މާލޭގެ ގެއެއްގައި ހަދާފައި ހުރި ކެމިކަލް ގުދަން ބަންދުކޮށް، އެތަނުގައި ހުރި އެއްޗެހި ހުސްކޮށްފިއެވެ.
އިއްޔެގެ ވަގުތެއްގައި މާލޭގައި ކެމިކަލް ގުދަނެއް ހިންގާކަމުގެ މަޢުލޫމާތު ލިބިގެން އެމްއެންޑީއެފްއިން ދިޔައީ ހަރަކާތްތެރިވަމުންނެވެ. އެ ކެމިކަލް ގުދަން ހުރީ ލިލީ މަގުގައި ހުންނަ ގ.ގަސްކަރަގެއާ ޖެހިގެންނެވެ. މިއީ މާލެއިން ކެމިކަލް ގުދަންތައް ބޭރުކުރި ފަހުން، މިފަދަ ތަނެއް ފަޅާއެރި ފުރަތަމަ ފަހަރެވެ.
ފުލުހުން މިއަދު ބުނީ ގުދަނުގައި ހުރި ތަކެތި ހުޅުމާލެއަށް މިހާރު ބަދަލުކޮށް، އެތަން މިހާރު އެއްކޮށް ހުސްކޮށްފައިވާ ކަމަށެވެ.
އެމްއެންޑީއެފްއިން ބުނީ އެތަނުގައި ކެމިކަލް ގުދަން ހިންގި ފަރާތްތަކާއިމެދު އޮންނަ އުސޫލުގެ ދަށުން ފިޔަވަޅު އަޅާނެކަމަށެވެ.
އެއްވެސް ބާވަތެއްގެ ކެމިކަލެއް މާލޭގެ އެއްވެސް ތަނެއްގައި ގުދަންކުރުމަކީ މިހާރު މަނާ ކަމެކެވެ. މާލޭގައި ހިނގި ނުރައްކާތެރި އަލިފާނުގެ ހާދިސާއަކަށްފަހު މާލޭގައި ހުރި ކެމިކަލް ގުދަންތައް ވަނީ ތިލަފުއްޓަށް ބަދަލުކޮށްފައެވެ.