ޣީބަ ބުނުމާއި ނެތިމޮށުމުން ދުރުހެލިވާންޖެހޭ: ޚުޠުބާ

ޣީބަނުމާއި، ދެކޮޅުވެރިކަމާއި، ޙަސަދަވެރިކަމާއި ގެއްލުންތަކަށް މަގުފައިވާ ކަންތައްތަކާ ދުރުހެލިވުމަށް އެންމެހާ މުސްލިމުންނަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.
ރާއްޖޭގެ މިސްކިތްތަކުގައި މިއަދު ދިން ހުކުރު ޚުޠުބާ ޚާއްސަކޮށްފައިވަނީ "ދުލުގެ އާފާތްތަކަށް" މި މައުޞޫޢުއަށެވެ.

ހުކުރު ޚުޠުބާގައި ވިދާޅުވީ، ޣީބަ ބުނުމަކީ ނުބައިކަން ބޮޑުވެގެންވާ ފާފައެއްކަމަށާއި، އެއީ މަރުވެފައިވާ ތިމާގެ އަޚާގެ މުޅަމަސް ކެއުންފަދަ ކަމެއްކަމަށެވެ. އަދި ޣީބަ ބުނުމާއި ނެތިމޮށުމަށް މެދުވެރިވާ ސަބަބުތަކުގެ ތެރޭގައި ތިމާގެ ނަފުސަށް ތާއީދު ހޯދުމާއި، އަނެކާއާމެދު ތިމާގެ ހިތުގައި އޮންނަ ޙަސަދައާއި ނަފުރަތުގެ ސަބަބުން މީސްތަކުންގެ ކުރިމަތީގައި އޭނާގެ އަގުވައްޓާލަން ބޭނުންވުން ހިމެނޭކަން ޚުޠުބާގައި ފާހަގަކުރެއްވިއެވެ.

ކަށްވަޅުގައި ޢަޛާބު ލިބޭ ޢަމަލުތަކުގެ ތެރޭގައި ޣީބަ ބުނުން ހިމެނޭކަން ފާހަގަކުރައްވާ، ނެތިމޮށުމުންނާއި ދޭތެރެ ޖެއްސުމާއި ފިތުނަފަސާދަ ފެތުރުމާއި ދުރުހެލިވުމަށް މިއަދުގެ ހުކުރު ޚުޠުބާގައި ވަނީ ގޮވާލައްވާފައެވެ. އަދި ދެބައޮޑުވަމުން، ދޭތެރެ ޖައްސަމުން ހިނގުމާއި، މީސްތަކުންގެ އަބުރަށް އަރައިގަންނަ މީހުންނަށް، ޤިޔާމަތް ދުވަހުން ގަދަފަދަ ޢަޛާބު ލިބޭނެކަމަށާއި، މުސްލިމުންގެ ޣީބަ ބުނެ، ހުތުރު ބަސްތައް ރައްދުކޮށް އުޅޭ މީހުންނަށް ޤިޔާމަތް ދުވަހުން އެމީހުން ކޮށްއުޅުނު ފާފަތަކާ އެއްފަދަ ޢަޛާބުދެއްވާނެކަން ހަނދާކޮށްދީފައިވެއެވެ.

"މިފަދަ ޢަމަލުތަކުގެ ނުރައްކާތެރިކަން ބަޔާންކުރައްވާ މާތް ﷲ ވަޙީކުރައްވާފައިވާ ބަސްފުޅެއްގެ މާނައިގައި ވެއެވެ. "އަދި ތިބާޔަށް އެކަމަކާމެދު އެނގުމެއް ނުވާކަމަކަށް ތިބާ ތަބަޢަ ނުވާށެވެ! ހަމަކަށަވަރުން އިވުމާއި، ފެނުމާއި، ހިތާއި މިއިން ކޮންމެ ކަމަކީ އެއާމެދު ސުވާލު ކުރައްވާނެ ކަމެއްކަމުގައި ވިއެވެ" މިފަދަ ވާހަކަތައް ފަތުރާ މީހުން، އެމީހުންގެ ގުނަވަންތަކުން ކުރާ ޢަމަލުތަކަށް ޤިޔާމަތް ދުވަހުން ޖަވާބުދާރީވާން ޖެހޭނެއެވެ. އެއިން ކޮންމެ ކަމަކާމެދު އެ ދުވަހު ސުވާލު ކުރެވޭނެކަން ދަންނަންޖެހެއެވެ" ޚުޠުބާގައި ވިދާޅުވިއެވެ.

ދޭތެރެ ޖެއްސުމަކީ ނުބައިވެގެންވާ ކަމެއްކަން ފާހަގަކުރައްވާ ޣީބަނުމާއި، ދެކޮޅުވެރިކަމާއި، ޙަސަދަވެރިކަމާއި ގެއްލުންތަކަށް މަގުފައިވާ ކަންތައްތަކާ ދުރުހެލިވުމަށް އެންމެހާ މުސްލިމުންނަށް މިއަދުގެ ޙުޠުބާގައި ގޮވާލެއްވިއެވެ. އަދި ދުލުގެ އާފާތްތަކުގެ ތެރޭގައި ދޮގު ހެކި ދިނުމާއި ދޮގު ހުވާ ކުރުން ހިމެނޭކަމަށާއި، ﷲ ގެ ހަޟްރަތުން އެމީހަކަށް ލިބިފައިވާ ހެކި ވަންހަނާކޮށްފި މީހަކަށްވުރެ އަނިޔާވެރިކަން ބޮޑު މީހަކު ނުވާކަން ޚުޠުބާގައި ފާހަގަކުރެއްވިއެވެ.

"މުސްލިމް އަޚުންނޭވެ! ދޮގު ހެކި ދިނުމުގެ ސަބަބުން ފޫނުބެއްދޭ ފަދަ ބޮޑެތި ގެއްލުންތައް ލިބެއެވެ. އެކަންތައްތަކުގެ ތެރޭގައި ޤާޟީއަށް ޙައްޤު އޮޅި، ބާޠިލަކީ ޙައްޤުކަމުގައި ހީވުމާއި، އޭގެ ސަބަބުން އެހެން މީހުންގެ ޙައްޤުތައް ގެއްލިގެން ދިއުމާއި، މުޖުރިމުން ކުށުން ބަރީއަވުމާއި، ކުށެއް ނެތް މީހުންނަށް ޙައްޤަކާނުލައި އަނިޔާ ލިބުން ހިމެނެއެވެ. މާތް ﷲ ގެ ޙުރުމަތްތަކަށް އަރައިގަނެވި، ދިނާމެދު ޙައްޤު ނޫން ބަސްތައް ބުނެވެއެވެ" ހުކުރު ޚުޠުބާގައި ވިދާޅުވިއެވެ.

މިއަދުގެ ހުކުރު ޚުޠުބާގައި މާތް ﷲ އަށް ތަޤްވާވެރިވެ، ސީދާވެގެންވާ ބުނުމަކުން ބަސްބުނުމަށް މުސްލިމް އުންމަތަށް ވަނީ ނަސޭހަތްތެރިވެފައެވެ.