މިފްކޯ ފަސްމީރު ރޯދަ ޕްރޮމޯ ފަށައިފިއެވެ. ހުޅުމާލޭ ފޭސް 2ގައި މިފްކޯއިން އަލަށް ހުޅުވި މަސް ފިހާރައިގައި އޮތް ރަސްމިއްޔާތުގައި މިްރޮމޯޝަން ފައްޓަވައިދެއްވީ މިފްކޯގެ ޑެޕިއިޓީ ސީއީއޯ އިބްރާހިމް އިޒްހާނެވެ.
އެހެން އަހަރުތަކެކޭ އެއްގޮތަށް ބަރަކާތްތެރި ރަމަޟާން މަހަށް ހާއްސަކޮށްގެން ކުރިއަށް ގެންދާ މި ޕްރޮމޯޝަނުގައި އޭޕްރީލްމަހުގެ 30ވަނަ ދުވަހުގެ ނިޔަލަށް ކުރިއަށްދާނެއެވެ. މި ޕްރޮމޯޝަންގެ ތެރޭގައި މިފްކޯގެ މަސްފިހާރަތަކުން 200 ރުފިޔާއިން މަތިން ކުރާ ކޮންމެ ވިޔަފާރިއަކަށް ކޫޕަނެއް ލިބޭނެއެވެ. އަދި މި ކޫޕަން ހުށަހަޅައިގެން ހޮވޭ ނަސީބުވެރި ތިން ފަރާތަކަށް އަގުހުރި ފައިސާގެ އިނާމު ލިބޭނެއެވެ.
މާލެ އާއި ހުޅުމާލެ ފޭސް 1، ފޭސް 2ގެ މަސް ފިހާރައިގެ އިތުރުން އައްޑޫ ފިޝަރީޒް ކޮމްޕްލެކްސް، ކޫއްޑޫ ފިޝަރީޒް ކޮމްޕްލެކްސް އަދި ފެލިވަރު ފިޝަރީޒް ކޮމްޕްލެކްސްގެ މިފްކޯ މަސްފިހާރަތަކުން ވިޔަފާރިކުރާ ފަރާތްތަކަށްވެސް މި ޕްރޮމޯޝަންވަނީ ހުޅުވާލާފައެވެ.
މިފްކޯ ފަސްމީރު ރޯދަ ޕްރޮމޯގެ އެންމެ ނަސީބުވެރި އެއް ވަނައަށް ހޮވޭ ފަރާތަކަށް އެއް ލައްކަ ރުފިޔާގެ ފައިސާގެ އިނާމު ދިނުމަށްވަނީ ހަމަޖެހިފައެވެ. އަދި ދެ ވަނައަށް ހޮވޭ ފަރާތްތަކަށް 45000 ރުފިޔާ ތިން ވަނައަށް ހޮވޭ ފަރާތަކަށް 25000 ރުފިޔާގެ ފައިސާގެ އިނާމު ލިބޭނެއެވެ.
މިފްކޯގެ ޖެނެރަލް މެނޭޖަރ ސޭލްސް އެންޑް މާކެޓިން އަހުމަދު ޒާމް ވިދާޅުވީ މިފްކޯއިން ހުސްވުމެއްނެތި ކަސްޓަމަރުންނަށް މަހާއި މަސްދަޅު މި ރޯދަމަހު ވެސް އެއް އަގެއްގައި ފޯރުކޮށްދޭނެކަމަށެވެ.
ފަސްމީރު ރޯދަ ޕްރޯމޯ އާއި އެކު މިއަހަރު މިފްކޯއިން ވަނީ ރަމަޟާން މަހަށް ހާއްސަ މަސްދަޅު ޕެކޭޖިންވެސް ތައްޔާރުކޮށްފައެވެ. މިގޮތުން 6 މަސް ދަޅާއި، 12 މަސްދަޅު، 24 މަސްދަޅު އަދި 48 މަސްދަޅުގެ ކޭސްތައް މި ރޯދަ މަހު މިފްކޯގެ ފިހާރަތަކުން ޑެލިވަރ ކޮށްދިނުމަށް ވަނީ ހަމަޖެހިފައެވެ.