އ. މަތިވެރިން ގެއްލިގެން ހޯދަމުންދާ ޙަސަން އަލީ ހޯދުމަށް ރާއްޖޭގެ އެކި ސަރަޙައްދުތައް ބަލާ ގިނަ މަސައްކަތްތަކެއް ކުރެވިފައިވާކަމަށާއި، ނަމަވެސް އަދިވެސް އޭނާ ނުފެންނަކަމަށް ފުލުހުން ވިދާޅުވެއްޖެއެވެ.
އުމުރުން 73 އަހަރުގެ ޙަސަން އަލީ ނުވަތަ ހަސަންފުޅުބެގެ ހަބަރެއް ނުވެގެން އޭނާ ހޯދުމުގެ މަސައްކަތް މަތިވެރި މީހުން ފެށީ މިދިޔަ މަހުގެ 31 ވަނަ ދުވަހުގައެވެ. އެކަން ފުލުހުންނަށް ރިޕޯޓްކޮށްފައިވަނީ ގާތްގަނޑަކަށް އެދުވަހު ހެނދުނު 9:35 ހާއިރު އާއިލާއިންނެވެ. އެއާއެކު ހަސަންފުޅުބެގެ އާއިލާއާއި ރަށު ކައުންސިލާއި، މުއައްސަސާތަކާއި އަދި ރަށުގެ ކުދިބޮޑު އެންމެން ހަސަންފުޅު ހޯދުމަށް ނިކުތެވެ.
ޙަސަން އަލީ ހޯދުމުގެ މަސައްކަތްތައް ހިއްސާކޮށް ފުލުހުން ނެރުނު ނޫސްބަޔާނުގައި ވިދާޅުވީ އޭނާ ގެއްލިގެން ފުލުހުންނަށް ރިޕޯޓް ކުރުމާއި ގުޅިގެން، އެކަހަލަ މައްސަލަތަކުގައި އަމަލު ކުރާ އުސޫލުގެ މަތިން، ރާއްޖޭގައި ގާއިމްކޮށްފައިވާ ހުރިހާ ޕޮލިސް ސްޓޭޝަންތަކަށާއި، އިންޓަލިޖެންސްއާ މައުލުމާތު ހިއްސާ ކޮށްފައިވާ ކަމަށެވެ.
އަދި އޭނާ ހޯދުމަށް ގިނަ މަސައްކަތްތަކެއް ފުލުހުންގެ އެކި އިދާރާތަކުން ކޮށްފައިވީ ނަމަވެސް މިހާތަނަށް ކުރި މަސައްކަތުން އޭނާ ފެނިފައިނުވާ ކަމަށް ފުލުހުން ވިދާޅުވިއެވެ. މިގޮތުން އޭނާ ހޯދުމަށްޓަކައި އެރަށުގައި މީހުން ދިރިއުޅޭ ހުރިހާ ގެއަކާއި، ފަޅު ގޯތިތަކާއި، ގެވަޅު އަދި ހުސްބިންތަކާއި ރަށުގެ ހިންގާ ހުރިހާ ގެސްޓްހައުސްތަކާއި ކެފޭ ރެސްޓޯރެންޓް އަދި ރަށުގެ ހޭޅިފަށާއި، ގޮނޑުދޮށާއި، ވަލުތެރެ ހިމެނޭހެން ރަށުގެ ހުރިހާ ސަރަހައްދާއި ވަޅުފަދަ ތަންތަން ބަލައި ފާސްކޮށްފައިވާކަމަށެވެ. އަދި އޮޑިދޯނިތައް ބަލާ އޭނާ އާންމުކޮށް ގޮސްއުޅޭ ރަށްރަށާއި އެ ރަށްރަށުގައި ގޮސްއުޅޭ ގޭގޭގެ މީހުންނާވެސް ސުވާލުކޮށްފައިވާކަމަށް ފުލުހުން ވިދާޅުވެއެވެ. މީގެ އިތުރަށް ފަޅުތަކާއި މަތިވެރި ކައިރީގައިވާ ރަށްތަކުގެ ފަޅުތައް ބަލާ ވައިގެ މަގުން ދަތުރުކޮށްފައި ވޭތޯވެސް ބަލާފައިވާކަމަށް ފުލުހުން ވިދާޅުވިއެވެ.
ފުލުހުން ވިދާޅުވީ އޭނާ ހޯދުމަށްޓަކައި މަތިވެރިން ލިބެން ހުރި ހުރިހާ ސީސީޓީވީ ފޫޓޭޖްތައް ހޯދައި، 157 ގަޑިއިރުގެ ފޫޓޭޖް ބަލާފައިވާކަމަށެވެ. އެ ފޫޓޭޖްތަކުން ހަސަން އަލީ އެންމެ ފަހުން ފެނިފައި ވަނީ 2023 ޖަނަވަރީ 31 ވަނަ ދުވަހުގެ 9:30 އެހައިކަންހާއިރު ރަށުގެ ފިހާރައަކަށް ވަދެ ނުކުމެގެންދާ މަންޒަރުކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ ހަސަންފުޅު ހޯދުމަށް ފުލުހުން ކުރަމުން އަންނަ ތަހުގީގަށް ލިބުނު މައުލޫމާތަކާ ގުޅިގެން މާލޭގެ ބައެއް ސަރަހައްދުތަކުގެ ސީސީޓީވީ ކެމެރާތައްވެސް ބަލާފައިވާކަމަށެވެ. އަދި ތަހުގީގަށް މިހާތަނަށް 199 މީހުންގެ ފަރާތުން މައުލޫމާތު ސާފުކޮށް 29 މީހެއްގެ ބަޔާން ނަގާފައިވާ ކަމަށް ފުލުހުން ވިދާޅުވެއެވެ. ނަމަވެސް އޭނާ އަދިވެސް ފެނިފައިނުވާކަމަށް ފުލުހުން ވިދާޅުވެއެވެ.
އަދިވެސް އޭނާ ހޯދުމުގެ މަސައްކަތް ކުރަމުން އަންނަކަމަށާއި އޭނާއާ ގުޅޭ އެއްވެސް މަޢޫލޫމާތެއް އިނގޭ މީހަކު ފުލުހުންގެ ހޮޓްލައިން ނަންބަރު 3322111 އަށް ގުޅާ އެކަން އެނގުމަށާއި ޕޮލިސް ސްޓޭޝަންތަކަށް އެންގުމަށް ފުލުހުން ވަނީ އެދިފައެވެ.