ހުޅުމާލޭ ފޭސް ދޭއްގައި ޝޮޕިން މޯލް އެއް ތަރައްޤީކުރުމަށް ތައްޔާރުވަމުންދާކަމަށް އެސްޓީއޯއިން ހާމަކޮށްފިއެވެ.
އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވީ، އެތަން ތަރައްޤީކުރުމާއި ގުޅޭ މަސައްކަތްތައް ކުރެވެމުންދާކަމަށެެވެ. އެސްޓީއޯއިން މިހާރުދަނީ މި ޝޮޕިން މޯލް ތަރައްޤީކުރާނެ ބިމެއް ހޯދުމަށް ހައުސިން ޑިވެލޮޕްމަންޓު ކޯރޕަރޭޝަން، އެޗްޑީސީ އާއި އެކު މަޝްވަރާ ކުރަމުންނެވެ.
އާބާދީ އިތުރުވަމުން އަންނަ ހުޅުމާލޭ ދެވަނަ ފިޔަވަހީގައި، އެސްޓީއޯގެ ޝޮޕިން މޯލެއް އެޅުމުގެ މަސައްކަތްކުރައްވާކަމަށް އެސްޓީއޯގެ މެނޭޖިންގ ޑިރެކްޓަރ ވިދާޅުވެފައިމިވަނީ، އެ ސަރަހައްދުން ހެޔޮ އަހެއްގައި ތަކެތި ގަންނަން ނުލިބޭކަމުގެ ކަންބޮޑުވުން ޢާންމު މީހަކު ޓްވިޓާގައި ފާޅުކުރުމާއި ގުޅިގެންނެވެ. އެސްޓީއޯ ޝޮޕިން މޯލެއް ދެވަނަ ފިޔަވަހީގައި އެޅުމަށް ނިންމެވިނަމަވެސް އިތުރު ތަފްސީލެއް އަމްރު ނުދެއްވައެވެ.
އެސްޓީއޯއިން އަބަދުވެސް ބުނަމުންދަނީ އެކުންފުނީގެ އަމާޒަކީ އައު އަދި ބޮޑެތި ކަންތައްތަކަށް އިންވެސްޓުކޮށް، އާއްމުން ނުކުރާ ވިޔަފާރި ކުރުން ކަމަށެވެ.
އެސްޓީއޯއިންވަނީ ބޮޑެތި ބަދަލުތަކަކާއެކު އެސްޓީއޯ ޕީޕަލްސް ޗޮއިސް ސުޕަރ މާކެޓު ބޮޑުކޮށް މިދިޔަ އަހަރުގެ މާރޗްމަހު ހުޅުވާފައެވެ. މިއާ އެކު އެ ތަނުގައި މިހާރު އާންމު ވިޔަފާރިތަކަށް އެމީހުންގެ އުފެއްދުންތައް ވިއްކޭނެ އިންތިޒާމް ވަނީ ހަމަޖައްސަދީފައެވެ. މީގެތެރޭގައި ބޭކަރީތަކާއި، ބުކްޝޮޕްތައް އަދި ރީތިވުމަށް ބޭނުންވާ ސާމާނާއި، ކުޑަކުދިން ކުޅޭ ސާމާނު ވިއްކާ ފަރާތްތަކުން އަންނަނީ ތަކެތި ވިއްކަމުންނެވެ.
އެސްޓީއޯއަކީ ރާއްޖޭގައި އެންމެ ފުޅާ ދާއިރާއެއްގައި ގިނަ ވިޔަފާރިތަކެއް ކުރާ ކުންފުންޏެކެވެ. އެގޮތުން ތެލާއި ބޭހާއި އަދި ކޮންސްޓްރަކްޝަން ސާމާނުގެ އިތުރުން ކެއިން ބުއިމުގެ ބާވަތްތަކުގެ ވިޔަފާރިވެސް އެކުންފުނިން ކުރެއެވެ.