ޑިމޮކްރަޓްސްގެ ޕްރައިމަރީއަށް ނަން ހުށަހެޅުއްވީ މެމްބަރު އިލްޔާސް އެކަނި

ރާއްޖޭގައި އެންމެފަހުން އުފެދުނު ދަ ޑިމޮކްރެޓްސް ޕާޓީގެ ރިޔާސީ ޕްރައިމަރީގައި ވާދަކުރައްވަން ނަން ހުށަހެޅުއްވީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބުކަމަށް އެ ޕާޓީން ބުނެފިއެވެ.

ދަ ޑިމޮކްރެޓްސް ޕާޓީއަކީ އެމްޑީޕީގެ ކުރީގެ ރައީސް، ރައީސް މުހައްމަދު ނަޝީދާއި އެމްޑީޕީން ވަކިވި މަޖިލިސް މެމްބަރުންތަކެއް އިސްކޮށް ތިއްބަވައިގެން މިމަހު އުފެއްދެވި ޕާޓީއެކެވެ.

ކުރިއަށް އޮތް ރިޔާސީ އިންތިހާބުގައި އެޕާޓީގެ ފަރާތުން ވާދަކުރާނެ ކެނޑިޑޭޓެއް ހޮވުމަށް ބާއްވާ ޕްރައިމަރީއަށް ނަން ހުށަހެޅުމުގެ ފުރުސަތު އޮތީ މިދިޔަ ބުރާސްފަތިދުވަހު ހުޅުވާލާފައެވެ. އަދި އެކަމަށް ކަނޑައެޅި ސުންގަޑި ވަނީ މިއަދު ހަވީރު 4:00 ޖެހިއިރު ހަމަވެފައެވެ.

ދަ ޑިމޮކްރެޓްސްގެ އޮފިޝަލަކު ވިދާޅުވީ ޕްރައިމަރީއަށް ނަން ހުށަހެޅުމުގެ ފުރުސަތު ހަމަވިއިރު ރައީސް ނަޝީދުގެ އަރިސް ބޭފުޅެއްކަމަށްވާ، ހުޅުދޫ ދާއިރާގެ މެމްބަރު އިލްޔާސް ލަބީބު ފިޔަވައި އިތުރު ބޭފުޅަކު ނަން ހުށަހަޅާފައިނުވާކަމަށެވެ.

އެ ޕާޓީގެ އަސާސީ ގަވައިދުގައި ބުނާ ގޮތުން ޕްރައިމަރީގައި ވާދަކުރަން އެންމެ ކެނޑިޑޭޓެއް ނަން ހުށަހަޅައިފިނަމަ އެމީހަަކަށް ޓިކެޓް ލިބޭނީ ޕާޓީގެ އާންމު މެންބަރުންގެ މެދުގައި ނަގާ ފެންނަ ނުފެންނަ ވޯޓަކުންކަމަށެވެ. އަދި އެވޯޓެއްގައި ބައިވެރިވާ މީޙުންގެ 10 އިންސައްތަ މީހުންގެ ވޯޓް އެ މީހަކު ހޯދަންޖެހޭނެކަމަށްވެސް އަސާސީ ޤަވާއިދުގައިވެއެވެ. ނަމަވެސް އެ ވޯޓް ނެގުން އޮންނާނެ ތާރީހެއް ހާމަކޮށްފައެއް ނުވެއެވެ.

ދަ ޑިމޮކްރެޓްސްއިން ރިޔާސީ ކެނޑިޑޭޓެއް ކަނޑައަޅަން މަސައްކަތްކުރަމުންދާއިރު. އެ ޕާޓީން ވަނީ ޖޭޕީއާއި އެމްއެންޕީއާ ގުޅިގެން އިންތިހާބަށް އެއް ކެނޑިޑޭޓް ނެރުމުގެ މަޝްވަރާތަކެއްވެސްކޮށްފައެވެ.