ގދ.މަޑަވެލީގެ ޓީއެސް ލައިން ދޯނިން އެއްދުވަސްތެރޭ 1.2 މިލިއަން ރުފިޔާގެ މަސް ކިރުވައިފިއެވެ.
މިފްކޯއިން މައުލޫމާތުދޭގޮތުގައި އެ ދޯނިން ކޫއްޑޫ ފިޝަރީޒް ކޮމްޕްލެކްސްއަށް އިއްޔެވަނީ 73 ޓަނުގެ މަސް ކިރުވާފައެވެ. މިއީ އެ ދޯނިިން 3 ދުވަސްތެރޭ ބާނާފައިވާ މަހެވެ. އެހެންކަމުން މިއީ އެއްދުވަހުން އެންމެ ގިނަ އަދަދަކަށް މަސް ބޭނުމުގެ ރެކޯޑެއް ނޫނެވެ.
އެހެންނަމަވެސް ޓީއެސް ދޯންޏަކީ މަސްވެރިކަމުގައި ފާހަގަކޮށްލެވޭ ދޯންޏެކެވެ. އެގޮތުން މިދިޔަ އަހަރުތެރޭ އެ ދޯނިންވަނީ ރެކޯޑު އަދަދަކަށް މަސް ބާނާފައެވެ. އެފަހަރު އެއްދުވަސްތެރޭ އެ ދޯނިންވަނީ އެއީ 57.152 ޓަނުގެ މަސް ކިރުވާފައެވެ.
އެހެންނަމަވެސް އޭގެ ފަހުން މިދިޔަ ޑިސެމްބަރުމަހު ގދ.ފަރެސްމާތޮޑާ "ބާޚިރާ" މަސްދޯނިން ވަނީ ކޫއްޑޫއަށް 58.6 ޓަނުގެ މަސް ކިރުވައިގެން ރެކޯޑެއް ޤާއިމްކޮށްފައެވެ. މިރެކޯޑާއެކު ޢާމްދަނީގެ ގޮތުގައި 996000 (ނުވަލައްކަ ނުވަދިހަ ހަހާސް) އަށްވުރެ ގިނަ ރުފިޔާ އެދޯނިން ހޯދާފައިވެއެވެ.
މިދުވަސްވަރަކީ ރާއްޖެއަށް މަސްވެރިކަން ރަނގަޅު ދުވަސްވަރެކެވެެ. އެގޮތުން މިމަހުގެ 18ވަނަ ދުވަހުގެ ނިޔަލަށް މިފްކޯއަށް 12000 ޓަނުގެ މަސްގަނެ، މަސްވެރިންނަށް 198 މިލިއަން ރުފިޔާ ދޫކޮށްފައިވާ ކަަމަށް އެކުންފުނިން މީގެކުރިން ވަނީ ބުނެފައެވެ.
ރާއްޖޭގެ އެންމެ ވާދަވެރި އަދި އިޤްތިޞާދުގައިވެސް މުހިއްމު ދައުރެއް އަދާކުރާ އެއްދާއިރާއަކީ މަސްވެރިކަމުގެ ދާއިރާއެވެ. މަސްވެރިކަން ކުރުމުގެ ވަޞީލަތްތައް ޒަމާނާއެކު ތަރައްޤީވެ މަސްބާނާ މިންވަރު ދުވަހުން ދުވަހަށް އިތުރުވަމުންދާއިރު މަސްވެރިންގެ އެންމެ ބޮޑު ޝަކުވާއަކީ ރާއްޖޭގައި މަސްކިރުވުމުގައި މިވަގުތު އޮތް ގޮންޖެހުމެވެ. މިމައްސަލައަށް ޙައްލެއް ގެނައުމަށް މިފްކޯގެ ކެޕޭސިޓީ އިތުރުކުރުމަށް މަސައްކަތް އަންނަނީ ކުރަމުންނެވެ. މީގެއިތުރުން މަސްކިރުވާ ބޯޓުތައް ގެނެސް މަސްވެރިކަން ތިޔާގި ސަރަޙައްދުތަކަށް ފޮނުވުމުގެ މަސައްކަތްވެސް މިފްކޯއިން ކުރެއެވެ.