އެމްއާރުއެމުންވެސް ރިޔާސީ ޕްރައިމެރީ ބާއްވަނީ

މޯލްޑިވްސް ރިޕޯމް މޫވްމަންޓް (އެމްއާރުއެމް) ރިޔާސީ އިންތިޚާބުގައި ވާދަކުރާނެ ކެނޑިޑޭޓެއް ކަނޑައެޅުމަށް ޕްރައިމެރީގައި ވާދަކުރުމުގެ ފުރުސަތު ހުޅުވާލައިފިއެވެ.

އެމްއާރުއެމުން ބުނީ އެޕާޓީގެ ރިޔާސީ ޕްރައިމެރީގައި ވާދަކުރުމަށް ނަން ހުށައެޅުމުގެ ފުރުސަތު މިމަހުގެ 27ގެ ނިޔަލަށްް ހުޅުވާލާފައިވާކަމަށެވެ. އަދި ޕާޓީގެ ޕްރައިމެރީ އޮންނާނީ އަންނަ މަހުގެ 1ވަނަ ދުވަހުކަމަށާއި ވޯޓްލުން ކުރިޔަށްްދާނީ އޮންލައިންކޮށް ކަމަށެވެ.

އެމްއާރުއެމުން ރިޔާސީ ޕްރައިމެރީ ބާއްވާނެކަން އިއުލާންކޮށްް ފުރުސަތު ހުޅުވާލާފައި މިވަނީ އެޕާޓީގެ ރައީސް އަޙްމަދު ފާރިޝް މައުމޫން އިންތިޚާބަށް ކުރިމަތިލާން މަސައްކަތް ކުރާކަމުގެ އަޑު ފެތުރުފައިވަނިކޮށެވެ. އަދި މެމްބަރުން ހަމަނުވެގެން އެޕާޓީ އުވާލަން އިލެކްޝަންސް ކޮމިޝަނުންް ނިންމަވާފައިވެސް ވަނިކޮށެވެ.

3000 މެމްބަރުން ހަމަނުވެގެން އެމްއާރުއެމް އުވާލަން އީސީން ނިންމެވި ނިންމެވުމަކީ ޤާނޫނާއި ހިލާފު ނިންމުމެކަމަށް ވިދާޅުވެ ޕާޓީގެ ޒައީމް ކުރީގެ ރައީސް މައުމޫން އަބްދުލްޤައްޔޫމާއި އެމަނިކުފާނުގެ ދަރިކަލުން ފާރިޝް މައުމޫންވަނީ ކޮމިޝަނަށް ފާޑު ވިދާޅުވެފައެވެ. އެބޭފުޅުން ވިދާޅުވަމުން ގެންދަވަނީ އީސީ އެގޮތަށް ނިންމަވާފައިވަނީ މެމްބަރުން ހަމަކުރަން ދިން ފުރުސަތުގައި ފޯމް ހުށައަޅާފައިވަނިކޮށްކަމަށެވެ. އަދި އިލެކްޝަންސް ކޮމިޝަނާއި ދެކޮޅަށް ސިވިލްކޯޓަށް މައްސަލަ ހުށައަޅާނެކަމަށްވެސް އެމްއާރުއެމުން މީގެ ކުރިން ވަނީ ބުނެފައެވެ.

އެމްއާރުއެމުން ޕްރައިމެރީ އިއުލާނު މިކުރީ އެޕާޓީން ޖުމްހޫރީ ޕާޓީއާ ގުޅިގެން މަސައްކަތް ކުރަން ނިންމާ މިއަދު މަޝްވަރާތައް ފެށުމަށްފަހުއެވެ.