ވީނުވީއެއް ނޭނގި ގެއްލިގެން ފުލުހުންނަށް ރިޕޯޓްކުރުމާ ގުޅިގެން ހޯދަމުން ދިޔަ އައްޑޫސިޓީ ހުޅުދޫ، ސަނީލޮޖް، ޢަލީ އާރިފް ފެނިއްޖެއެވެ.
އުމުރުން 46 އަހަރުގެ ޢަލީ އާރިފް ވީނުވީއެއް ނޭނގި ގެއްލިފައިވާކަމަށް ރިޕޯޓްކޮށްފައިވަނީ މިދިޔަ ފެބުރުވަރީ މަހުގެ 16 ވަނަ ދުވަހުއެވެ. އަދި އޭނާ ހޯދުމުގައި އާއްމުންގެ އެހީތެރިކަމަށް އެދި އޭނާއާބެހޭ މަޢުލޫމާތު ފުލުހުންގެ ފަރާތުން ހާމަކޮށްފައިވަނީ މިމަހުގެ 2 ވަނަ ދުވަހުއެވެ.
ފުލުހުން ވިދާޅުވީ، ޢަލީ އާރިފް މިހާރު ފެނިފައިވާކަމަށާއި، އޭނާއާއި އޭނާގެ އާއިލާއާ ގުޅިފައިވާކަމަށެވެ. އަދި މިއަދު ހަވީރުގެ ވަގުތެއްގައި އާރިފް މާލެ އައިސްފައިވާކަމަށާއި، އޭނާގެ ޙާލު ރަނގަޅުކަމަށްވެސް ފުލުހުން ވިދާޅުވެއެވެ.
އާރިފް ދިރިއުޅެމުންދަނީ މާލޭގައިކަމަށާއި، އެންމެފަހުން އާއިލާއަށް ޚަބަރުވެފައިވަނީ މިދިޔަ ޑިސެމްބަރުމަހުގެ ތެރޭގައިކަމަށް ފުލުހުން ކުރިން ހާމަކޮށްފައިވެއެވެ. އަދި އޭނާއަކީ ކަންނެލި މަސްވެރިކަމަށް ގޮސްއުޅޭ މީހެއްކަމަށްވެސް އޭނާގެ އާއިލާއާ ޙަވާލާދީ ފުލުހުން ވިދާޅުވެފައިވެއެވެ.