ރާއްޖޭގައި ޔޫނިއަންތައް ރަޖިސްޓްރީކޮށް ހިންގުމުގެ ހައްޤު ޤާނޫނީގޮތުން ކަށަވަރުކޮށްދިނުމަށްޓަކާ "އިންޑަސްޓްރިއަލް ރިލޭޝަންސް ބިލް" އަންނަ ހަފްތާގެ ތެރޭގައި މަޖިލީހަށް ހުށަހަޅުއްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މޯލްޑިވްސް ޓްރޭޑް ޔޫނިއަން ކޮންގްރެސްގެ ގުޅިފައިވާ 5 ޔޫނިއަން އިން ބާއްވާ "މަސައްކަތްތެރިންގެ ފުރަތަމަ ކޮންގްރެސް" ފެށުމަށް ސްޓެލްކޯގެ ކޮންފަރެންސް ހޯލުގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.
މި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، މޯލްޑިވްސް ޓްރޭޑް ޔޫނިއަންއަކީ މަސައްކަތްތެރިންގެ ހައްޤުގައި ގިނަ މަސައްކަތްތަކެއް ކުރަމުން އަންނަ ވަރަށް މުހިއްމު ޖަމާޢަތެއްކަމަށާއި، ސަރުކާރާއި މި ޔޫނިއަންގެ އަމާޒުވެސް ހުރީ ދާދި އެއް މިސްރާބަކަށްކަމަށެވެ. އަދި އެއީ މަސައްކަތްތެރިންގެ ހައްޤުތައް ހޯދައިދީ އެމީހުންގެ ޙާލާތު ރަނގަޅުކޮށްދިނުންކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ، މަސައްކަތްތެރިންގެ ޙައްޤުތައް ކަށަވަރުކޮށްދީ، ޙާލަތު ރަނގަޅުކޮށްދިނުމަށް މި ސަރުކާރުގެ ފާއިތުވި 4 އަހަރުގެ ތެރޭގައި މުހިއްމު މަސައްކަތްތަކެއް ކޮށްފައިވާކަމަށެވެ. އަދި މަސައްކަތްތެރިންގެ ހައްޤުގައި ސަރުކާރުން ކޮށްފައިވާ ބައެއް މުހިއްމު މަސައްކަތްޕުޅުތަކަށް އެމަނިކުފާނުގެ ވާހަކަފުޅުގައި ވަނީ އަލިއަޅުއްވާލައްވަވާފައެވެ.
އެގޮތުން މިނިމަމް ވޭޖް ތަޢާރަފުކުރުމާއި، ފަތުރުވެރިކަމުގެ ސިނާޢަތުގައި މަސައްކަތްކުރާ މީހުންނަށް ސަރވިސް ޗާރޖުގެ ފައިދާ ހަމަހަމައަށް ލިބިދިނުމަށް ޤާނޫނަށް ގެނައި ބަދަލު އެމަނިކުފާނު ފާހަގަކުރެއްވިއެވެ. އަދި މި ފިޔަވަޅުތަކުގެ ސަބަބުން ސިވިލް ސަރވިސްގައި މަސައްކަތްކުރާ 15،000 މުވައްޒަފުންނާއި، ފަތުރުވެރިކަމުގެ ސިނާޢަތުގައި މަސައްކަތްކުރާ 13،000 މުވައްޒަފުންގެ އާމްދަނީއަށް ހެޔޮ ބަދަލުތަކެއް ގެނެވިފައިވާކަމަށް އެމަނިކުފާނު ވިދާޅުވިއެވެ.
މަސައްކަތްތެރިންގެ އިޖްތިމާޢީ އަދި ޤާނޫނީ ރައްކާތެރިކަން ކަށަވަރުކޮށްދިނުމަކީވެސް މި ސަރުކާރުގެ މުހިއްމު ވަޢުދެއްކަން ފާހަގަކުރައްވާ މި ރޮނގުން ކުރަމުންދާ މަސައްކަތްތަކަށްވެސް ރައީސުލްޖުމްހޫރިއްޔާގެ ވާހަކަފުޅުގައި ބައްލަވާލައްވާފައިވެއެވެ. އެގޮތުން ހަރުދަނާ އުޞޫލުތަކެއްގެ ތެރެއިން ބައްޓަންކުރެވޭ ނިޒާމެއްގެ ދަށުން އަން-އެމްޕްލޯއިމަންޓް އިންޝިއުއަރެންސް ބެނެފިޓް ތަޢާރަފުކުރުމުގެ މަސައްކަތް ކުރަމުންދާކަން ރައީސް ފާހަގަކުރެއްވިއެވެ.
"އެކަމަށްޓަކާ ޤާނޫނީ އޮނިގަނޑަށް ގެންނަންޖެހޭ ބަދަލުތަކާބެހޭ ޤޮތުން ބޭރުގެ ފަންނީ އެހީއާއެކު، ކަމާބެހޭ ޤާނޫނުގެ ދެލިކޮޕީ އެކުލަވާލުމުގެ މަސަައްކަތް މިހާރު މި އަންނަނީ ކުރަމުން. އިރާދަކުރެއްވިއްޔާ މާ ލަސްތަކެއްނުވެ އެ ބިލުވެސް ރައްޔިތުންގެ މަޖިލީހަށް އަޅުގަނޑުމެންނަށް ފޮނުވޭނެ" ރައީސް ވިދާޅުވިއެވެ.
ރައީސް ވިދާޅުވީ، މަސައްކަތު މާހައުލުގައާއި މުވައްޒަފުން ދިރިއުޅޭ ތަންތަނުގައި ހިނގާ ހިތާމެވެރި ޙާދިސާތައް މަދުކުރުމަށްޓަކާ މުވައްޒަފުން ދިރިއުޅެން ހަމަޖައްސާ ތަންތަނުގެ އާއްމު މިންގަނޑުގެ ޤަވާއިދެއް ކަނޑައަޅާ މިހާރު ތަންފީޒުކުރަމުންދާކަމަށެވެ. އަދި މިކަމަށް އިތުރު ޤާނޫނީ ބާރު ދިނުމުގެގޮތުން އޮކިއުޕޭޝަނަލް ހެލްތު އެންޑް ސޭފްޓީ ބިލު މިހާރު ރައްޔިތުންގެ މަޖިލީހަށް ފޮނުވާފައިވާކަމަށް ރައީސް ވިދާޅުވިއެވެ.
"މި ބިލުގެ ސަބަބުން މުވައްޒަފުންގެ އިޖްތިމާޢީ އަދި ޞިއްޙީ ރައްކާތެރިކަން އިތުރަށް ކަށަވަރުވެ، ވަޒީފާ ދޭ އަދި ވަޒީފާ އަދާކުރާ މީހުންގެ ޒިންމާ ކަނޑައެޅިގެންދާނެ. އަދި މަސައްކަތްތެރިންގެ ޞިއްޙީ ދުޅަހެޔޮކަމާއި ސަލާމަތާގުޅޭގޮތުން ނިންމާ ނިންމުންތަކުގައި ދިމާވާ މައްސަލަތައް ޙައްލުކުރުމުގައި ބަސް ބުނުމުގެ ޙައްޤު މަސައްކަތްތެރިންނަށް ލިބިގެންދާނެ. މި ބިލުން ނިކުންނާނެ އަނެއް ނަތީޖާއަކީ ގެއްލުމުގެ ބަދަލު ލިބިދިނުމުގެ ޙައްޤު ބަޔާންކުރުން. އަދި މަސައްކަތުގެ މާޙައުލުގެ ޞިއްޙީ ރައްކާތެރިކަން ކަށަވަރުކުރުމާގުޅޭގޮތުން ސިޔާސަތުތައް ކަނޑައެޅުމަށް މަގުފަހިވެގެންދާނެ" ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ރާއްޖޭގައި ޔޫނިއަންތައް ރަޖިސްޓްރީކޮށް ހިންގޭނެ މަގެއް ހޯދައިދިނުމަކީވެސް މަސައްކަތްތެރިންގެ ޙައްޤުގައި ކުރަންޖެހޭ މުހިއްމު މަސައްކަތެއްކަމަށް ވިދާޅުވިއެވެ. އަދި އެކަމަށް ބޭނުންވާ އިންޑަސްޓްރިއަލް ރިލޭޝަންސް ބިލް މިހާރު އެކުލަވާލާ ނިމިފައިވާކަމަށާއި، މި ފެށޭ ހަފްތާގެ ތެރޭގައި އެ ބިލު މަޖިލީހަށް ހުށަހަޅާނެކަމަށް އެމަނިކުފާނު ވިދާޅުވިއެވެ.
"މި ބިލު ޤާނޫނަކަށްވުމުން ޔޫނިއަންތައް އުފައްދާ ހިންގުމުގެ ހައްޤު މަސައްކަތްތެރިންނަށް ޤާނޫނީގޮތުން ކަށަވަރުވެގެންދާނެ. އަދި ވަޒީފާ ދޭ މީހުންނާއި ވަޒީފާ އަދާކުރާ މީހުންނާއި ދެމެދު އުފެދޭ މައްސަލަތަކާއި ދެބަސްވުންތައް ޙައްލުކުރުމަށް ހަރުދަނާ ނިޒާމެއް ޤާއިމުވެގެންދާނެ" ރައީސް ވިދާޅުވިއެވެ.
ރައީސްގެ ވާހަކަފުޅުގައި ވަޒީފާ ބޭނުންވާ ފަރާތްތަކާއި، ވަޒީފާ އަދާކުރާ ފަރާތްތަކަށް ހުރި ގޮންޖެހުންތަކުގެ ގިނަ ހައްލުތަކެއް ސަރުކާރުން ހުށަހަޅާ ބިލުތަކުން ލިބެމުންދާކަމަށް ވިދާޅުވިއެވެ. ރާއްޖޭގެ ތަރައްޤީއަށް ސަރުކާރުން ހިންގާ މަޝްރޫޢުތަކާއެކު އިޤްތިޞާދީ ކުރިއެރުންތަކާއި ވަޒީފާގެ އެތައް ފުރުޞަތުތަކެއް ފަހިވަމުންދާކަން ފާހަގަކުރައްވާ އެމަނިކުފާނު ވަނީ ރާއްޖޭގެ ތަފާތު ސިނާޢަތްތަކުގައި މަސައްކަތްކުރާ ހުރިހާ ފަރާތްތަކަކުންވެސް ރާއްޖެއަކީ ޙައްޤުތައް ކަށަވަރުވެފައިވާ އަމާން މާޙައުލެއްކަމުގައި ހެދުމަށް މަސައްކަތްކޮށްދެއްވުމަށް އެދިވަޑައިގެންފައެވެ.