މިނިސްޓަރ ޝާހިދު ރަސްމީ ދަތުރުފުޅެއްގައި އިންޑިއާއަށް
-
ދަތުރުފުޅުގެ ރަސްމީ ބައި މިމަހު 11 އިން 12 އަށް
-
ދެ ޤައުމުގެ ދެމެދު މުހިންމު މަޝްވަރާތަކެއް
-
އިޖްތިމާޢީ ޢިޤްތިޞާދީ ދާއިރާއިން ގުޅުން ބަދަހިކުރުމާއި ގުޅޭ މުހިންމު އެއްބަސްވުންތަކެއް
ރަސްމީ ދަތުރުފުޅެއްގައި ފޮރިން މިނިސްޓަރ ޢަބްދުﷲ ޝާހިދު އިންޑިއާއަށް ފުރާވަޑައިގެންފިއެވެ.
ފޮރިން މިނިސްޓަރ ޢަބްދުﷲ ޝާހިދުގެ މި ދަތުރުފުޅަކީ އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް ޖައިޝަންކަރުގެ ދަޢުވަތަކަށް އިންޑިއާގެ ނިއުދިއްލީއަށް ކުރައްވާ ރަސްމީ ދަތުރުފުޅެކެވެ. މިނިސްޓަރގެ މި ދަތުރުފުޅުގެ ރަސްމީ ހަރަކާތްތައް ކުރިއަށްގެންދިއުމަށް ހަމަޖެހިފައިވަނީ މިމަހުގެ 11 އަދި 12 ދުވަހުކަމަށް ފޮރިން މިނިސްޓްރީން ވިދާޅުވެއެވެ.
މިނިސްޓަރ ޝާހިދުގެ މި ދަތުރުފުޅުގެ ތެރެއިން ދެޤައުމުގެ ދެމެދުގައި އެކި ދާއިރާތަކުން ގުޅުން ބަދަހިކުރުމަށް ދެޤައުމުގެ ޚާރިޖީ ވަޒީރުންގެ މެދުގައި ރަސްމީ މަޝްވަރާތައް ބޭއްވުމަށް ވަނީ ހަމަޖެހިފައެވެ. މި ބައްދަލުކުރެއްވުމުގައި، ރާއްޖޭގައި ކުރިއަށްދާ ތަރައްޤީގެ މަޝްރޫޢުތަކާއި، ބައިނަލްއަޤްވާމީ ގުޅުން ބަދަހިކުރުމާ ބެހޭގޮތުން ދެވަޒީރުން މަޝްވަރާކުރައްވާނެއެވެ. ހަމައެހެންމެ އިންޑިއާ ސަރުކާރުގެ އިސް ބޭފުޅުންނާވެސް މިނިސްޓަރ ޝާހިދު ބައްދަލުކުރައްވާނެއެވެ.
މި ދަތުރުފުޅުގެ ތެރެއިން ރާއްޖެއަށް އިޖްތިމާޢީ އިޤްތިޞާދީ ދާއިރާއިން އެހީތެރިކަމާއި އެއްބާރުލުން ދިނުމާގުޅޭ މުހިންމު އެއްބަސްވުންތަކެއްގައި ސޮއިކުރުމަށް ހަމަޖެހިފައިވާކަމަށްވެސް ފޮރިން މިނިސްޓްރީން ވިދާޅުވެއެވެ.