ކ. މާފުށީ ބަނދަރު ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ފެށުމަށް ސައިޓް މޮބިލައިޒްކޮށް، މަސައްކަތް ފަށަން ތައްޔާރުވެއްޖެއެވެ. ކޮންމެދުވަހަކު އެތައް ބަޔަކު ގޮސްއައިސްވާ މާފުށްޓަށް ދިމާވެފައިވާ އެންމެ ބޮޑު އެއް ދައްޗަކީ މިހާރު ބޭނުންކުރާ ބަނދަރު ހަލާކުވުމާއި މިހާރުގެ ބޭނުންތަކަށް ޖާގަ ކުޑަވުމެވެ.
މާފުށްޓަކީ ރާއްޖޭގައި އެންމެ ފުޅާ ދާއިރާއެއްގައި ލޯކަލް ޓޫރިޒަމްގެ ވިޔަފާރިކުރާ ރަށެވެ. ރަށުގައި ޑިންގީއާއި، ޑައިވިން ދޯންޏާއި ލޯންޗު އިތުރުވެ ބަނދަރުގެ ޖާގައިގެ ދަތިކަން ވަނީ ކުރިމަތިވެފައެވެ. އަދި ރަށަށް ދަތުރުކުރާ މީހުން އިތުރުވުމާއި، މަސްވެރިކަމަށް ނިކުންނަ އުޅަނދުފަހަރު ގެންގުޅޭ ރަށަކަށްވުމާއެކު އެކަމަށް ބަނދަރު ބޭނުންކުރުމުގައި ވެސް ދަތިތައް ދިމާވެއެވެ. މިހާރު އެރަށުގައި ބޭނުންކުރަމުން އަންނަ ބަނދަރަކީ ޒަމާންވީ ބަނދަރަކަށް ވުމާއެކު، ބަނދަރުގެ ބައިތައް ހަލާކުވެ ޖާގަ ވަނީ ކުޑަވެފައެވެ.
މާފުށީ ބަނދަރަށް ކުރިމަތިވެފައިވާ މައްސަލަތައް ޙައްލުކޮށް، ޒަމާނީ ބަނދަރެއް ތަރަޢްޤީކުރުމުގެ މަސައްކަތް ސަރުކާރުން އެމް.ޓީ.ސީ.ސީއާ ޙަވާލުުރީ މިއަހަރުގެ ޖެނުއަރީމަހުގެ 23 ވަނަ ދުވަހުއެވެ. އެ ކުންފުނިން މިހާރު ވަނީ މި މަޝްރޫޢުގެ ޢަމަލީ މަސައްކަތް ފެށުމަށްޓަކައި ސައިޓް މޮބިލައިޒްކޮށް މަސައްކަތަށް ވަނީ ތައްޔާރުވެފައެވެ. މަޝްރޫޢަށް ބޭނުންވާ މެޝިނަރީތަކާއި އެހެން ސާމާނު ސައިޓަށް މިހާރު ވަނީ ގެންގޮސްފައެވެ.
ކ. މާފުށީ ބަނދަރު ތަރައްޤީ ކުރުމުގެ މަޝްރޫޢުގެ އަމަލީ މަސައްކަތް ފެށުމަށްޓަކައި 8 އޭޕްރީލް 2023 ވަނަ ދުވަހު ޕްރޮޖެކްޓް ސައިޓް މޮބިލައިޒްކޮށްފި.#MTCCProjects #RayyithungeKunfuni pic.twitter.com/QygHRSDRRA
— MTCC Plc (@MTCCPlc) April 12, 2023
މާފުށީގެ އާބާދީއަކީ ދެހާހެއްހާ މީހުން ނަމަވެސް، އެކި މަސައްކަތްތަކުގައި ރަށުގައި ދިރިއުޅޭ މީހުންނާއެކު މި ޢަދަދު 5000 އިން މައްޗަށް އަރައެވެ. ރަށުގެ ރައްޔިތުން ފާހަގަކުރާ ގޮތުގައިވެސް ރަށުގެ އިގްތިޞާދު ކުރިއެރުވުމުގައިވެސް ރަށަށް މިހާރު އެންމެ ބޭނުންވަނީ ފަސޭހައިން ލަފާފުރޭނެ ޒަމާނީ ބަނދަރެކެވެ. އަދި ގިނަ އުޅަނދު ފަހަރަށް ބަނދަރަށް ވަދެ، ފަސޭހައިން ޚިދުމަތް ހޯދޭނެފަދަ ޖާގަ ތަނަވަސް ބަނދަރެކެވެ.
އެމްޓީސީސީއާ ހަވާލުކޮށްފައިވަނީ 374 މީޓަރުގެ ބަނދަރެއް ތަރައްޤީކުރުމަށެވެ. މީގެތެރޭގައި މިހާރުގެ ބަނދަރާއި ބަނދަރަށް އަލަށް އިތުރުކުރާ ބައި ހިމެނެއެވެ.
މި މަޝްރޫޢުގެ ދަށުން، 63,711 ކިއުބިކް މީޓަރުގެ ސަރަޙައްދެއްގެ އައު ހާބަރ ބޭސިން ފުންކުރުމާއި، 28,836 ކިއުބިކް މީޓަރުގެ ސަރަޙައްދެއްގެ ކުރިން ފުންކޮށްފައިވާ ފަޅު އަލުން ފުންކުރުމާއި، 4,414 ކިއުބިކް މީޓަރުގެ ސަރަޙައްދެއްގެ ނެރު ފުންކުރުން ހިމެނެއެވެ. އަދި 31 މީޓަރުގެ ސަރަޙައްދެއްގައި ބޭރުތޮށި ލުމާއި، 680 މީޓަރުގެ ސަރަޙައްދެއްގައި ބޮޑުހިލައިގެ ރިވެޓްމެންޓް ޖެހުމާއި، 700 މީޓަރުގެ ސަރަޙއްދެއްގައި ޖިއޯބޭގް ރިވެޓްމެންޓް ޖެހުމާއި، 374 މީޓަރުގެ ސަރަޙައްދެއްގައި އެއްގަމުތޮށިލުން ހިމެނެއެވެ.
ހަމައެހެންމެ 160 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުމާއި، 19 މީޓަރު ދިގު 3 މީޓަރު ފުޅާ ބްރިޖެއް ހެދުމާއި، 1,869 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމާއި، ބަނދަރު ބައްތި ހަރުކުރުމުގެ މަސައްކަތް ކުރުންވެސް މި މަޝްރޫޢުގެ ތެރޭގައި ހިމެނެއެވެ. މިއީ ސަރުކާރުން 76.48 މިލިއަން ރުފިޔާ ޚަރަދުކޮށްގެން ހިންގާ މަޝްރޫޢެކެވެ.