ރާއްޖެއާއެކު އިތުރު ދާއިރާތަކުން ގުޅުން ބަދަހިކުރުމަށް ޖަޕާނުގެ ޝަޢުގުވެރިކަން

ދިވެހިރާއްޖެއާއި ޖަޕާނުގެ ގުޅުން އިތުރު ހަރުފަތަކަށް ގެންދިއުމުގެ ޝަޢުގުވެރިކަން އެބަހުރިކަމަށް ޖަޕާނުގެ ފޮރިން މިނިސްޓަރ ހަޔާޝީ ޔޮޝިމާސާ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރާއްޖެއަށް ރަސްމީ ދަތުރުފުޅެއް ކުރެއްވުމަށް ހަމަޖެހުމާއި ގުޅިގެން ދެއްވި ޚާއްސަ ވީޑިއޯ މެސެޖެއްގައެވެ.

ޖަޕާނުގެ ފޮރިން މިނިސްޓަރގެ މި މެސެޖުގައި ދިވެހިރާއްޖޭގެ ފަޚުރުވެރި މިނިވަން ދުވަހުގެ ހެޔޮ އެދުމާއި ތަހުނިޔާ ޖަޕާނު ސަރުކާރުގެ ފަރާތުން ދިވެހި ސަރުކާރަށާއި، އެންމެހާ ދިވެހި ރައްޔިތުންނަށް އަރިސްކުރެއްވިއެވެ.

ޖަޕާނުގެ ފޮރިން މިނިސްޓަރގެ މި ޚާއްސަ ވީޑިއޯ މެސެޖުގައި ދިވެހިރާއްޖެއަށް ފުރިހަމަ މިނިވަންކަން ލިބުމުގެ ކުރިންވެސް ޖަޕާނާއި ރާއްޖެއަކީ ޚާއްސަ ގުޅުންތަކެއް އޮތް ދެ ޤައުމުގެ ގޮތުގައި ފާހަގަކުރެއްވިއެވެ. އެގޮތުން 1960 ގެ އަހަރުތަކުން ފެށިގެންވެސް މަސްވެރިކަމާއި ފަތުރުވެރިކަމުގެ ދާއިރާއިން ދެ ޤައުމުގެ ދެމެދު ގުޅުން ބަދަހިކުރުމަށް ކުރެވުނު މަސައްކަތްތަކުގެ މައްޗަށް މިނިސްޓަރ އަޅިއަޅުއްވާލެއްވެވިއެވެ. ވަކިން ޚާއްސަކޮށް މޫސުމީ ބަދަލުތަކާއި ތިމާވެއްޓަށް ލިބޭ ގެއްލުންތައް ކުޑަކުރުމުގެ ދާއިރާއިން ދެ ޤައުމުގެ ދެމެދު ޚާއްސަ މަސައްކަތްތަކެއް ފާއިތުވި އަހަރުތަކުގެ ތެރޭގައި ކުރެވިފައިވާކަމަށް މިނިސްޓަރ ވިދާޅުވިއެވެ.

ރާއްޖެއާއި ޖަޕާނުގެ މި ތާރީޚީ ގުޅުން ރަމްޒުކޮށްދޭ އެންމެ މުހިންމު އެއް ރަމްޒަކީ ޖަޕާނު ސަރުކާރުގެ އެހީގައި މާލެ ވަށާ ތަރައްޤީކޮށްފައިވާ ބޭރުތޮށިކަން ފާހަގަކުރައްވާ، މިކަމުގެ ސަބަބުން 2004 ވަނަ އަހަރު ކުރިމަތިވި ސުނާމީ ކާރީސާއިން ވެރިރަށް މާލެއަށް ލިބުނު ގެއްލުންތައް އެތައްގޮތަކުން ކުޑަކޮށްދިންކަން މިނިސްޓަރގެ ވާހަކަފުޅުގައި ފާހަގަކުރެއްވިއެވެ. އަދި 2011 ވަނަ އަހަރު ޖަޕާނަށް ކުރިމަތިވި ބިން ހެއްލުމާއި ސުނާމީ ކާރިސާއިން އަރައިގަތުމަށް ކުރެވުނު މަސައްކަތްތަކަށް އެހީތެރިވެދިނުމުގެ ގޮތުން ރިލީފް ސަޕްލައިގެ ގޮތުގައި ރާއްޖެއިން 700،000 މަސްދަޅު ހަދިޔާކޮށްދީފައިވާކަން ޝުކުރުވެރިކަމާއެކު މިނިސްޓަރ ފާހަގަކުރެއްވިއެވެ.

ޖަޕާނުގެ ފޮރިން މިނިސްޓަރގެ މެސެޖުގައި ރާއްޖެއާއި ޖަޕާނަކީވެސް ކަނޑުގެ ސަރަޙައްދު ބޮޑު ދެ ޤައުމުކަމުން މެރިޓައިމް ދާއިރާއިން ގުޅިގެން މަސައްކަތްކުރުމުގެ މުހިންމުކަމުގެ މައްޗަށްވެސް އަޅިއަޅުއްވާލެއްވެވިއެވެ. ވަކިން ޚާއްސަކޮށް ޖަޕާން ސަރުކާރުން ގެންގުޅުއްވާ "ފްރީ އެންޑް އޯޕަން އިންޑޯ-ޕެސިފިކް" ސިޔާސަތުގެ ދަށުން އިންޑޯ-ޕެސިފިކް ކަނޑުގެ ސަލާމަތާއި ރައްކާތެރިކަމަށް ދެ ޤައުމު ގުޅިގެން މަސައްކަތްކުރުމުގެ މުހިންމުކަން އެމަނިކުފާނު ފާހަގަކުރެއްވިއެވެ.

މި މެސެޖުގައި ރާއްޖެއަށް ކުރެއްވުމަށް ހަމަޖެހިފައިވާ ރަސްމީ ދަތުރުފުޅާއެކު ދެ ޤައުމުގެ ދެމެދު އޮތް ވަރުގަދަ ގުޅުން އިތުރަށް ބަދަހިކުރެއްވުމުގެ ޝަޢުގުވެރިކަމާއި، ދެ ޤައުމު ގުޅިގެން އިތުރަށް މަސައްކަތްކުރެވިދާނެ ދާއިރާތަކަކީ ކޮބާތޯ ބަލާ، މި ގުޅުން އިތުރު ހަރުފަތަކަށް ގެންދެވުމުގެ އުއްމީދު އެބައޮތްކަމަށް ޖަޕާނުގެ ފޮރިން މިނިސްޓަރ ވިދާޅުވިއެވެ.

ފޮރިން މިނިސްޓަރ ޢަބްދުﷲ ޝާހިދުގެ ޚާއްސަ ދަޢުވަތަކަށް ޖަޕާނުގެ ފޮރިން މިނިސްޓަރ ހަޔާޝީ ޔޮޝިމާސާ ރާއްޖެވަޑައިގަތުމަށް ހަމަޖެހިފައިވަނީ މިމަހުގެ 29 ވަނަ ދުވަހުއެވެ. ދެ ދުވަހަށް ކުރައްވާ މި ދަތުރުފުޅުގެ ތެރެއިން ރާއްޖޭގެ ފޮރިން މިނިސްޓްރާއި، ޑިފެންސް މިނިސްޓަރާއި ބައްދަލުކުރައްވާ މުހިންމު މަޝްވަރާތަކެއް ކުރައްވާނެއެވެ.