ދިވެހިން އުފައްދާ ތަކެތި ރާއްޖެއިން ބޭރުގައި ވިއްކޭނެ އިތުރު މަގު ގަލްފް އެކްސްޕޯގެ ތެރެއިން ހޯދިފައިވާ ކަމަށް އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވެއްޖެއެވެ.
ދުނިޔޭގެ އެންމެ ބޮޑު އެއް އެކްސްޕޯ ކަމަށްވާ ގަލްފް ފުޑް އެކްސްޕޯގައި އެސްޓީއޯއިން ބައިވެރިވެ އެކުންފުނިން ވިއްކާ ޗޮއިސް ބްރޭންޑް މުދަލާއި މިފްކޯގެ މަހުގެ އެކި އުފެއްދުންތައްވަނީ ދައްކާލާފައެވެ.
ދުބާއީގެ ވޯލްޑް ޓްރޭޑް ސެންޓަރުގައި ފެބްރުއަރީ މަހުގެ 20 އިން 24 އަށް ކުރިއަށްދިޔަ މި އެކްސްޕޯގައި ގާއިމްކޮށްފައިވާ އެސްޓީއޯގެ ސްޓޯލްގައި ޗޮއިސް ބްރޭންޑްގެ ކޮންޑެންސް މިލްކް، ކަޕްނޫޑްލް، ބާސްމަތީ ހަނޑޫ، ސަންފްލާވަރ އާއި ވެޖިޓަބްލް އޮއިލްގެ އިތުރުން މިފްކޯގެ މަހުގެ އެކި އުފެއްދުންތައް ދައްކާލާފައިވެއެވެ.
އެސްޓީއޯއިން ގަލްފް އެކްސްޕޯގައި ބައިވެރިވުމާއި ގުޅޭގޮތުން އެކުންފުނީގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވެފަައިވަނީ މިފަދަ ފެއަރތަކުގެ އެހީގައި، ބައިނަލްއަޤްވާމީ ޓްރޭޑަށް ވަނުމަކީ ރާއްޖޭގެ އިޤްތިސާދަށް ވަރަށް މުހިއްމު ކަމެއްކަމަށެވެ. އަދި ދިވެހިން އުފައްދާ ތަކެތި ރާއްޖެއިން ބޭރުގައި ވިއްކޭނެ މަގު ގަލްފް އެކްސްޕޯގެ ތެރެއިން ހޯދިފައިވާކަމަށްވެސް އަމްރު ވިދާޅުވިއެވެ.
އިންޓަނޭޝަނަލް ޓްރޭޑަށް ވަނުމަކީ ރާއްޖޭގެ އިޤްތިސާދަށް ވަރަށް މުހިއްމު ކަމެއް.
— Amr ? (@HusenAmr) February 24, 2023
ދިވެހިން އުފައްދާ ތަކެތި ރާއްޖެއިން ބޭރުގަ ވިއްކޭނެ މަގުވެސް ހޯދިއްޖެ. https://t.co/X5zvtUmSbE pic.twitter.com/Cm2xGKOKep
އެކްސްޕޯގައި ބައިވެރިވުމުގެ މަގުސަދަކީ އެސްޓީއޯއާއި މިފްކޯއިން ވިއްކާ ބްރޭންޑްތަކަށް ބައިނަލްއަގްވާމީ ބާޒާރުގައި ފުރުސަތުތައް އިތުރުކުރުން ކަމަށް އެސްޓީއޯއިން ބުނެއެވެ. މި އަހަރުގެ މި ފެއަރގައި 125 ގައުމަކުން 5000 އަށްވުރެ ގިނަ ކުންފުނިން ބައިވެރިވެއެވެ. މިއީ މިފެއަރ ބާއްވާ 28 ވަނަ ފަހަރެވެ.