އަންހެނުން އިތުރަށް ބާރުވެރިކުރުމަށް މިހާރަށްވުރެ ބޮޑަށް ފުރުސަތުތައް ހޯދައިދިނުމަށް ދިރާސާއެއް ކުރަން ފަށައިފިއެވެ.
މި ދިރާސާއަކީ ދިވެހި އަންހެނުންގެ ހައްގުތަކަށް ވަކާލާތުކުރާ އިސް މަދަނީ ޖަމިޢްޔާއެއްކަމުގައިވާ ވިމެން އެންޑް ޑިމޮކްރަސީއާއި ވިމެން އޮން ބޯޑްސް ގުޅިގެން ކުރިއަށްގެންދާ ދިރާސާއަކެވެ. އަދި މި ދިރާސާ ކުރިއަށް ގެންދަނީ ނޭޝަނަލް ޑިމޮކްރަޓިކް އިންސްޓިޓޫޓްގެ މާލީ އެހީތެރިކަމާއެކުގައެވެ.
ވިމެން އެންޑް ޑިމޮކްރަސީ ޖަމިޢްޔާއިން މައުލޫމާތުދިން ގޮތުގައި މިދިރާސާގައި މައިގަނޑު ގޮތެއްގައި ދައުލަތުގެ 5 އަހަރުގެ ސްޓްރެޓީޖިކް އެކްޝަލް ޕްލޭންގައި ހުރި ކަންކަން ތަންފީޒު ކުރެވިފައިވާ މިންވަރު ނިސްބަތުން ދެނެގަތުމުގެ މަށްޗަށަށް ބަލާނެކަމަށެވެ. އެގޮތުން ތަންފީޒީ މަގާމުތަކުގައި ތިބޭ އަންހެނުންގެ އަދަދު އިތުރުކުރުމާއި އަންހެނުންގެ ތަރައްގީއަށް މަސައްކަތް ކުރާ ޖަމިއްޔާތައް ބާރުވެރި ކުރުމުގެ މައްޗަށް ބަާލާނެއެވެ. އަދި އަންހެނުންގެ އިގްތިސާދީ ބާރުވެރިކަން ކަށަވަރުކުރުމަށާއި އަންހެން ވިޔަފާރިވެރިންނަށް ފައިސާ ލިބޭނެ ފަހި ގޮތްތައް އިންތިޒާމް ކޮށްދިނުމަށްވެސް މި ދިރާސާގައި ބެލުމަށް ހަމަޖެހިފައިވެއެވެ.
އެ ޖަމްޢިއްޔާއިން ބުނީ މި ދިރާސާގައި ސަރުކާރުގެ 14 އިދާރާއަކުން މައުލޫމާތު އެއްކޮށް އެމައުލޫމާތުގެ މަށްޗަށް ތަފާސްހިބުތައް އަންދާޒާ ކުރާނެކަމަށެވެ. މީގެތެރޭގައި ރައީސް އޮފީހުން ފެށިގެން އެކި މިނިސްތްރީތަކާއި ކޯޓުތަކާއި ލޯކަލް ގަވަރމަންޓް އޮތޯރިޓީފަދަ ތަންތަން ހިމެނެއެވެ.
މިދިރާސާގެ ނަތީޖާ އަންނަ އޭޕްރީލް މަހުގެ ތެރޭގައި ސަރުކާރުގެ ކަމާބެހޭ މުއައްސަސާތަކާއި ޕްރައިވެޓް ސެކްޓަރ އަދި މަދަނީ ޖަމިޢްޔާތަކާއި ހިއްސާކުރުމަށް ވަނީ ހަމަޖެހިފައެވެ.
ދިވެހި މުޖްތަމައުގައި އަންހެނުންގެ ހައިސިއްޔަތު އެހާރާއި މިހާރަށް ބަލާއިރު އެތައްތަނެއް ވަނީ ކުރިއަރާފައެވެ. ވަޒީފާގެ މައުހައުލުގައާއި އެނޫން ތަންތާގައި އަންހެނުންގެ ދައުރު ދަނީ ފުޅާވަމުންނެވެ.
2021 ވަނަ އަހަރުގެ ގްލޯބަލް ޖެންޑަރ ގެޕް އިންޑެކްސްއިން ދެއްކި ގޮތުގައި ރާއްޖޭގެ ތަޢުލީމީ ދާއިރާގައި މިންތީ ތަފާތުކުރުން ވަނީ ނައްތާލާފައެވެ. އަދި ޞިއްޙީ ދާއިރާގައި މިންތީ ތަފާތުކުރުމުގެ ނިސްބަތް ވަނީ ކުޑަކޮށްފައެވެ. ނަމަވެސް، ސިޔާސީ އަދި އިޤްތިޞާދީ ދާއިރާއިން ރާއްޖޭގައި މިންތީ ތަފާތުތައް އަދިވެސް ބޮޑުކަމަށް މިރިޕޯޓުން ދައްކައެވެ.