ހުޅުމާލޭގައި ސަރުކާރުން އިމާރާތްކުރައްވާ 2 ސްކޫލެއްގެ މަސައްކަތް ނާއިބު ރައީސް ބައްލަވާލައްވައިފި
ހުޅުމާލޭގައި ސަރުކާރުން އިމާރާތް ކުރަމުން އަންނަ 2 ސްކޫލެއްގެ މަސައްކަތް ކުރިއަށްދާ ގޮތް ނައިބް ރައީސް ފައިޞަލް ނަޞީމް ބައްލަވާލައްވައިފިއެވެ.
ނައިބް ރައީސް ފައިޞަލް ނަޞީމް މިއަދު ވަޑައިގެންނެވީ ހުޅުމާލެ ފުރަތަމަ ފިޔަވަހީގައި އިމާރާތް ކުރަމުން އަންނަ ސީއެޗްއެސްސީގެ އިމާރާތުގެ މަސައްކަތާއި ހުޅުމާލެ ދެވަނަ ފިޔަވަހީގައި އިމާރާތްކުރަމުން އަންނަ ޞަލާހުއްދީން ސްކޫލްގެ މަސައްކަތްތައް ބައްލަވާލެއްވުމަށެވެ.
މި ދެ ސްކޫލްގެ މަސައްކަތް ކުރިއަށްދާ ގޮތް ބައްލަވާލެއްވުމަށްޓަކައި ނާއިބު ރައީސް ކުރެއްވި ޒިޔާރަތުގައި އެމަނިކުފާނުގެ އަރިހުގައި މިނިސްޓަރ އޮފް އެޑިއުކޭޝަން ޑރ.އައިޝަތު އަލީވެސް ބައިވެރިވެވަޑައިގެންނެވިއެވެ.
ސެންޓަރ ފޯރ ހަޔަރ ސެކަންޑްރީ އެޑިއުކޭޝަން، ސީއެޗްއެސްސީގެ 8 ފަންގިފިލާގެ އިމާރާތް ހުންނަނީ ހުޅުމާލޭ ފުރަތަމަ ފިޔަވަހީގެ އައުޓްޑޯ ސްޕޯރޓްސް ކޮމްޕްލެކްސް ފުރަގަހުގައެވެ.
ހުޅުމާލެ ދެވަނަ ފިޔަވަހީގެ ހިޔާ ޓަވަރުތައް ކައިރީގައި އިމާރާތް ކުރަމުން އަންނަ ސަލާޙުއްދީން ސްކޫލަކީ 6 ފަންގިފިލާއަށް ޢިމާރާތްކުރާ ސްކޫލެކެވެ. ސްކޫލްގެ ކޮންސްޓްރަކްޝަން މަސައްކަތްތަކުގެ ބޮޑު ބައެއް މިހާރު ވަނީ ނިމިފައެވެ. 118 މިލިޔަން ރުފިޔާ ޚަރަދުކޮށްގެން އިމާރާތްކުރާ މި ސްކޫލްއަކީ 1000 އާއި 1200 ކުދިންގެ ޖާގައިގެ ސްކޫލެކެވެ.
އެޑިއުކޭޝަން މިނިސްޓްރީން މަސައްކަތް ކުރައްވަމުންދަނީ އޯގަސްޓްމަހު ފަށާ ދިރާސީ އައު އަހަރުގެ ކިޔެވުމާއެކު ސްކޫލް ހުޅުވުމަށެވެ.
ހުޅުމާލެ ދެވަނަ ފިޔަވަހީގައި މިހާރު ބޮޑު އާބާދީއެއް އަންނަނީ ދިރިއުޅެމުންނެވެ. އެގޮތުން ހިޔާ ޓަވަރުތަކުގައި ދިރިއުޅޭ އާބާދީވެސް 30000 އިން މައްޗަށް އަރައެވެ. އެހެންކަމުން ދެވަނަ ފިޔަވަހީގައި ތަޢުލީމާއި އެހެނިހެން ހިދުމަތްތައް ތަރައްޤީކުރެއްވުމަށް ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ.