ތުރުކީވިލާތުގެ ދެކުނާއި ސޫރިޔާގެ އުތުރުގެ ސަރަޙައްދުތަކަށް އައި ބާރުގަދަ ބިންހެލުމުގައި މަރުވި މީހުންގެ ޢަދަދު 36,000 އަށް އަރާފައިވާއިރު، ކުރިއަށް އޮތް ދުވަސްތަކުގެ އެ ޢަދަދު ދެގުނައަށް އިތުރުވާނެ ކަމަށް ބެލެވޭ ކަމުގައި އ.ދގެ އެހީއާ ބެހޭ އިދާރާގެ އިސްވެރިޔާ މާޓިން ގްރިފިތްސް ވިދާޅުވެއްޖެއެވެ. ފެބްރުއަރީ 6 ވަނަ ދުވަހު ތުރުކީވިލާތުގެ ގަޒިއެންޓެޕަށް އައި ރިކްޓަރ މިންގަނޑުން 7.8ގެ ބާރުގަދަ ބިންހެލުމުގައި، އެ ދެ ޤައުމަށް ވަނީ ބޮޑެތި ގެއްލުންތަކެއް ލިބިފައެވެ.
ބިންހެލުމުގައި ތުރުކީވިލާތުގައި އެކަނިވެސް 12,000 އަށްވުރެ ގިނަ ޢިމާރާތް ވެއްޓި، ސުންނާފަތިވެފައިވާއިރު، ޢިމާރާތްތަކުގެ ދަށުވި މީހުންގެ ޢަދަދު އެތަކެއް ސަތޭކައަކަށް އަރާނެ ކަމަށް ބެލެވެއެވެ. ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުން ހޯދމަސައްކަތް ހުއްޓުމެއް ނެތި ކުރަމުންދާއިރު، ގިނަ ޢަދަދެއްގެ ބަޔަކު ދިރިތިއްބާ ފެންނާނެ ކަމުގެ އުންމީދު ވަނީ ފަނޑުވެފައެވެ. ޢިމާރާތްތަކުގެ ދަށުން ގިނަ ޢަދަދެއްގެ ހަށިގަނޑުތައް ފެނުނު ނަމަވެސް، ދިރިތިއްބާ ފެންނަ މީހުންގެ ޢަދަދު ވަނީ މަދުވެފައެވެ.
ނަމަވެސް، މަދުމަދުން މީހުން ދަނީ ސަލާމަތް ކުރެވެމުންނެވެ. ބިންހެލުމުގެ 178 ގަޑިއިރު ފަހުން ކުޑަ އަންހެން ކުއްޖަކު ވަނީ ސަލާމަތް ކުރެވިފައެވެ. މިރާއީ ކިޔާ ކުއްޖާ ފެނިފައި ވަނީ، ތުރުކީގެ ދެކުނުގައިވާ އަދްޔަމަންގައި އޭނާ ދިރިއުޅޭ ފުލެޓުގެ ވެއްޓިފައިވާ ކޮންކްރީޓްތަކުގެ ދަށުންނެވެ. އޭނާ މިހާރު ވަނީ ހޮސްޕިޓަލަށް ގެންގޮސް ފަރުވާދޭން ފަށާފައެވެ.
ބިންހެލުމުގައި އެންމެ ބޮޑަށް ގެއްލުން ލިބުނު އެއް ސަރަޙައްދު ކަމުގައިވާ ކަހްރަމަންމަރާސްއިން ހަތް މަހުގެ ތުއްތު ކުއްޖަކާއި އުމުރުން 70 އަހަރުގެ އަންހެނެއް ވެސް ވަނީ ސަލާމަތް ކުރެވިފައެވެ. ހަތް މަހުގެ ހަމްޒާ ފެނުނީ ޙަތޭ ޕުރޮވިންސުންނެވެ. އޭނާ ފެނުނީ ބިންހެލުމަށް ފަހު 140 ގަޑިއިރު ފަހުންނެވެ. އުމުރުން 13 އަހަރުގެ އެސްމާ ސުލްޠާން ސަލާމަތް ކޮށްފައި ވަނީ ގަޒިއެންޓެޕްގެ ޢިމާރާތެއްގެ ދަށުންނެވެ. މީގެ އިތުރުން، ބިންހެލުމުގެ 175 ގަޑިއިރު ފަހުން އުމުރުން ދުވަސްވީ އެހެން އަންހެނެއް ވެސް ވަނީ ސަލާމަތް ކުރެވިފައެވެ.
އ.ދ.ގެ ގްރިފިތްސް ވިދާޅުވީ، ސޫރިޔާގެ ހާލަތު ވަރަށް ބޮޑަށް ގޯސްކަމުގައެވެ. އަދި، އެ ޤައުމުގެ އުތުރުގެ ސަރަޙައްދުތަކުގައި ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމުގައި މުޅި ދުނިޔެ ފޭލުވެފައިވާ ކަމުގައި އޭނާ ވިދާޅުވިއެވެ.
"ސޫރިޔާގެ ހުޅަނގުއުތުރުގައި ހާލުގައި ޖެހިފައިވާ މީހުން ސަލާމަތް ކުރުމުގައި، އެ މީހުންނަށް އިންސާނީ އެހީތެރިކަން ފޯރުކޮށްދިނުމަށް އަޅުގަނޑުމެން މި ވަނީ ފޭލުވެފައި. އެ މީހުން ވަނީ ބާކީކޮށްލެވިފައި. އެ މީހުންނަކަށް އެހީއެއް ނުލިބޭ. އަހަރެންގެ ޒިންމާއަކީ އެކަން ރަނގަޅުކުރުން،" ގްރިފިތްސް ވިދާޅުވިއެވެ.
އެހީގެ ކަންކަމާއި، މީހުން ސަލާމަތްކުރުމުގެ މަސައްކަތް ކުރިއަށްދާ ގޮތް ބައްލަވައިލެއްވުމަށް އޭނާ ވަނީ ތުރުކީވިލާތަށް ވަޑައިގަންނަވާފައެވެ. ތުރުކީއާއި ސޫރިޔާގައި ކާބޯތަކެއްޗަށް ޖެހިފައި 870,000 އަށްވުރެ ގިނަ މީހުން އެބަތިބި ކަމުގައި އ.ދ.އިން ބުނެއެވެ. އަދި، ސޫރިޔާގައި 5.3 މިލިޔަން މީހުން ގެދޮރުގެއްލި، މަގުމަތިވެފައިވާ ކަމުގައި ވެސް އ.ދ.އިން ބުނެއެވެ.
ސޫރިޔާގައި ހާލުގައި ޖެހިފައިވާ މީހުންނަށް އިންސާނީ އެހީ ފޯރުކޮށްދިނުމުގެ މަސައްކަތް އ.ދ.އިން ވަނީ ފަށާފައެވެ. ހުސްވި ހަފުތާގައި އެހީ ހިފައިގެން ދަތުރުކުރި ހަ ލޮރީ ވަނީ ތުރުކީވިލާތާއި ސޫރިޔާ ގުޅޭ ބާބް އަލް-ޙަވާ ސަރަޙައްދީ ރޮނގު ހުރަސްކޮށް ސޫރިޔާއަށް އެތެރެވެފައެވެ. އަދި، ޖަނަވަރީ 12 ވަނަ ދުވަހު، އެހީ ހިފައިގެން އިތުރު 10 ލޮރީ ވަނީ ސޫރިޔާއަށް ދަތުރުކޮށްފައެވެ. އޭގައި ގެންގޮސްފައި ވަނީ، ވަގުތީ ހިޔާ ތައްޔާރުކުރުމަށް ބޭނުންވާ ސާމާނެވެ.
ފެބްރުއަރީ 6 ވަނަ ދުވަހު އައި ބިންހެލުމުގެ އަސަރު 26 މިލިޔަން މީހުންނަށް ކޮށްފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން އަންދާޒާ ކުރެއެވެ. އަދި، ހާލުގައި ޖެހިފައިވާ މީހުންނަށް އިންސާނީ އެހީ ފޯރުކޮށްދިނުމަށް 42.8 މިލިޔަން ޑޮލަރުގެ އެހީ ބޭނުންވާ ކަމުގައި ވެސް އެ ޖަމުޢިއްޔާއިން ބުނެއެވެ.