ސަރުކާރުގެ ސިޔާސަތަކީ، ތަފާތު ދާއިރާތަކުގެ ހުނަރާއި ފަންނުވެރިކަން ހުރި ޒުވާނުން އެ ދާއިރާތަކުން ކުރިއަރައި ދިޔުމަށް މަގު ކޮށައިދީ، އުފެއްދުންތެރި ޒުވާނުން ބިނާ ކުރުންކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ފަރުމާ އިންޓަރނޭޝަނަލް ޔޫތު އާޓް ފެސްޓިވަލް 2023 ހުޅުއްވައިދެއްވައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގައި ތިބި ފަންނުވެރިންނާއި ހުނަރުވެރީން އަދި މަސައްކަތްތެރީން ކުރައްވާފައިވާ އަގުހުރި ތާރީޚީ މަސައްކަތްކުގެ މައްޗަށް އަލިއަޅުއްވާލެއްވިއެވެ. މިގޮތުން އެމަނިކުފާނު ވިދާޅުވީ ރާއްޖެއަކީ ތަފާތު ހުނަރުތަކުން ފުރިފައިވާ އެތައް ފަންނުވެރިންނެއްގެ ފާޑުވެރިކަމަށް ހެކިދޭ ދިގު ތާރީޚެއް އޮތް ޤައުމެއްކަމަށެވެ. އެގޮތުން ދިވެހިންގެ ފަންނުވެރި މަސައްކަތްތަކުގެ ތެރެއިން ގަލުވަޑާމާއި، ލާފެންކުރުމާއި، ތެދުއުއި ވަޑާމާއި ކިއްސަރުވަޑާމުގެ މަސައްކަތްތަކާއި، ކުޅިވަރާއި މުނިފޫހި ފިލުވުމުގެ ފަންނުތައް އެމަނިކުފާނު ފާހަގަކުރެއްވިއެވެ.
"އަޅުގަނޑުމެން މިއަދު ލިޔަމުން މިދަނީ ޒަމާނުގެ މުޅިން އައު ޞަފުޙާއެއް. ޖީލުތަކަކަށްފަހު ދިވެހި ރާއްޖެއަށްވެސް ވަރަށް ބޮޑު ބަދަލުތަކެއް އަތުވެއްޖެ. ދިވެހި ކާބަފައިންގެ ފަންނުވެރިކަމާއި ހުނަރުވެރިކަން މިއަދުގެ ޖީލަށް ވާރުތަވިއިރު އެދަރިންގެ ފަރާތުން ފެންނަނީ މުނުޅިން އައު ހުނަރުތަކެއް. ނަމަވެސް ކަންކުރުމުގައި ދިވެހިންގެ ފާޑުވެރިކަން ކެނޑިގެން ނުދޭ." ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ، ފަންނުވެރިކަމަކީ، އިންސާނީ ވަސީލަތް ތަރައްޤީކުރުންކަމަށާއި، އެއީ ޤައުމީ ތަރައްޤީގެ ތަފާތު ދާއިރާތަކަށް ބޭނުންވާ މީހުން ބިނާކުރުންކަމަށެވެ. އަދި ޤައުމު، ޤައުމަކަށް ވަނީ، ޒަމާނީ ވިސްނުންތަކާއެކު އެތަނެއް ތަރައްޤީކޮށް ކުރިއަރުވާނެ ހުނަރުވެރި ފަންނުވެރިން ކުރާ ބުރަމަސައްކަތުން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ފަރުމާ އިންޓަރނޭޝަނަލް ޔޫތު އާރޓް ފެސްޓިވަލާއި ގުޅޭގޮތުން ރައީސުލްޖުމްހޫރިއްޔާ ވިދާޅުވީ، މިފެސްޓިވަލްގައިވެސް ތަފާތު ދާއިރާތަކުގެ ފަންނުވެރި އެތައް ދިވެހިންނެއް ބައިވެރިވާކަމީ، މީހުން ބިނާކުރުމަށް ސަރުކާރުން ކުރާ މަސައްކަތަށް ލިބޭ ވަރަށް ބޮޑު ހިތްވަރެއްކަމަށެވެ. އަދި މިފެސްޓިވަލުގައި ދިވެހި ފަންނުވެރިން ބައިވެރިވާ ކޮންމެ ދާއިރާއަކީވެސް، ޤައުމީ ތަރައްޤީގައި މުހިންމު ދައުރެއް އަދާކުރާ ދާއިރާއެއްކަމުގައި ރައީސުލްޖުމްހޫރިއްޔާ ވިދާޅުވިއެވެ. ރައީސް ވިދާޅުވީ ސަރުކާރުގެ ސަރުކާރުގެ ސިޔާސަތަކީ، ތަފާތު ދާއިރާތަކުގެ ހުނަރާއި ފަންނުވެރިކަން ހުރި ޒުވާނުން އެ ދާއިރާތަކުން ކުރިއަރައި ދިޔުމަށް މަގު ކޮށައިދިނުންކަމަށްވެ. އަދި ހީނަރުވެފައިވާ ފަންނުވެރިކަން ދިރުވާ އާލާކުރުމުގެ މަސައްކަތްވެސް ކުރައްވަމުން އަންނަކަމަށް ރައީސް ވިދާޅުވިއެވެ.
"ފަތުރުވެރިކަމުގެ ސިނާޢަތުގައި ފަންނުވެރިންގެ ހުނަރުތައް އަންނަނީ ޤައުމީ ތަރައްޤީގައި ވަރަށްބޮޑު ހިއްސާއެއް އަދާކުރަމުން. މީގެ ކުރިންވެސް ކިތަންމެ ފަންނުވެރިން ރާއްޖޭގައި އެބަތިބި. ފަންނުވެރި ހުނަރުވެން ރާއްޖޭގައި ތިބިނަމަވެސް އެމީހުންގެ ހުނަރުވެރިކަން ދައްކާލުމުގެ ފުރުޞަތު ދާދިފަހަކާއި ޖެހެންދެންވެސް އޮތީ ވަރަށް ހަނިގޮތެއްގައި. ނަމަވެސް ސަރުކާރާއި އަމިއްލަ ފަރާތްތަކުން އިންތިޒާމްކުރާ މިފަދަ ފެސްޓިވަލްތަކުގެ ސަބަބުން އެފުރުޞަތު މިހާރު އޮތީ ކުރިއަށްވުރެ ބޮޑަށް ޒުވާނުންނަށް ހުޅުވިފައި" ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހް ވިދާޅުވިއެވެ.
ފަރުމާ އިންޓަރނޭޝަނަލް ޔޫތު އާރޓް ފެސްޓިވަލް 2023ގައި، 8 ޤައުމަކުން 80 އަށްވުރެ ގިނަ ފަންނުވެރިން ބައިވެރިވެފައިވެއެވެ. މިއީ ރާއްޖޭގައި ބާއްވާ ބައިނަލްއަޤުވާމީ މިފަދަ ފުރަތަމަ އާޓް ފެސްޓިވަލެވެ. މިފެސްޓީވަލް ކުރިޔަށްދާނީ މިމަހުގެ 13 ވަނަ ދުވަހުގެ ނިޔަލަށް ސޯޝަލް ސެންޓަރުގައެވެ.
ރައީސުލްޖުމްހޫރިއްޔާ ވަނީ މި ފެސްޓިވަލްގައި ހުރި ސްޓޯލްތަކަށް ޒިޔާރަތްކުރައްވާ ބައްލަވާލައްވާފައެވެ.