އަމީނީމަގު ޒަމާނީ ފެންވަރަކަށް ތަރައްޤީކުރުމުގެ މަޝްރޫއުގެ ދަށުން އެ މަގުގެ 6 ވަނަ ސެގްމަންޓާއި 7 ވަނަ ސެގްމަންޓްގެ މަސައްކަތް ފަށައިފިއެވެ.
ރޯޑް ޑިވެލޮޕްމަންޓް ކޯޕަރޭޝަން، އާރްޑީސީން ކުރިއަށްގެންދާ މިމަޝްރޫއު ކުރިއަށްގެންދަނީ 13 ސެގްމަންޓަކަށް ބަހާލައިގެންނެވެ.
އަމީނީ މަގުގެ 6 އަދި 7 ވަނަ ސެގްމަންޓަކީ އަމީނީ މަގު، ޓެލިވިޜަން މޯލްޑިވްސް ހުންނަ ހިސާބުން ފެށިގެން ބިލަބޮންގ ސްކޫލާއި ހަމައަށެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން އާރްޑީސީން ބުނީ މި ސެގްމަންޓްތަކުގައި ހުރި ގާތައް ނެގުމުގެ މަސައްކަތްކުރަމުން އަންނަކަމަށެވެ.
އަމީނީ މަގުގެ 6 ވަނަ ސެގްމަންޓާއި 7 ވަނަ ސެގްމަންޓްގެ މަސައްކަތްކުރަމުންދާއިރު ސެގްމަންޓް 5ގެ މަސައްކަތް ދެ ބަޔަކަށް ބަހާލައިގެން ދަނީ ކުރިއަށްގެންދަމުންނެވެ. އަދި އެ ސެގްމަންޓްގައި ތާރު އެޅުމުގެ އެންމެ ފަހުގެ ތައްޔާރީތައްވަމުން އަންނަކަމަށްވެސް އާރްޑީސީން ބުނެއެވެ.
އާރްޑީސީން މިހާރު ވަނީ އަމީނީމަގުގެ ފުރަތަމަ 4 ސެގްމަންޓުގެ މަސައްކަތް ނިންމާލާފައެވެ.
އަމީނީ މަގަކީ މާލޭގެ ގިނަ މަގުތަކެއް ގުޅޭ މަގެވެ. އަދި އެ މަގަކީ ސްކޫލްތަކާއި ސަރުކާރުގެ އެކި އިދާރާތައްވެސް ހުންނަ މަގެކެވެ. އެހެންކަމުން ރައްޔިތުންނަށް ވީހާވެސް ދަތިނުވާނޭހެން މިމަގުގެ މަސައްކަތްކުރުމަށް އާރްޑީސީން ދަނީ މަސައްކަތްކުރަމުންނެވެ.
ސެގްމަންޓުތަކުގެ ހުރިހާ މަސައްކަތެއް އާރްޑީސީން ކުރިއަށްގެންދިޔަނަމަވެސް ތާރުއެޅުމުގެ މަސައްކަތް ކޮށްފައިވަނީ އެމްޓީސީސީއާ ޙަވާލުކޮށްގެންނެވެ. އަމީނީ މަގުގެ މަސައްކަތް އާރްޑީސީން ކުރިއަށް ގެންދަނީ 13 ސެގްމަންޓަކަށް ބަހާލައިގެންނެވެ.
މި މަސައްކަތް ކުރަމުން އަންނައިރު އަމީނީ މަގުގައި އެތައް އަހަރެއްވަންދެން އެކި ގޮތްގޮތަށް ވަޅުލާފައިވާ ހޮޅިތަކާއި ކޭބަލްތައް ރަނގަޅުކޮށް ވަކި އިންތިޒާމެއްގެ ދަށުން ވަޅުލުމުގެ މަސައްކަތް، އެކި ކުންފުނިތަކާ ގުޅިގެން އާރްޑީސީން އަންނަނީ ކުރަމުންނެވެ.
ބުރަ މަސައްކަތެއް ނަމަވެސް އަމީނީމަގުގެ މަސައްކަތް މިއަހަރުގެ މެދުތެރޭގައި ނިންމުމަށް އާރުޑީސީން ވަނީ އަމާޒު ކަނޑައަޅާފައެވެ.