ކ. އަތޮޅު ތިލަފުށީ ކުޑަގިރި ފަރަށް ބޯޓެއް އެރުމާގުޅިގެން، ފަރަށް ލިބުނު ގެއްލުން ދިރާސާކުރުމަށްފަހު އެންވަޔަރަމަންޓަލް ޕްރޮޓެކްޝަން އޭޖެންސީ، އީޕީއޭއިން އެ އުޅަނދުގެ ވެރިފަރާތް 3 މިލިއަން ރުފިޔާއިން ޖޫރިމަނާކޮށްފިއެވެ.
ކ. އަތޮޅު ތިލަފުށީ ކުޑަގިރި ފަރަށް އަރާފައިވަނީ އެމްސީވީ. މާރިއާ ސިންތަޔަތިރައި ރިޔަނަ ނަމަކަށް ކިޔާ ބޯޓެކެވެ. ބާދަގަނޑުތަކެއް ބަރުކޮށްގެން ދަތުރުކުރި މި ބޯޓު ތިލަފުށީ ކުޑަގިރި ފަރަށް އަރާފައިވަނީ މިދިޔަ ޖެނުއަރީމަހުގެ 31 ވަނަ ދުވަހުއެވެ.
މި ބޯޓު ފުންކޮށް ނިމުމުން، އެ ސަރަޙައްދުގެ ތިމާވެށްޓަށް ލިބުނު ގެއްލުންތައް ބެލުމަށް ބޯޓުގެ ވެރިފަރާތުން ސާރވޭކޮށް، ސާރވޭ ރިޕޯޓު ވަނީ އީ.ޕީ.އޭއާ ޙިއްސާކޮށްފައެވެ. އަދި އެ އެޖެންސީގެ ސަރވެޔަރުން އެ ސަރަހައްދަށްގޮސް ސަރވޭއެއްވެސް ވަނީ ކޮށްފައެވެ.
އީ.ޕީ.އޭއިން ވިދާޅުވީ، ބޯޓުގެ ވެރިފަރާތުން މި އެޖެންސީއަށް ޙިއްސާކޮށްފައިވާ ސާރވޭ ރިޕޯޓަށް ރިޢާޔަތްކޮށް އެ އުޅަނދު ތިލަފުށީ ކުޑަގިރި ފަރަށް އެރުމުގެ ސަބަބުން 130 އަކަމީޓަރުގެ ސަރަޙައްދަކަށް އެކިވަރުގެ ގެއްލުން ލިބިފައިވާކަން ފާހަގަކުރެވިފައިވާކަމަށެވެ.
އެހެންކަމުން މި ބޯޓު ފަރަށް އެރުމާއި ގުޅިގެން އެ ފަރުގެ މާހައުލަށް ލިބުނު ގެއްލުންތަކަށް ބަލާ 3،098،710 (ތިން މިލިއަން ނުވަދިހަ އަށްހާސް ހަތްސަތޭކަ ދިހައެއް) ރުފިޔާ އިން އެ އުޅަނދުގެ ވެރިފަރާތް ވަނީ ޖޫރިމަނާކޮށްފައެވެ. އީ.ޕީ.އޭއިން މި ފިޔަވަޅު އަޅާފައިވަނީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހެދިފައިވާ ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ޤަވާއިދުގެ ދަށުންނެވެ.
ޖޫރިމަނާގެ ފައިސާ 30 ދުވަހުގެ ތެރޭގައި އީ.ޕީ.އޭއަށް ދެއްކުމަށް އުޅަނދުގެ ވެރިފަރާތަށް އެ އެޖެންސީއިން ވަނީ އަންގާފައެވެ.