ރައްޔިތުންގެ މަޖިލީހުގެ ޖަލްސާތަކެއް ދައުރުން ބޭރުން ބޭއްވެވުމަށް މަޖިލީހުގެ މެޖޯރިޓީ ޕާޓީ، އެމްޑީޕީން އެދިއްޖެއެވެ.
ރައްޔިތުންގެ މަޖިލީހުގައި މުހިންމު ގިނަ މަސައްކަތްތަކެއް ހުރިނަމަވެސް، އެ މަސައްކަތްތައް ނުނިމި މަޖިލިސް މިއަދު ވަނީ ޗުއްޓީއަށް ގޮސްފައެވެ. މަޖިލިސް މިއަދު ޗުއްޓީއަށް ދިޔައީ، މަޖިލީހުގެ ދެވަނަ ދައުރު ދަންމާލަން އެމްޑީޕީގެ ޕާލިމަންޓްރީ ގުރޫޕްގެ ލީޑަރު މުޙައްމަދު އަސްލަމް މަޖިލީހުގެ މިއަދުގެ ޖަލްސާގައި އެދިވަޑައިގެންފައި ވަނިކޮށެވެ. ނަމަވެސް މަޖިލީހުގެ ރިޔާސަތުން ވަނީ މަޖިލީހުގެ މިދައުރު ނިންމާލެއްވީކަން މިއަދުގެ ޖަލްސާގައި އިއުލާންކުރައްވާފައެވެ.
މިކަމާއި ގުޅިގެން އެމްޑީޕީގެ ޕާލިމަންޓްރީ ގްރޫޕްގެ ލީޑަރު މުޙައްމަދު އަސްލަމް ސޮއިކުރައްވާ މަޖިލީހުގެ ރައީސަށް ފޮނުއްވެވި ސިޓީގައި ވަނީ މަޖިލީހުގެ ދައުރު ނިންމަލާވެއްވީ ކޮމިޓީތައް އެކުލަވާ ނުލައްވާކަން ފާހަގަކުރައްވާފައެވެ. އެހެންކަމުން މަޖިލީހުގެ ދާއިމީ ކޮމިޓީތައް އެކުލަވާލުމަށާއި، މަޖިލީހުގެ ރައީސްއާއި ނާއިބު ރައީސްގެ އިތުބާރު ނެތްކަމުގެ މައްސަލަ ކުރިއަށް ގެންދިއުމާއި، މަޖިލީހުގެ ޤަވާއިދު އިޞްލާހުކުރުމަށް ދައުރުން ބޭރުން ޖަލްސާ ބާއްވައިދެއްވުމަށް އަސްލަމް ވަނީ އެދިވަޑައިގެންފައެވެ.
މިކަމާއި ގުޅިގެން އެމްޑީޕީ ޕާލިމަންޓްރީ ގްރޫޕުން މަޖިލީހުގެ އިދާރާއި ބޭއްވެވި ނޫސްވެރިންގެ ބައްދަލުވުމުގައި ވެލިދޫ ދާއިރާގެ މެންބަރު މުޙައްމަދު ޢަބްދުﷲ ޝަފީޤް ވިދާޅުވީ، ދައުރުން ބޭރުން ޖަލްސާ ބާއްވަވަވުން 29 މެންބަރަކު ސޮއިކުރައްވާ މަޖިލީހުގެ ރައީސްއަށް ހުށައަޅުއްވާފައިވާކަމަށެވެ.
ރައްޔިތުންގެ މަޖިލީހުގެ ޤަވާއިދުގެ 45 ވަނަ މާއްދާގައި ބަޔާންކުރައްވާފައިވަނީ ރައްޔިތުންގެ މަޖިލީހުގެ ތިންބައިކުޅަ އެއްބައި މެންބަރުން ސަބަބު ބަޔާންކޮށް ސޮއިކުރައްވާ، ރައްޔިތުންގެ މަޖިލީހުގެ ރައީސަށް ހުށައަޅުއްވައިފިނަމަ، އެ ހުށައެޅުން ހުށައަޅުއްވާތާ 14 ދުވަހުގެ ތެރޭގައި އެ ޖަލްސާއެއް ނުވަތަ ޖަލްސާތަކެއް ބޭއްވޭނެގޮތަށް ހަމަޖައްސައި މަޖިލީހުގެ ރައީސް ޖަލްސާ ބާއްވަން ވާނެކަމަށެވެ. އަދި އެ 14 ދުވަސް ގުނާނީ ބަންދު ދުވަސްތައް ހިމަނައިގެންކަމަށްވެސް މަޖިލީހުގެ ޤަވާއިދުގައިވެއެވެ.
މަޖިލީހުގައި ކުރުމަށް ހުރި މުހިންމު މަސައްކަތްތަކުގެ ތެރޭގައި ޖޭއެސްސީ އިޞްލާހުކުރުމަށް ހުށައެޅުއްވި އިޞްލާހާއި ޤާނޫނު އަސާސީ އިޞްލާހުކުރުމަށް ހުށައެޅުއްވި އިޞްލާހާއި، ބައެއް ވަޒީރުންގެ އިތުބާރު ނެތްކަމުގެ މައްސަލަތައް އެމްޑީޕީގެ ޕާލިމަންޓްރީ ގްރޫޕުން ފާހަގަކުރައްވައެވެ.