ރާއްޖެއިން ކެމްބޯޑިއާއަށް ދަތުރުކުރާ ދިވެހިންނަށް ވީޒާ ނެގުމަކާ ނުލައި އެޤައުމަށް އެތެރެވުމުގެ އެއްބަސްވުމަށް ޢަމަލުކުރަން ފަށައިފިއެވެ.
ވީޒާއާއި ނުލައި ދެޤައުމުގެ ރައްޔިތުންނަށްވެސް ދަތުރުކުރެވޭނެ ގޮތް ހެދުމަށް ކެމްބޯޑިއާއާއި ރާއްޖެއާ ދެމެދު އެއްބަސްވުމެއްގައި ސޮއިކުރެއްވީ މިއަހަރުގެ ޖެނުއަރީ މަހުގެ ކެމްބޯޑިއާގެ ބޮޑުވަޒީރު ސަމްދެކް އައްކާ މޮހަ ސެނާ ޕަޑައި ޓެކޯ ހުން ސެން ރާއްޖެއަށް ކުރެއްވި ރަސްމީ ދަތުރުފުޅުގެ ތެރެއިންނެވެ.
މިއެއްބަސްވުމަށް އަމަލުކުރަން ފެށުމާއި ގުޅިގެން ޚާރިޖީ ވަޒީރު ޢަބްދުﷲ ޝާހިދު ކުރެއްވި ޓުވީޓުގައި ވިދާޅުވީ ކެމްބޯޑިއާއާއި ރާއްޖެއާ ދެމެދު ވެފައިވާ ވީޒާ އެގްޒެމްޝަންގެ ދަށުން މިއަދުން ފެށިގެން ކެމްބޯޑިޔާއަށް ދަތުރުކުރާ ދިވެހިންނަށް 30 ދުވަހުގެ މުއްދަތަށް އޮން-އެރައިވަލް ވިސާ ލިބޭނެކަމަށެވެ.
ރާއްޖެއާއި ދުނިޔޭގެ ޤައުމުތަކާ ދެމެދު އޮންނަ ގާތްގުޅުމުގެ ދަށުން އެ ޤައުމުތަކުން އަންނަނީ ރާއްޖެއަށް އޮންއެރައިވަލް ވިސާ ހަމަޖައްސާދެމުންނެވެ. އެގޮތުން މިހާރުވެސް 90 އަށްވުރެ ގިނަ ޤައުމުތަކުން އޮންއެރައިވަލް ވިސާ ދިވެހިންނަށް ލިބެއެވެ.
ކުރިން ވިސާ ނެގުމަކާއި ނުލައި ދިވެހިންނަށް ދަތުރުކުރެވޭ ޤައުމުތައް އިތުރުވަމުންދިއުމާއެކު ސަރަހައްދީގޮތުންވެސް އެންމެ ބާރުގަދަ އެއް ޕާސްޕޯޓަށް ދިވެހި ޕާސްޕޯޓްވަނީ ވެފައެވެ.