ތިލަމާލެ ބްރިޖުގެ މަސައްކަތް ކުރާތީ އެ ސަރަޙައްދުގައި ހިމެނޭ ކަނޑުއޮޅި ހުރަސްކޮށް ދަތުރުކުރު ނުކުރެއްވުމަށާއި، އެ ސަރަޙައްދުން ދަތުރުކުރާ ފަރާތްތަކާމެދު ފިޔަވަޅު އަޅުއްވާނެކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން ވިދާޅުވެއްޖެއެވެ.
ތިލަމާލެ ބްރިޖުގެ މަސައްކަތް ކުރާތީ މާލެ-ވިލިމާލެ އަދި ވިލިމާލެ-ގުޅިފަޅުގެ ކަނޑުއޮޅި ހުރަސްކޮށް ދަތުރުކުރުން މަނާކޮށްފައި އޮތްނަމަވެސް އެސަރަޙައްދުން ދަތުރުކުރުން އިތުރުވުމާ ގުޅުގެން މިނިސްޓްރީން ނެރުއްވި ބަޔާނުގައި ވިދާޅުވީ، އެ ސަރަހައްދުން ދަތުރުކުރުން މިދިޔަ އަހަރުގެ އޮގަސްޓް 15 އިން ފެށިގެން މަނާކޮށްފައިވާނެކަމަށެވެ. ނަމަވެސް މިހާރަކަށް އައިސް ގިނަ އުޅަނދުތަކުން އެ ކަނޑުއޮޅި ބޭނުންކުރަމުންދާ ކަމުގެ ޝަކުވާ ލިބޭ ކަމަށް ޓްރާންސްޕޯޓް މިނިސްޓްރީން ވިދާޅުވިއެވެ. އެހެންކަމުން ރާއްޖޭގެ ކަނޑުގެ ސަރަހައްދުގައި ދުއްވާ ލޯކަލް އުޅަނދުފަހަރު ދުއްވުމުގެ ލައިސަންސާ ބެހޭ ޤަވާއިދުގެ ދަށުން، އެ ސަރަޙައްދުން ދަތުރުކުރާ އުޅަނދުތައް ދުއްވާ މީހުންގެ ލައިސަންސް އެއް މަސް ދުވަހަށް ހިފަހައްޓާނެކަމުގެ އިންޒާރު މިނިސްޓްރީން ވަނީ ދެއްވާފައެވެ.
ތިލަމާލެ ބުރިޖު އެޅުމުގެ މަސައްކަތް ކުރިއަށްދާ ވަގުތުތަކުގައި މާލެ އާއި ވިލިމާލެއާ ދެމެދު އޮންނަ ކަނޑުއޮޅިން ދަތުރުފަތުރު ކުރުމަކީ ރައްކާތެރިކަމަކަށް ނުވާތީ އެ ސަރަހައްދު ވަނީ ބަންދުކޮށްފައެވެ. އަދި ދެކުނުގެ އަތޮޅުތަކުން ގާދޫކޯ ހުރަސްކޮށް ދަތުރު ކުރާ އުޅަނދުފަހަރަށް، މާލެ އާއި ހުޅުމާލެއާ ދެމެދު ގާއިމުކޮށްފައިވާ ބްރިޖު ސަރަހައްދުން ދަތުރުކުރުމަށް އެ ސަރަހައްދު އާއްމުކޮށް ހުޅުވާލާފައިވާކަންވެސް މިނިސްޓްރީން ފާހަގަކުރައްވައެވެ.
ތިލަމާލެ ބްރިޖް މަޝްރޫޢުގެ ދަށުން މިހާރު އެންމެ ބާރަށް ކުރިއަށްދަނީ ބްރިޖްގެ ތަނބުތަކުގެ މަސައްކަތްތަކެވެ. އެގޮތުން މާލޭގެ އެއްގަމުންޖަހާ 3 ތަނބުގެ މަސައްކަތް ނިމި، މިހާރު ކުރަމުންދަނީ ކަނޑުގަ ޖަހާ ދެ ތަނބުގެ ޕައިލިން މަސައްކަތެވެ. މީގެ އިތުރަށް ވިލިމާލޭގެ އެއްގަމުން ޖަހާ 7 ތަނބުގެ ޕައިލިން މަސައްކަތް މިހާރު ވަނީ ފަށާފައެވެ.