ދީނީ ކަންތައްތަކާ ގުޅޭ ހަރަކާތްތައް ހިންގާ ނަމަ ބޮޑުތަނުން އަގުހެޔޮވާ ގޮތަށް، އިސްލާމީ މަރުކަޒުގެ ހޯލް ކުއްޔަށް ދޫކުރާ އުސޫލެއް އިސްލާމިކް މިނިސްޓްރީން އެކުލަވާލައްވައިފިއެވެ.
އިސްލާމިކް މިނިސްޓްރީން އެކުލަވާލާފައިވާ "އިސްލާމީ މަރުކަޒުގެ ހޯލު ކުއްޔަށް ދޫކުރުމުގައި އަމަލުކުރާނެ ގޮތުގެ އުސޫލު"ގައިވާގޮތުން ދީނީ ކަންކަމަށް ހޯލް ދޫކުރާނީ ދުވާލަކަށް 1500 ރުފިޔާއަށެވެ. އެހެންނަމަވެސް އެހެނިހެން ހަފްލާތަކަށް ހޯލް ކުއްޔަށް ދޫކުރާނީ 5000 ރުފިޔާއަށެވެ.
މި އުޞޫލްގައިވާ ގޮތުން އިސްލާމީ މަރުކަޒުގެ ހޯލު ކުއްޔަށް ދޫކުރާއިރު އެތަނުގައި ހުންނަ ގޮނޑި މޭޒާއި ޕޯޑިއަމާއި މޭޒުމަތީ އަޅާ ފޮތިގަނޑުތަކަށް ވެސް ވަކިވަކި ރޭޓް ތަކަކުން އަގު ނަގާނެއެވެ. އެއަގުތައް ވެސް ހުރީ ދީނީ ކަންތައްތަކަށް ދޫކުރާ ނަމަ އަގު ހެޔޮވާ ގޮތަށެވެ. އެގޮތުން ވީއައިޕީ ގޮޑިއެއް ދީނީ ކަމަކަށްނަމަ ކުއްޔަށް ދެނީ ދުވާލަކަށް 10 ރުފިޔާއެވެ. އެހެނިހެން ކަންތައްތަކަށް 20 ރުފިޔާއަށެވެ. އަދި އާދައިގެ ގޮނޑި ދީނީ ކަމަކަށް ނަމަ 2 ރުފިޔާއަށް އެހެން ކަމަކަށް ނަމަ 5 ރުފިޔާއަށެވެ.
ވީއައިޕީ މޭޒު ދީނީ ކަމަކަށް ނަމަ 100 އަށް ދޫކުރާއިރު އެހެން ހަފްލާއަކަށްނަމަ ދޫކުރާނީ 200 ރުފިޔާއަށެވެ.
އިސްލާމީ މަރުކަޒުގެ ހޯލު ކުއްޔަށް ދޫކުރާ އިރު އެތަނުގައި ހުރި ޕޯޑިއަމް ދީނީ ކަމަކަށް ނަމަ ދޫކުރާނީ 50 ރުފިޔާއަށެވެ. އެހެން އެހެން ކަމަކަށް ނަމަ 200ރުފިޔާއަށެވެ. ކޮރިޑޯ، ދީނީ ކަމަކަށް ނަމަ 100 އަށް އަދި އެހެން ކަމަކަށް ނަމަ 400 އަށެވެ.
ހޯލުގައި ކުރިއަށް ގެންދާ ދީނީ ހަރަކާތްތަކަށް މިނިސްޓްރީން 200 ރުފިޔާއަށް ބޯފެން ފޯރުކޮށްދޭއިރު އެހެން ކަމަކަށް ނަމަ ބޯފެން ފޯރުކޮށްދޭނީ 500 ރުފިޔާއަށެވެ.
ހޯލުގައި ކުރިއަށް ގެންދާ ހަރަކާތްތައް ވީޑިއޯ ކުރުމުގެ ޚިދުމަތް މިނިސްޓްރީން ދެއްވާއިރު ދީނީ ކަމަކަށް ނަމަ ދުވާލަކަށް 8،000 ރުފިޔާއަށް އަދި އެހެން ކަމަކަށް ނަމަ ދުވާލަކަށް 15،000 ރުފިޔާ ވީޑިއޯކޮށްދިނުމަށްވަނީ ހަމަޖެހިފައެވެ.
މިއުޞޫލްގައި ވާގޮތުން އިސްލާމީ މަރުކަޒުގެ ހޯލު ކުއްޔަށް ދޫކުރަނީ އެންމެ ގިނަވެގެން 5 ދުވަހަށެވެ. އަދި އެއަށްވުރެ މުއްދަތު އިތުރުކުރާނަމަ އެތަނުގައި ބާއްވާ ހަފްލާއާއި ޙާލަތަށް ބައްލަވާނެ ކަމަށް އުޞޫލްގައިވެއެވެ.
އިސްލާމީ މަރުކަޒު ހޯލަކީ ދީނީ ދަރުސްތަކުގެ އިތުރަށް ސަރުކާރާއި އަމިއްލަ ބައެއް ކުންފުނިތަކުގެވެސް ބައެއް އިވެންޓްތައް ބާއްވަމުން އަންނަ ތަނެކެވެ.