ކަނޑާއި ކަނޑުގެ ދިރުންތަކާއި މަސްވެރިކަމާއި ގުޅުންހުރި އެއްވެސް ދިރާސާއެއް ހުއްދަ ނުލިބެނީސް ކުރިއަށް ނުގެންދިއުމަށް މިނިސްޓްރީ އޮފް ފިޝަރީޒް، މެރިން ރިސޯސް އެންޑް އެގްރިކަލްޗަރއިން ވިދާޅުވެއްޖެއެވެ.
ފިޝަރީޒް މިނިސްޓްރީން މިހެން ވިދާޅުވީ އެ މިނިސްޓްރީން ހުއްދަ ނުދެނީސް ކަނޑާއި ދިރާސާތައް ބައެއް ފަރާތްތަކުން ކުރިއަށްގެންދާތީ އެކަމާއި ގުޅޭގޮތުން ނެރުއްވި ބަޔާނެއްގައެެވެ.
ފިޝަރީޒް މިނިސްޓްރީން ވިދާޅުވީ ދިވެހިރާއްޖޭގެ ކަނޑުގެ ސަރަޙައްދުގެ ތެރޭގައި ކަނޑާއި ކަނޑުގެ ޤުދުރަތީ ވަސީލަތްތަކުގެ ދިރާސާ ކުރުމާބެހޭ ގަވާއިދާ ޚިލާފަށް، ދިރާސާތައް ކުރަމުންދާކަން ފާހަގަކުރެވޭކަމަށެވެ. އަދި ދިރާސާކުރުމަށް މިނިސްޓްރީއަށް ހުށަހެޅުމަށްފަހު، މިނިސްޓްރީން ހުއްދަ ލިބުމުގެ ކުރިން ބައެއް ފަރާތްތަކުން ދިރާސާގެ މަސައްކަތްތައް ފަށާކަން ފާހަގަކުރެވިފައިވާކަމަށްވެސް މިނިސްޓްރީން ވިދާޅުވެއެވެ.
ދިވެހިރާއްޖޭގެ ކަނޑުގެ ސަރަޙައްދުގައި ކަނޑާއި ކަނޑުގެ ދިރުންތަކުގެ ދިރާސާތަކާއި މަސްވެރިކަމާއި މަސްވެރިކަމާ ގުޅުންހުރި ދިރާސާތައް ކުރުމަށް ބޭނުންވާ ފަރާތްތަކުން، އެދިރާސާއެއް ކުރަން ފަށަން ގަސްތުކުރާ ތާރީޚުގެ މަދުވެގެން 2 މަސްދުވަހުގެ ކުރިން ދިރާސާކުރުމުގެ ހުއްދައަށް އެދި މިނިސްޓްރީއަށް ހުށަހަޅަންޖެހެއެވެ. އަދި ޞައްޙަ ހުއްދައެއް ނެތި އެފަދަ ދިރާސާއެއް ނުވަތަ ތަހުލީލެއް ކުރުމަކީ މަނާކަމެކެވެ.
އެހެންކަމުން މިފަދަ ދިރާސާއެއް ފެށުމުގެ ކުރުމުގެ ކުރިން މިނިސްޓްރީން ކަނޑައަޅައިފައިވާ ގޮތަށް ރިސަރޗް ޕޯޓަލް މެދުވެރިކޮށް ހުއްދަ ހޯދުމަށް ފިޝަރީޒް މިނިސްޓްރީން ވަނީ އިލްތިމާސްކޮށްފައެވެ.