ދިވެހި ދަޢުލަތުގެ މީޑިއާގެ ޓެލެވިޜަން މޯލްޑިވްސްއަށް ކޮށްދެއްދި ޚިދުމަތްތައް ފާހަގަކޮށް ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަޙްމަދު އާދަމަށް ޕަބްލިކް ސަރވިސް މީޑިއާ، ޕީ.އެސް.އެމްއިން ޝަރަފުގެ ހަނދާނީ ފިލައެއް އަރުވައިފިއެވެ.
އަޙްމަދު އާދަމަށް މި ފިލާ އަރުވާފައިވަނީ ޓީވީއެމްއަށް 45 އަހަރު ފުރުމާދިމާކޮށް، ޕީ.އެސް.އެމްގެ މެނޭޖިންގ ޑިރެކްޓަރ ޢަލީ ޚާލިދެވެ. މި ފިލާ އެމަނިކުފާނަށް އަރުވާފައިވަނީ ދިވެހި ދައުލަތުގެ ޓީވީ މެދުވެރިކޮށް، ދިވެހި ރައްޔިތުންނަށް ޓެލެކާސްޓްގެ ޚިދުމަތް ދިނުމަށާއި، މި ޚިދުމަތް ކުރިއެރުއްވުމުގައި އަދާކުރެއްވި މުހިއްމު ދައުރުގެ އަގުވަޒަންކުރެއްވުމުގެ ގޮތުންނެވެ.
ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަޙްމަދު އާދަމަކީ ރާއްޖޭގެ މިޒަމާނުގެ ތަރައްޤީއާއި ކުރިއެރުމުގައި އާދަޔާޚިލާފު މަސައްކަތްޕުޅުތަކެއް ކޮށްދެއްވި އަދި އެބޭފުޅެއްގެ މަސައްކަތްޕުޅުތައް މިއަދުވެސް ވަރަށް ގާތުން ފެންނަ ބޭފުޅެކެވެ.
އަޅުގަނޑުމެން މިއަދު މިދެކޭ ޒަމާނީ ބްރޯޑްކާސްޓިންގ ނިޒާމު ރާއްޖޭގައި ވުޖޫދަށް ގެނައުމުގައި އަޙްމަދު އާދަމުގެ މަސައްކަތްޕުޅާއި ޚިދުމަތްޕުޅަކީ ފާހަގަކޮށްލެވޭ މުހިއްމު ޚިދުމަތްތަކެކެވެ. ރާއްޖޭގައި ޓެލެވިޜަންގެ ޚިދުމަތް ދެއްވަން ރައީސް އިބްރާހީމް ނާޞިރު ނިންމަވައި، އެކަމުގެ ޢަމަލީ މަސައްކަތް ފެށްޓެވިއިރު، އެ ހުރިހާ ކަމެއް ބެލެހެއްޓެވުމުގެ އެންމެ އިސް ބޭފުޅަކަށް ހަމަޖެއްސެވީވެސް، އަޙްމަދު އާދަމެވެ.
ރައީސް ނާޞިރު އެ މަސައްކަތް ގެންދެވީ، އަޙްމަދު އާދަމްގެ ލަފާފުޅުގެ މަތިންނެވެ. އޭރު އެންމެބޮޑު ދަތިކަމަކަށް ދިމާވީ، ޓީ.ވީ.އެމްގެ ޓަވަރު ބެހެއްޓުމުގެ މަސައްކަތެވެ. ޓަވަރު ބެހެއްޓުމަށް ނިންމެވީ މާލޭގެ ދެކުނު ފަރާތުން އަތިރިމަތީގައި ކަމަށްވުމުން، އޭރު އެތަނުގެ ޙާލަތު އޮތްގޮތް، މިއަދުގެ ޖީލަށް ވަޒަންވެސް ނުކުރެވޭނެއެވެ. ޓަވަރު ބެހެއްޓުމުގެ މަސައްކަތް މޫދުގައި ފެންގަނޑުގެ ތެރޭގައި ކުރައްވަމުން ގެންދެވިއިރު، ޓަވަރުގެ ބުޑު ހެދުމުގައި ކުރިމަތިވެވަޑައިގެންނެވި ދަތިތައް އަޙްމަދު އާދަމްގެ ހިތްޕުޅުގައި، އިއްޔެވީ ކަމެއްގެ ގޮތުގައި މިއަދުވެސް، ހަނދުމަފުޅު އެބަހުއްޓެވެ.
ޓަވަރު ރޭވުމުގެ މަސައްކަތް އަޙްމަދު އާދަމް އިސްވެ ހުންނަވައިގެން ކުރެއްވުން އެއީ، އެމަނިކުފާނު ކުރެއްވި ވަރަށް އާދަޔާޚިލާފު ތަޖުރިބާއެކެވެ. ޓީ.ވީ. މޯލްޑިވްސްގެ ޓަވަރު ބެހެއްޓުމުގެ ތެރޭގައި، ޓީ.ވީ.ގެ ޢިމާރާތް ބިނާކުރުމުގެ މަސައްކަތްވެސް ހިނގަމުންދިޔައީ، ސީދާ އަޙްމަދު އާދަމްގެ ބެއްލެވުމުގެ ދަށުންނެވެ.
އަޙްމަދު އާދަމް ސަރުކާރަށް ޚިދުމަތް ކުރައްވަން ފެށްޓެވީ 1 ފެބުރުވަރީ 1959 ގައި [މޯލްޑިވް ސްޓާރ]ގެ އެޕްރެންޓިސް އިންޖިނިއަރގެ މަޤާމުންނެވެ. ރާއްޖޭގެ ނިސްބަތުން ބަލާއިރު، އެ ދުވަސްވަރަކީ އިންޖިނިއަރިންގގެ ރޮނގުން ކުރިއަށް ވަޑައިގެންފައިވާ ބޭފުޅުން ވަރަށްމަދު ދުވަސްވަރެއްކަމުން، އަޙްމަދު އާދަމް ފާހަގަކުރެވިފައިވަނީ، ޤައުމީ ޚިދުމަތުގައި ރެޔާއިދުވާލު ވަރުބަލިފުޅުވުމެއްނެތި މަސައްކަތްޕުޅު ކުރެއްވި ބޭފުޅެއްގެ ގޮތުގައެވެ.
ދ. މާއެނބޫދުއަށް އުފަން އަޙްމަދު އާދަމަކީ، ތުއްޕުޅުއިރުއްސުރެ ތަޢުލީމަށް ވަރަށްބޮޑު އަހަންމިއްޔަތު ކަމެއް ދެއްވި ބޭފުޅެކެވެ. އިންޖިނިއަރިންގގެ ރޮނގުން ކުރިއަށް ވަޑައިގަތުމަކަށް އޭރު އެއްވެސް ޝައުޤުވެރިކަމެއްނެތެވެ. ސިލޯނުގައި ކިޔަވައިވިދާޅުވިއިރު، އިންޖިނިއަރިންގއާ ގުޅޭ އެކިއެކި ތަމްރީނުތައް އަޙްމަދު އާދަމް ފުރިހަމަކުރެއްވިއެވެ. އޭގެތެރޭގައި، އެޕްރެންޓިސްޝިޕް ތަމްރީނުތައްވެސް ހިމެނެއެވެ. އިންޖިނިއަރިންގގެ ރޮނގުން ކުރިއަށް ވަޑައިގަތުމުގެ ޝައުޤުވެރިކަން އުފެދުނީ ތަޢުލީމު ހާސިލު ކުރައްވައި ނިންމެވުމަށްފަހު، ރާއްޖެ ވަޑައިގެންނެވި ފަހުންނެވެ.
އަޙްމަދު އާދަމަކީ އޭރުވެސް އެކިއެކި މަސައްކަތްތައް ކުރެއްވުމުގައި ވަރަށް ވިސްނުންފުޅު ތޫނު އަދި ހިންގުންތެރި ބޭފުޅެކެވެ. އެޕްރެންޓިސްޝިޕް ތަމްރީނުތައް އަޙްމަދު އާދަމް ފުރިހަމަކުރައްވާފައި ވުމާއެކު، ސަރުކާރުން ރާއްޖެއަށް އެންމެ ފުރަތަމަ ބައްލަވައިގަނެގެން ގެންނެވި އާގުބޯޓު [މޯލްޑިވްސް ސްޓާރ]ގެ ޖޫނިއަރ އިންޖިނިއަރަކަށް ވަޑައިގަތުމުގެ ފުރުޞަތު އަޙްމަދު އާދަމަށް ލިބިވަޑައިގެންނެވިއެވެ.
އޭގެ ދުވަސްކޮޅެއް ފަހުން އިންޖިނިއަރިންގގެ ރޮނގުން މަތީ ތަޢުލީމު ހާސިލު ކުރެއްވުމަށް އިނގިރޭސިވިލާތަށް ވަޑައިގަތުމުގެ ފުރުޞަތު، އޭރުގެ ވަޒީރުލްއަޢުޡަމް އިބްރާހީމް ނާޞިރު، އަޙްމަދު އާދަމަށް ހޯއްދަވައިދެއްވިއެވެ. އަޙްމަދު އާދަމް، އިނގިރޭސިވިލާތުން ތަޢުލީމު ހާސިލު ކުރައްވައި ނިންމަވައި އެނބުރި ރާއްޖެ ވަޑައިގަތުމަށްފަހު މަސައްކަތް ފެށްޓެވީ، އިލެކްޓްރިކް ޑިޕާޓްމަންޓްގައެވެ. 22 ޖޫން 1964 ގައި އެތާނގެ މެނޭޖަރު ކަމުގެ މަގާމު އަޙްމަދު އާދަމަށް ދެއްވިއެވެ.
އޭގެފަހުން، ޑިޕާޓްމަންޓް އޮފް އިލެކްޓްރިސިޓީގެ ޑިރެކްޓަރު ކަމުގެ މަގާމުވެސް އެމަނިކުފާނު ފުރުއްވިއެވެ. އަޙްމަދު އާދަމް އެ މަގާމުގައި ހުންނަވައިގެން ކުރެއްވި މަސައްކަތްޕުޅުތަކަކީ، ޝުކުރުވެރިވުން ޙައްޤު މަސައްކަތްޕުޅުތަކެކެވެ. މާލެއަށް ބޭނުންވާ ކަރަންޓުގެ ފެންވަރު ރަނގަޅު ކުރެއްވުމަށް އޭރު ފެށްޓެވި އެކި މަޝްރޫޢުތައް ކާމިޔާބުކަމާއެކު ހިންގެވުމުގައި ޢަމަލީގޮތުން އަޙްމަދު އާދަމް ބައިވެރިވެވަޑައިގެންނެވިއެވެ.
ރާއްޖޭގައި އެންމެ ފުރަތަމަ ޔޮޓުދޯނިފަހަރު ބަންނަން ފެށުނުއިރު އެކަމުގައިވެސް އަޙްމަދު އާދަމް އިސްނަންގަވައިގެން ކުރެއްވި މަސައްކަތްޕުޅުތައް ފާހަގަކޮށްލެވެއެވެ. އަޙްމަދު އާދަމަކީ ރާއްޖޭގެ ފަތުރުވެރިކަމުގެ ދާއިރާގައިވެސް މުހިއްމު ޚިދުމަތްތަކެއް ކުރެއްވި ބޭފުޅެކެވެ. އެމަނިކުފާނަކީ ބަނޑޮސް އައިލެންޑް ރިޒޯޓުގެ ފުރަތަމަ މެނޭޖަރެވެ. އަދި ބަނޑޮހުގެ ހިއްސާދާރެއްވެސްމެއެވެ.
ޤައުމީ ޚިދުމަތް ފެށްޓެވީއްސުރެ އަޙްމަދު އާދަމަކީ، އެކި ކަންކަމުގައި އާދަޔާޚިލާފު ވިސްނުންފުޅުތަކެއް ގެންގުޅުއްވި ބޭފުޅެކެވެ. އެމަނިކުފާނުގެ ޚިދުމަތްތަކުގެ ތެރެއިން އެންމެ ޚާއްޞަ ގޮތެއްގައި ފާހަގަކޮށްލެވޭ އެއްކަމަކީ، އެކިއެކި ޓެކްނިކަލް ޓްރޭނިންގގެ ރޮނގުން މަސައްކަތްތެރިން އުފެއްދެވުމެވެ. އެއީ އެމަނިކުފާނުގެ އިސްނެންގެވުމަކަށް ސަރުކާރުން ހޯއްދަވައިދެއްވި ފުރުޞަތެކެވެ. ވޮކޭޝަނަލް ޓްރޭނިންގ ސެންޓަރު އުފެދުން އެއީ މި މަސައްކަތުގެ ފެށުމެވެ.
ދިވެހިރާއްޖޭގައި އިންޖިނިއަރިންގގެ މަސައްކަތް ކުރިއެރުވުމުގެ ރޮނގުން 1979 ވަނަ އަހަރު އަޙްމަދު އާދަމަށް ވަނީ ސަރުކާރުން ޢާންމު ޚިދުމަތުގެ ޝަރަފުވެރިކަމުގެ އިނާމު އަރުވާފައެވެ. ރައީސް އަލްއުސްތާޛު މައުމޫން ޢަބްދުލްޤައްޔޫމް ރައީސުލްޖުމްހޫރިއްޔާ ކަމުގެ މަގާމާ ހަވާލުވެވަޑައިގަތުމަށްފަހު، 1979 ވަނަ އަހަރު ދެއްވަން ފެށްޓެވި ޢާންމު ޚިދުމަތުގެ ޝަރަފުވެރިކަމުގެ އިނާމު އެންމެ ފުރަތަމަ ލިބިވަޑައިގެންނެވި ބޭފުޅުންގެ ތެރޭގައި އަޙްމަދު އާދަމް ހިމެނިވަޑައިގަންނަވައެވެ.
އޭގެފަހުން މިނިވަން 25 ގެ ޢާންމު ޚިދުމަތުގެ އިނާމުވެސް އަޙްމަދު އާދަމަށް ވަނީ ލިބިވަޑައިގެންފައެވެ. މި އިނާމަކީ، ރާއްޖެއަށް މިނިވަންކަން ލިބުމަށްފަހުގައާއި، އޭގެ ކުރިންވެސް ރާއްޖޭގެ ކުރިއެރުމަށާއި ތަރައްޤީއަށް ފާހަގަކޮށްލެވޭފަދަ އަގުހުރި ޚިދުމަތްތަކެއް ކޮށްދެއްވި ބޭފުޅުންނަށް އެކަމުގެ އަގު ވަޒަންކުރެއްވުމުގެ ގޮތުން 1990 ވަނަ އަހަރު ސަރުކާރުން ދެއްވި އިނާމެކެވެ.
އަޙްމަދު އާދަމް، ދިވެހި ދައުލަތަށާއި ދިވެހި ސަރުކާރަށާއި ރައްޔިތުންނަށް ކޮށްދެއްވި މަތިވެރި ޚިދުމަތްތައް ފާހަގަކުރައްވާ، ސަރުކާރުން ދިވެހި ދައުލަތުގެ މަތިވެރި ޢިއްޒަތް، ނިޝާން ޢިއްޒުއްދީނުގެ ޢިއްޒަތުގެ ވެރިކަމުގެ ލަޤަބު އެމަނިކުފާނަށް އެރުވީ 2019 ވަނަ އަހަރެވެ.