ހުޅުމާލޭގައި އޮފީސް ޢިމާރާތެއް ތަރައްޤީކުރާނެ ބަޔަކު ހޯދުމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީއިން ހުޅުވާލައިފިއެވެ.
އެޗް.ޑީ.ސީއިން ބުނީ، މިއީ 7 ފަންގިފިލާއަށް ތަރައްޤީކުރުމަށް ހަމަޖެހިފައިވާ އޮފީސް ޢިމާރާތެއްކަމަށެވެ. ޑިޒައިން އެންޑް ބިލްޑް އުޞޫލުން މި މަސައްކަތް ކުރުމަށް ޝަޢުގުވެރިވާ ފަރާތްތަކުން ބިޑް ހުށަހެޅުމުގެ ފުރުޞަތު އަންނަ ޖުލައިމަހުގެ 31 ވަނަ ދުވަހުގެ ނިޔަލަށް އެ ކޯރޕަރޭޝަނުން މިހާރު ވަނީ ހުޅުވާލާފައެވެ.
މި މަޝްރޫޢާއި ގުޅޭ ޕްރީ-ބިޑް މީޓިންގ އަންނަމަހުގެ 4 ވަނަ ދުވަހު ޒޫމް މެދުވެރިކޮށް އޮންލައިންކޮށް ބޭއްވުމަށް ހަމަޖެހިފައިވާކަމަށް އެޗް.ޑީ.ސީއިން ބުނެއެވެ.
Invitation for Tender - Design & Build of 7-Storey Office Building in Hulhumalé
— Urbanco (@hdcmaldives) June 19, 2023
Tender Link: https://t.co/XkMjdP2k52 pic.twitter.com/k0FXGzcVVY
މި އޮފީސް ޢިމާރާތް ތަރައްޤީކުރުމަށް ބޭނުންވާ ބިން އެޗް.ޑީ.ސީއިން ވަނީ އެލޮކޭޓްކޮށްފައެވެ. އެގޮތުން މިތަން ތަރައްޤީކުރުމަށް ހުޅުމާލޭ ފުރަތަމަ ފިޔަވަހީގައި ހުންނަ މޯލްޑިވްސް ރެޑްކްރެސެންޓުގެ ޢިމާރާތާއި ޖެހިގެން 5262.61 އަކަފޫޓުގެ ބިމެއް އެޗް.ޑީ.ސީއިން ވަނީ ކަނޑައަޅާފައެވެ.
އެޗް.ޑީ.ސީއިން ބުނީ، އައު އޮފީސް ޢިމާރާތް ފަރުމާކޮށްފައި ވަނީ ތަފާތު ހަރަކާތްތައް ކުރިއަށް ގެންދިއުމުގެ އިތުރުން ޒަމާނީ އޮފީސް ވަޞީލަތްތައް ވެސް ބޭނުންކުރެވޭ ގޮތަށެވެ. އަދި މި ޢިމާރާތަކީ އެޗް.ޑީ.ސީއާއި ސަރުކާރާއި، އަމިއްލަ އޮފީސްތަކުގެ އެހެނިހެން ބޭނުންތައް ފުއްދައިދޭނެ ޢިމާރާތެއްކަމަށެވެ.
އޮފީސް ހިންގުމަށް ބޭނުންވާ ޖާގައިގެ އިތުރުން ވިޔަފާރީގެ ބޭނުމަށް ޚާއްސަ ޖާގަތަކާއި، ވެހިކަލް ޕާކުކުރުމަށް ބޭނުންވާ ޖާގައާއި ޓެރެހެއްވެސް މި އޮފީސް ޢިމާރާތުގައި ހުންނާނެކަމަށް އެޗް.ޑީ.ސީއިން ބުނެއެވެ.
ހުޅުމާލޭގައި އިތުރުވަމުންދާ އާބާދީއާއެކު، އޮފީސްތަކާއި ވިޔަފާރިއާއި އިޤްތިޞާދީ އެހެނިހެން ހަރަކާތްތައް ހިންގުމަށް ބޭނުންވާ ޖާގަ އިތުރުކުރުމަށް އެޗް.ޑީ.ސީއިން އަންނަނީ މަސައްކަތްކުރަމުންނެވެ.