މިދިޔަ އަހަރު އޯލެވެލް އިމްތިޙާނުން އެންމެ ރަނގަޅު ނަތީޖާ ހޯދައިގެން ޤައުމީ ގަދަ 10ގައި ހިމެނުނު ދަރިވަރުންނަށް އެވޯޑް ދިނުމަށް ބާއްވާ ޖަލްސާ މިމަހުގެ މެދުތެރޭގައި ބޭއްވެވުމަށް އެޑިއުކޭޝަން މިނިސްޓްރީން ނިންމަވައިފިއެވެ. އެގޮތުން އޯލެވެލް ގަދަ 10 ގައި ހިމެނުނު ދަރިވަރުންނަށް އެވޯޑް ދިނުމަށް ހަމަޖެހިފައިވަނީ މިމަހުގެ 17 ވަނަ ދުވަހާއި 18 ވަނަ ދުވަހުއެވެ.
އެޑިއުކޭޝަން މިނިސްޓްރީން ވިދާޅުވީ 2 ދުވަހަކަށް ބަހާލައިގެން އޯލެވެލް ގަދަ 10ގައި ހިމެނުނު ދަރިވަރުންނަށް އެވޯޑް ދިނުމަށް ނިންމެވެވީ ގަދަ 10 ގައި ހިމެނުނު ދަރިވަރުންގެ ޢަދަދު ގިނަވުމާއި ގުޅިގެންކަމަށެވެ. މިގޮތުން މިއަހަރު ޖުމުލަ 844 ދަރިވަރަކު ގަދަ 10ގައި ހިމެނި، އެވޯޑް ދިނުމަށް ހަމަޖެހިފައިވެއެވެ. އޭގެ ތެރޭގައި 499 އަންހެން ދަރިވަރަކާއި 348 ފިރިހެން ދަރިވަރަކު ހިމެނެއެވެ. މިދިޔަ އަހަރު އޯލެވެލް އިމްތިހާނު ހަދާފައިވަނި 5939 ދަރިވަރުންނެވެ.
މީގެ އިތުރުން މިމަހުގެ 31 ވަނަ ދުވަހު އޭލެވެލް ގަދަ 10ގައި ހިމެނުނު ދަރިވަރުންނަށް އެވޯޑް ދިނުމުގެ ރަސްމިއްޔާތު ބޭއްވުމަށްވެސް އެޑިއުކޭޝަން މިނިސްޓްރީން ވަނީ ނިންމަވާފައެވެ. މިދިޔަ އަހަރު އޭލެވެލް އިމްތިޙާނު 2849 ދަރިވަރުން ހެދިއިރު ގަދަ 10 ގައި 441 ދަރިވަރަކު ހިމެނުނެވެ. އޭގެ ތެރޭގައި ހިމެނެނީ 266 އަންހެން ދަރިވަރުންނާއި 155 ފިރިހެން ދަރިވަރުންނެވެ.
އޯލެވެލް އަދި އޭލެވެލް އިމްތިހާނުގެ ގަދަ 10ގައި ހިމެނޭ ދަރިވަރުންނަށް އެވޯޑް ދިނުމަށް ބާއްވާ ރަސްމިއްޔާތުގައި އެކި މާއްދާތަކުން ވަނަވަނަތަކަށް އައި ދަރިވަރުންނަށާއި، ދުނިޔޭގެ ލެވެލްގައި ވަނަތަކަށް އައި ދަރިވަރުންނަށް އެވޯޑް ދެއްވައެވެ. މީގެ އިތުރުން ރައީސުލްޖުމްހޫރިއްޔާގެ ޚާއްސަ އިނާމްވެސް އެ ދަރިވަރުންނަށް ދެއްވާނެއެވެ.