ކަނޑުމަތީގެ ސަލާމަތާއި ރައްކާތެރިކަމަށް ސްކޫލު ދަރިވަރުންނާއި އާންމު ރައްޔިތުން އަހުލުވެރިކުރުމަށް ޕްރޮގްރާމްތަކެއް ފަށައިފިއެވެ.
މި ޕްރޮގްރާމް ކުރިއަށް ގެންދަނީ މެރިން ޕޮލިސްއާއި ލޯކަލް ޕޮލިސިންގ ގުޅިގެންނެވެ.
މި ޕްރޮގްރާމަކީ ރާއްޖޭގައި ދިރިއުޅޭ ރައްޔިތުންނާއި ރާއްޖެއަށް ޒިޔާރަތްކުރާ މީހުންނަށް ކަނޑުތަކަކީ އަމާން ރައްކާތެރި ތަނަކަށް ހެދުމާއި ކަނޑުމަތީގައި ދިމާވާ އެކްސިޑެންޓުތަކާއި ހާދިސާތަކުގައި މީހުންނާއި މުދަލަށް ލިބޭ ގެއްލުންކުޑަ ކުރުމަށް ކުރިއަށް ގެންދާ ޕްރޮގްރާމެކެވެ. އަދި ދިވެހިރާއްޖޭގެ ރައްޔިތުންނަކީ ކަނޑުމަތީގެ ކަންކަމާ ގުޅޭގޮތުން ހެދިފައިވާ ގާނޫނުތަކާއި ގަވާއިދުތަކަށް ތަބާވާ އަދި އެ ގާނޫނުތަކާއި ގަވާއިދުތަކަށް އަހުލުވެރި ބަޔަކަށް ހެދުންވެސް މިޕްރޮގްރާމް ކުރިއަށް ގެންދިއުމުގެ ބޭނުންތަކުގެ ތެރޭގައި ހިމެނެއެވެ.
މި އަހަރުތެރޭގައި ރާއްޖޭގެ ހުރިހާ ރަށެއްގައި ހިންގުމަށް ހަމަޖެހިފައިވާ މި ޕްރޮގްރާމްގައި، ކަނޑު އުޅަނދުފަހަރު ދުއްވާ މީހުންނާއި އެ އުޅަނދުފަހަރުގެ ވެރިންނާއި ރަށު ކައުންސިލުތަކާއި އަތޮޅުތަކުގައި މަސައްކަތްކުރާ ފުލުހުންނާއި ސްކޫލްތަކުގެ ދަރިވަރުންނާއި މުދައްރިސުންނަށާއި ބެލެނިވެރިންނަށް މައުލޫމާތުދިނުމަށް ހަމަޖެހިފައިވާކަމަށް ފުލުހުން ވިދާޅުވެއެވެ.
މި މަހު 3 އިން 7 އަށް މި ޕްރޮގްރާމް ފުރަތަމަ ކުރިއަށް ގެންގޮސްފައިވަނީ ގދ. ތިނަދޫ، ފަރެސްމާތޮޑާ، ގއ. ވިލިނގިލި އަދި ގެމަނަފުށީގައެވެ.