ޚާރިޖީ ދާއިރާގައި އަންހެނުން ކުރާ ޚިދުމަތްތައް ފާހަގަކޮށް އަގުވަޒަންކުރުން މުހިންމު: ޝާހިދު

ޑިޕްލޮމެޓިކް ދާއިރާ ނުވަތަ ޚާރިޖީ ދާއިރާގައި އަންހެނުން ކުރަމުންދާ އަގުހުރި ޚިދުމަތްތައް ފާހަގަކޮށް އަގުވަޒަންކުރުން މުހިންމުކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، މިއަދު ފާހަގަކުރަމުންދާ ޑިޕްލޮމެޓިކް ދާއިރާގައި މަސައްކަތްކުރާ އަންހެނުންގެ ދުވަހުގެ މުނާސަބަތުގައި ކުރެއްވި ޓުވީޓެއްގައެވެ.

ފޮރިން މިނިސްޓަރ ޢަބްދުﷲ ޝާހިދު ކުރެއްވި ޓުވީޓުގައި ޑިޕްލޮމެޓިކް ދާއިރާގައި މަސައްކަތްކުރާ އަންހެނުންގެ ދުވަހުގެ މުނާސަބަތުގައި ރާއްޖެއާއި ރާއްޖެއިން ބޭރުގައި މި ދާއިރާގައި މަސައްކަތްކުރާ ހުރިހާ އަންހެނުންނަށް ދުވަހުގެ ތަހުނިޔާ ފޮނުއްވާފައިވެއެވެ. އަދި ބައިނަލްއަޤްވާމީ ފެންވަރުގައި މިދުވަސް ފާހަގަކުރެވެން ފެށީ މިދިޔަ އަހަރު ރާއްޖޭއިން އިސްނަގައިގެން ކުރެވުނު މަސައްކަތުންކަމަށާއި، މިދުވަސް ފާހަގަކުރުމަށް އދ. އިން ނިންމި ޤަރާރު ފާސްކޮށްފައިވަނީ ރެކޯޑް ޢަދަދެއްގެ ކޯ-ސްޕޮންސަރުންނާއެކުގައިކަމަށް މިނިސްޓަރ ވިދާޅުވިއެވެ.

މިނިސްޓަރ ޝާހިދު ވިދާޅުވީ، ޤާބިލު އެތައް އަންހެން ޑިޕްލޮމެޓުންނާއެކު ކޮންމެ ދުވަހަކު މަސައްކަތް ކުރަން ލިބުމަކީ އެމަނިކުފާނަށް ލިބިވަޑައިގަންނަވާ ފަޚުރެއްކަމަށާއި އުފަލެއްކަމަށެވެ. އަދި ޑިޕްލޮމެޓިކް ދާއިރާގައި އަންހެނުން ކުރަމުންދާ އަގުހުރި ޚިދުމަތްތައް ފާހަގަކޮށް އަގު ވަޒަންކުރުމަށް މިނިސްޓަރގެ ޓުވީޓުގައި ވަނީ އިލްތިމާސްކުރައްވާފައެވެ.

މިފަދަ ދުވަހެއް ބައިނަލްއަޤްވާމީ ފެންވަރުގައި ފާހަގަކުރުމުގެ އެންމެ ބޮޑު ބޭނުމަކީ ޚާރިޖީ ދާއިރާގައި އަންހެނުންގެ ބައިވެރިވުމާއި ޝާމިލުވުން އިތުރުކޮށްދިނުމެވެ. އަދި މި ދާއިރާއިން ކުރިއަށްދިއުމަށް ހުރި ފުރުޞަތުތައް އިތުރުކޮށްދީ، މި ދާއިރާގައި އަންހެނުންނަށް ކުރިމަތިވާ ތަފާތުކުރުންތައް ނައްތާލާ، އެކަންކަމަށް ހޭލުންތެރިކުރުވުމެވެ.