މާލޭ އެއްގަމު ތޮށި އަޕްގްރޭޑް ކުރުމާއި މާލޭގެ ފެންހިންދާ ނިޒާމް އަޕްގްރޭޑްކުރުމާ ގުޅޭ ސާރވޭތައް ކުރުމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ޖަޕާން އިންޓަނޭޝަނަލް ކޯޕަރޭޝަން އޭޖެންސީ، ޗައިކާއާއެކު އެއްބަސްވުމެއްގައި ސޮއިކޮށްފިއެވެ.
މި ދިރާސާތައް ކުރުމަށް ހަމަޖެހިފައިވަނީ ޖައިކާގެ ފަރާތުން، އެ އެޖެންސީން ދޭ ހިލޭ އެހީގެ ދަށުންނެވެ. މިއީ ޖައިކާގެ އެހީގައި ހިންގާ "ޑިސާސްޓަރ ރެސިލިއަންސް އެންހާންސްމަންޓް އިން މާލޭ" މަޝްރޫޢުގެ ދަށުން ކުރެވޭ މަސައްކަތެއްކަމަށް ޕްލޭނިންގ މިނިސްޓްރީން ވިދާޅުވެއެވެ.
މިކަމުގެ އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއިކުރެއްވީ، ޑިރެކްޓަރ ޖެނެރަލް ޝާނާ ފާރޫޤެވެ. އަދި ޖައިކާގެ ފަރާތުން ސޮއިކުރެއްވީ ޕްރިޕަރޭޓަރީ ސަރވޭ ޓީމުގެ ލީޑަރ ޓުސުކިކޮއި މެގުމިއެވެ.
ޖައިކާގެ އެހީގައި ކުރިއަށްގެންދާ މި ދިރާސާގެ އަލީގައި މާލޭގެ އެއްގަމު ތޮށި އަޕްގްރޭޑްކުރުމަށާއި، މާލޭގެ ފެން ހިންދާ ނިޒާމު އަޕްގްރޭޑްކުރުމަށް ބޭނުންވާ ތަފާތު މަޢުލޫމާތުތައް ހޯދާ އެއްކުރެވޭނެކަމަށް ޕްލޭނިންގ މިނިސްޓްރީން ވިދާޅުވެއެވެ.
މީގެ 30 ހަކަށް އަހަރު ކުރިން މާލޭގެ ވަށާލެވިފައިވާ ތޮއްޓަކީ ރާއްޖެއާއި ޖަޕާނުގެ ގުޅުމުގެ މުހިންމު ރަމްޒެކެވެ. 1987 ވަނަ އަހަރު މާލެއަށް ބޮޑު ރާޅު އަރާ ލިބުނު ގެއްލުމަކީ، މާލެއަށް ކުރިމަތިވި މޫސުމީ އެންމެ ބޮޑު އެއް ކާރިސާއެވެ.
މި ކާރިސާގައި އެތައް ބައެއްގެ މުދަލަށް ގެއްލުން ލިބުނެވެ. އެހެންކަމުން މިފަދަ ކާރިސާތަކުން ސަލާމަތްވުމަށް މާލޭގެ އެއްގަމު ތޮށިލުމުގެ މަސައްކަތް ކޮށްފައިވަނީ ޖަޕާނު ސަރުކާރުގެ ހިލޭ އެހީގެ ދަށުންނެވެ.
މި މަޝްރޫއަށް 1991 އިން 1992 އަށް ޖައިކާ އިން ދިރާސާތަކެއް ކުރުމަށްފަހު، އެއްގަމު ތޮށި ޑިޒައިންކުރުމާއި ޢަމަލީ މަސައްކަތް ކޮށްފައިވަނީ 1993 އިން 2002 އާއި ދެމެދުއެވެ.
ރާއްޖެއާއި ޖަޕާނާއި ދެމެދު ސިޔާސީ ގުޅުން ޤާއިމުކޮށްފައިވަނީ 1967 ވަނަ އަހަރުއެވެ. މިއަހަރު ދެ ޤައުމުގެ ގުޅުމަށް 55އަހަރު ވަނީ ފުރިފައެވެ.