ރާއްޖޭގައި ގައިންގަޔަށް ނާރާ ބަލިތައް މަދުކޮށް އެ ބަލިތައް އަވަހަށް ދެނެގަނެގެން، ފަރުވާ ދިނުމަަަަަަަަށްޓަކައި ޕްރައިމަރީ ހެލްތު ކެއަރގެ ހިދުމަތް ހަރުދަނާކުރެއްވުމުގެ މަސައްކަތް ސަރުކާރުން ފަށްޓަވައިފިއެވެ.
ޕްރައިމަރީ ހެލްތު ކެއަރ ނިޒާމް ރަސްމީކޮށް އިފްތިތާހުކޮށްދެއްވީ ފ. ނިލަންދޫގައި އެކަމަށްޓަކައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާގެ ނައިބު ފައިޞަލް ނަޞީމްއެވެ.
ޕްރައިމަރީ ހެލްތު ކެއަރ އިތުރަށް ފުޅާކުރައްވައި، ހަރުދަނާ ކުރެއްވުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ސަރުކާރުން ވަރަށް ބޮޑު އިސްކަމެއް ދެއްވައިގެން ފައްޓަވާފައިވާ މަސައްކަތްޕުޅެކެވެ.
ޕްރައިމަރީ ހެލްތުގެ ކެއަރ ނިޒާމަކީ ޞިއްޙީ ޚިދުމަތް ދިނުމުގައި ހަމައެކަނި ފަރުވާ ދިނުމުގެ އިތުރުން، ބަލިތަކުން ދުރާލާ ރައްކާތެރިވެ، ދުޅަހެޔޮ ދިރިއުޅުމަކަށް މަގުފަހިކޮށްދެއްވުމުގެ ގޮތުން ޞިއްޙީ މަޢުލޫމާތު ދިނުމާއި ތިމާގެ ޞިއްޙީ ޙާލަތު ދެނެގަތުމަށް ހަދަންޖެހޭ ޓެސްޓުތައް ހެދުމާއި، މީހާގެ ޞިއްޙީ ޙާލަތާއި ދިރިއުޅުމުގެ ޙާލަތަށް ރިޢާޔަތްކޮށް، އެމީހަކަށް ނުވަތަ އެ މުޖްތަމަޢުއަކަށް އެންމެ އެކަށީގެންވާ ގޮތަކަށް ފަރުވާ އާއި އެހެނިހެން ޚިދުމަތްތައް އިންތިޒާމުކުރެެއްވުމެވެ.
މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް ހެލްތު އަޙްމަދު ނަޞީމް ވިދާޅުވީ ޕްރައިމަރީ ހެލްތު ކެއަރ ނިޒާމަކީ ރާއްޖެއަށް އާ ކަމެއް ނޫންކަމަށާއި ކުރިން ރާއްޖޭގައި ފެތުރެމުން އައި ބޮޑެތި ބަލިތައް ނައްތާލުމުގައި އެންމެ އިސްދައުރެއް އަދާކުރީ ޕްރައިމަރީ ހެލްތު ކެއަރ ނިޒާމްކަމަށެވެ. ނަސީމް ވިދާޅުވީ އޭރު އެ ނިޒާމް ހިންގަވަން ތިއްބެވީ ހެލްތް ވޯކަރުންކަމަށާއި އަދި ޕްރައިމަރީ ހެލްތު ކެއަރގެ ނިޒާމަކީ ރާއްޖެފަދަ ގައިންގަޔަށް ނާރާ ބަލިތައް އިތުރުވަމުން އަންނަ ޤައުމަކަށް މުހިއްމު ނިޒާމެއްކަމަށެވެ.
މިނިސްޓަރ ވިދާޅުވީ އަލުން ޕްރައިމަރީ ހެލްތު ކެއަރ ނިޒާމް ފެށުމާއެކު ރައްޔިތުންނަށް އަވަހަށް ބަލިތައް ދެނެގަނެ ފަރުވާ ހޯދަން ފަސޭހަވެގެންދާނެކަމަށެވެ.
"ޕްރައިމަރީ ހެލްތު ކެއަރ ނިޒާމްގެ މަސައްކަތް ކުރާއިރު އުއްމީދަކީ މި މަސައްކަތް ފުޅާވެ، ހުރިހާ ރަށެއްގައި މަސައްކަތް ފެށުން. މިކަމުގެ ފައިދާ ރައްޔިތުންނަށް ކުރާނެކަމަށް އުއްމީދު ކުރަން." މިނިސްޓަރ އޮފް ހެލްތް އަޙްމަދު ނަޞީމް ވިދާޅުވިއެވެ.
ޒަމާނުއްސުރެ ރާއްޖޭގައި ދެމުން އަންނަ ޕްރައިމަރީ ހެލްތު ކެއަރގެ ޚިދުމަތްތައް، އޭގެ އަސާސްތަކަށް ބިނާކޮށް އަލުން ދިރުވާ އާލާކުރުމުގެ ސިޔާސަތުގެ ދަށުން، މި މަސައްކަތް ފުރަތަމަ ފ.އަތޮޅުގައި ފެށިނަމަވެސް، ފ.އަތޮޅުގެ ތަޖްރިބާގެ އަލީގައި، މި މަސައްކަތް މުޅި ރާއްޖެއަށް ފުޅާކުރެވިގެންދާނެކަމަށް ހެލްތް މިނިސްޓްރީން ވިދާޅުވެއެވެ.
ހެލްތް މިނިސްޓްރީން ވަނީ ޕްރައިމަރީ ހެލްތު ކެއަރ ޚިދުމަތް ދިނުމުގައި ޢަމަލު ކުރާނޭ އައު "ކެއަރ ޕަރތްވޭ"އެއް އެކުލަވާލާފައެވެ.
މި މަސައްކަތުގެ އެންމެ މުހިއްމު ބައިތަކަކީ، ރައްޔިތުންގެ ޞިއްޙީ ޙާލަތުގެ މަޢުލޫމާތު އެއްކުރެވި އެއް ވިއުގައެއްގެ ތެރެއިން، ކޮންމެ ރަށަކުންވެސް، ނުވަތަ މަރުކަޒަކުންވެސް ބޭނުންވެއްޖެ ޙާލަތްތަކުގައި ބެލޭނެ އިންތިޒާމް ހަމަޖައްސަައި، ޞިއްޙީ އެހީތެރިކަމާއި ފަރުވާ ދިނުމުގައި އެ މަޢުލޫމާތުތައް ބޭނުން ކުރުމެވެ. އަދި ޓެސްޓުތައް ވަކި މުއްދަތެއްގައި އަލުން ހަދަންޖެހޭ މީހުންނާއި މުޢާމަލާތް ކުރުމާއި އެހެން މަރުކަޒަކަށް ރިފަރ ކުރެވޭ ޙާލަތުގައިވެސް އެޕޮއިންޓްމެންޓް ހަމަޖެއްސުންފަދަ ކަންކަމުގައި މަރުކަޒުން އެހީތެރިވެދޭކަމަށްވެސް ހެލްތް މިނިސްޓްރީން ވިދާޅުވެއެވެ.
ހެލްތް މިނިސްޓްރީން ވިދާޅުވީ ޕްރައިމަރީ ހެލްތްކެއަރ ނިޒާމްގެ ސަބަބުން ރާއްޖޭގެ ރައްޔިތުންގެ ޞިއްޙީ ދުޅަހެޔޮކަން އިތުރުކުރުވިގެން ދާނެކަމަށެވެ. ހެލްތު މިނިސްޓްރީން ވިދާޅުވީ ޕްރައިމަރީ ހެލްތު ކެއަރގެ ލަނޑުދަނޑިތައް ޙާޞިލުކުރުމަށް، ރަށު ފެންވަރުގައި މަސައްކަތްކުރާ ޞިއްހީ ޚިދުމަތްތެރިން މަސައްކަތް ކުރާނީ އެއް ޓީމެއްގެ ގޮތުގައި އެހެނިހެން މުއައްސަސާތަކާއި ޖަމްއިއްޔާ ޖަމާޢަތްތަކާ ގުޅިގެންކަމަށެވެ. އަދި ޢާއިލާތަކަށް ޒިޔާރަތްކޮށް ރައްޔިތުންގެ ޞިއްޙީ މައްސަލަތަށް ޙިއްޞާ ކުރެވި ދުރާލާ ދެނެގަނެވި ޖިސްމާނީ، ނަފުސާނީ އަދި އިޖްތިމާޢި ދުޅަހެޔޮކަން ދެމެހެއްޓެނިވި ގޮތެއްގައި ކަށަވަރުވެގެން ދިއުމަކީ، މި މަޝްރޫޢުގެ ދިގުމުއްދަތުގެ އަމާޒުކަމަށް ހެލްތު މިނިސްޓްރީން ވިދާޅުވެއެވެ.
މި ރަސްމިއްޔާތުގައި ވަނީ ޕްރައިމަރީ ހެލްތު ކެއަރގެ ޚާއްސަ ރަޖިސްޓްރޭޝަން ޕޯޓަލްއެއް އިފްތިތާޙްކުރައްވާފައެވެ. ޕޯޓަލް އިފްތިތާޙުކޮށްދެއްވީ މި ރަސްމިއްޔާތުގެ ޝަރަފުވެރި މެހެމާން، ނައިބް ރައީސް ފައިޞަލް ނަޞީމްއެވެ.