގެ ދަފްތަރުގައި ޖުމުލަ 1520 ފަރާތަކުން ވަނީ ރަޖިސްޓްރީކޮށްފައެވެ.