ބާރު ސްޕީޑުގައި ދުއްވާފައި ދިޔަ ސައިކަލެއް، އިތުރު ދެ ސައިކަލެއްގައި ޖެހި އެކްސިޑެންޓުވުމުންވެސް މަޑުނުކޮށް ދިޔަ މައްސަލައިގައި 2 މީހުން ހައްޔަރުކޮށްފިއެވެ.
ފުލުހުން ވިދާޅުވީ، ރޭ މާލެތެރެ ޕެޓްރޯލް ކުރަމުންދިޔައިރު ރޭ 1:03 ހާއިރު މާފަންނު ގަޑިބުރު ކައިރިން ބާރު ސްޕީޑުގައި ދުއްވާފައި ދިޔަ ސައިކަލެއް ފުލުހުން މަޑުކުރަން އެންގުމުން މަޑުނުކޮށް ބާރު ސްޕީޑުގައި ދުއްވާފައި ދަނިކޮށް ނަލަހިޔާ ކައިރިން އިތުރު ދެ ސައިކަލުގައި ޖެހި އެކްސިޑެންޓެއް ހިނގާފައިވާކަމަށެވެ.
އެކްސިޑެންޓް ވުމުންވެސް ސައިކަލު މަޑުނުކޮށް ދާން މަސައްކަތްކޮށް ފުލުހުންގެ އަމުރަށް ނުކިޔަމަންތެރިވުމުން ސައިކަލުގައި ތިބި ދެމީހުން ފުލުހުންގެ ބެލުމުގެ ދަށަށް ގެނެސްފައިވާކަމަށް ފުލުހުން ވިދާޅުވެއެވެ. އަދި އެކްސިޑެންޓްވި ސައިކަލު ދުއްވާފައިވަނީ ލައިސެންސް ނެތް މީހެއްކަމަށްވެސް ފުލުހުން ވިދާޅުވެއެވެ. ނަމަވެސް މި މައްސަލައިގައި ހައްޔަރުކުރި 2 މީހުންގެ އިތުރު ތަފްޞީލެއް ފުލުހުން ހާމަކޮށްފައެއްނުވެއެވެ.
މި މައްސަލަ ފުލުހުން އަންނަނީ އިތުރަށް ތަޙުޤީޤުކުރަމުންނެވެ.