ޔަހޫދީން ސޮމާލިއާގައި ޙަރަކާތްތެރިވުން އެ ޤައުމުން އެއްްވެސް ޙާލަތެއްގައި ބަލައިނުގަންނާނެ ކަމަށާއި، މެދުއިރުމަތީގެ ހަމަނުޖެހުންތަކުގެ ތެެރެެއަށް އެ ޤައުމު ވެއްދުމަށް ކުރާ ކޮންމެ މަސައްކަތަަކަށް ދެކޮޅު ހަދާނެ ކަމަށް އެ ސޮމާލިއާގެ ރައީސް ޙަސަން ޝައިޚް މަޙްމޫދު ވިދާޅުވެއްޖެއެވެ.
އަލްޖަޒީރާއަށް ދެއްވި ޚާއްޞަ ބަސްދީގަތުމެއްގައި މަޙްމޫދު ވިދާޅުވީ ސޮމާލިއާގެ ބަރބެރާގައި ޔަހޫދީންގެ ކަނޑުގެ ސިފައިންގެ މަރުކަޒެއް ޤާއިމް ކުރުމަށް ޔަހޫދީން ރާވަމުންދާ ކަމަށެވެ. އަދި އެ ސިޓީގެ ވައިގެ ބަނދަރު ބޭނުން ކުރުމަށް ވެސް ރާވާފައިވާ ކަމަށާއި، ޔަހޫދީންގެ ހަޤީޤީ މަޤްޞަދަކީ ގަލްފުގެ ޤައުމުތަކަށާއި އީރާނާ ކައިރި ސަރަޙައްދެއްގައި ޤާއިމްވުން ކަމަށް އޭނާ ވިދާޅުވިއެވެ. ޔަހޫދީންގެ ނިންމުންތަކުގެ ސަބަބުން ސޮމާލިއާއަށް ކުރިމަތިވާ ހުރިހާ ގޮންޖެހުންތަކަކުން އެ ޤައުމުން އަރައިގަންނާނެ ކަމަށް އޭނާ ވިދާޅުވިއެެވެ. އަދި ޔަހޫދީންނަކީ ސަރަޙައްދީ ހަމަނުޖެހުން އުފައްދާ ބައެއް ކަމަށާއި، ބައިނަލްއަޤްވާމީ ޤާނޫނުތަކަށް ވެސް ޔަހޫދީން ޢަމަލު ނުކުރާ ކަމަށް އޭނާ ފާަހަގަކުރެއްވިއެވެ.
މަޙްމޫދު ވަނީ ސޮމާލިއާއިން ވަކިވެގަނެފައިވާ ސޮމާލިލޭންޑް މިދިޔަ ޑިސެމްބަރު މަހުގެ ތެރޭގައި ޔަހޫދީން ބަލައިގަތުން ވެސް ކުށްވެރިކުރައްވައިފައެވެ. އޭނާ ވިދާޅުވީ ޔަހޫދީންގެ ކުރިން އދގެ އެއްވެސް މެންބަރު ޤައުމަކުން ސޮމާލިލޭންޑް ބަލައިގެންފައި ނުވާ ކަމަށެވެ.
ސޮމާލިއާއިން ނިރުބަވެރިކަމާ ދެކޮޅަށް ކުރަމުންދާ މަސައްކަތްތަކަށް އަލިއަޅުވާލައްވައި މަޙްމޫދު ވިދާޅުވީ އެ މަސައްކަތުގައި އެ ޤައުމުގެ އެންމެ މުހިންމު ބައިވެރިއަކީ އެމެރިކާ ކަމަށެވެ. ސޮމާލިއާގައި ޙަރަކާތްތެރިވާ ހަތިޔާރު އެޅި ޖަމާޢަތެއް ކަމަށްވާ އަލް-ޝަބާބްއިން އެ ޤައުމުގެ ބޮޑެތި ސިޓީތަކުގައި ޙަރަކާތްތެރި ނުވާ ކަމަށާއި، އެހެންކަމުން އެ ޖަމާޢަތަށް ސޮމާލިއާގައި ބާރު ނުހިންގޭނެ ކަމަށް އޭނާ ވިދާޅުވިއެވެ.
އިރުމަތީ އެފްރިކާ ސަރަޙައްދާ ގުޅޭ ގޮތުން މަޙްމޫދު ވިދާޅުވީ ސޮމާލިއާއާއި އަވަށްޓެރި އެތިއޯޕިއާއާ ދެމެދު އޮތް ގުޅުން ރަނގަޅު ކަމަށެވެ. ސޮމާލިއާއާއެކު ޤާއިމްކުރާ އެއްބަސްވުމެއްގެ ދަށުން އެތިއޯޕިއާގެ އިޤްތިޞާދީ މަސައްކަތްތަކަށް ސޮމާލިއާގެ ބަނދަރުތައް ބޭނުން ކުރުމަށް އެ ޤައުމުން ދެކޮޅު ނުހަދާ ކަމަށް ވެސް އޭނާ ވިދާޅުވިއެވެ.