މަސްތުވާ ތަކެއްޗާ ދެކޮޅަށް ފުލުހުން ކުރައްވާ މަސައްކަތުގެ ތެރެއިން، ގދ.ތިނަދޫގައި ހިންގެވި އޮޕަރޭޝަނެއްގައި ގިނަ އަދަދެއްގެ ބަނގުރަލާއާއެކު މީހަކު ހައްޔަރުކުރައްވައިފިއެވެ.
ތިނަދޫގައި ފުޅާ ދާއިރާއެއްގައި ބަނގުރާ ގެންގުޅޭ، އެތަކެތީގެ ވިޔަފާރިކުރާކަމަށް ފުލުހުންގެ އިންޓެލިޖެންސަށް ލިބިވަޑައިގެންނެވި މަޢުލޫމާތަކާ ގުޅިގެން އެޕްރީލް 21 ވަނަ ދުވަހު ހިންގެވި އެ އޮޕަރޭޝަނުގައި ހައްޔަރުކުރެއްވީ 33 އަހަރުގެ ދިވެހި ފިރިހެނެކެވެ.
ފުލުހުން ވިދާޅުވީ ތިނަދޫ ޕޮލިސް ސްޓޭޝަނުގައި މަސައްކަތްކުރާ ފުލުހުންނާއި ފުލުހުންގެ އިންޓެލިޖެންސް ގުޅިގެން ހިންގި އެ އޮޕަރޭޝަނުގައި އެމީހާ ދިރިއުޅެމުންދާ ތަން ބަލައިފާސްކުރިއިރު 138 ދަޅު ބިޔަރާއި 103 ފުޅި ބަނގުރާ ފެނިފައިވާ ކަމަށެވެ.
މި މައްސަލާގައި ހައްޔަރުކޮށްފައިވާ މީހާގެ ބަންދާމެދު ގޮތެއް ނިންމުމަށް ގދ.ތިނަދޫ މެޖިސްޓްރޭޓް ކޯޓަށް ޙާޟިރުކުރުމުން މިނިސްޓްރީ އޮފް ހޯމް އެފެއާަރޒުން ކަނޑައަޅުއްވާ ތަނެއްގައި ބަންދުގައި ބެހެއްޓުމަށް ހަތަރު ދުވަހުގެ މުއްދަތު ދެއްވައިފައިވާކަމަށް ފުލުހުން ވިދާޅުވެއެވެ.
މި މައްސަލަ ތިނަދޫ ޕޮލިސް ސްޓޭޝަނުން ގެންދަވަނީ ތަޙުޤީޤުކުރައްވަމުންނެވެ.